Read Nzema Nih 8 Bible Online

Nih 8 - Nzema bible

Nih 8

¹Mɔɔ ɔkadwu ye siane nsuu ne azo la, ɛnee Yizilayɛma kɔsɔɔti akee abo ɛdila wɔ bɛ azua ne mɔ azo. Yemɔti siane zɔhane kenle ne mɔɔ lumua la, bɛ muala bɛrayiale Gyɛlusalɛm ɛleka kpatawienyi ne mɔɔ wɔ Nzule Anlenkɛ Kpole ne anyunlu la. Bɛzele sɛlɛvolɛ Ɛzela, mɔɔ eza le mɛla kilehilevolɛ la kɛ ɔva Mɛla Buluku ne mɔɔ Ɛdɛnkɛma luale Mosisi anwo zo vale manle Yizilayɛma la ɔrɛla.

²Yemɔti Ɛzela vale Mɛla Buluku ne rale ɛleka mɔɔ bɛyia la. Ɛnee bɛyia tɛɛnye, mrenya nee mraalɛ nee ngakula mɔɔ ɛnyi na bɛlɛ ndelebɛbo la amuala wɔ ɛkɛ.

³Na ɛkɛ ne, wɔ Nzule Anlenkɛ Kpole ne anyunlu kpatawienyi ne azo, Ɛzela gyinlanle manle ɔ nzi hɔle anlenkɛ ne anloa na ɔbɔle ɔ bo aleɛbahye ne ɔgengale Mɛla ne ɔhilele bɛ toonwo sɛnzɛngyinla. Na menli ne gyelele bɛ nzo diele ye kpalɛ.

⁴Ɛzela gyinlanle sɛlɛdwee bie mɔɔ ayia ne ati bɛva ndaboa bɛbo la azo a gengale Mɛla ne a. Matetaya, Hyima, Anaya, Yulaya, Helekaya yɛɛ Meeyasaya gyinlanle ɔ sa fema zo, yɛɛ Pɛdaya, Maehyeeyɛle, Malekaya, Hahyɛm, Hahyebadeena, Zɛkalaya, yɛɛ Mɛhyɛlam gyinlanle ye bɛne zo.

⁵Ɛzela gyinlanle sɛlɛdwee ne azo la ɛnee ɔ nwo zo ɛhɔ anwuma ɛdɛla bɛ. Mɔɔ ɔbukele Mɛla Buluku ne anu ala la, bɛ kɔsɔɔti bɛdwazole bɛgyinlanle.

⁶Na Ɛzela zele kɛ, “Bɛye Ɛdɛnkɛma, Nyamenle Bedevinli ne ayɛlɛ.” Menli ne kɔsɔɔti manle bɛ sa zo na bɛliele zolɛ, “Amen, Amen.” Akee bɛbɔle bɛ ti aze na bɛbutubutule bɛ nye aze bɛyeyɛle Ɛdɛnkɛma.

⁷Akee bɛdwazole bɛgyinlanle bɛ bo zo ne mɔ. Na Livaema ɛhye mɔ: Gyɛhyua, Beenae, Hyɛlibaya, Gyeemen, Akɛbe, Hyabɛtae, Hodaya, Meeyasaya, Kɛlaeta, Azalaya, Dwozabade, Heenan yɛɛ Pɛlaya hilehilele Mɛla ne mɔ anu hilele bɛ.

⁸Bɛgengale buluku ne mɔɔ Nyamenle Mɛla ne wɔ nu la bɛhilele menli ne; bɛhilehilele nuhua wienyi bɛhilele bɛ, amaa bɛade ɔ bo kpalɛ.

⁹Mɔɔ menli ne dele mɔɔ Mɛla ne se la, debie hwenle bɛ nu na bɛzunle. Na Sɛlɛvolɛ Nihɛmaya, mɔɔ le amɛnlado ne, nee mɛla kilehilevolɛ Ɛzela, nee Livaema mɔɔ hilehilele menli ne la zele bɛ kɛ, “Ɛnɛ kenle ye le nwuanzanwuanza maa Ɛdɛnkɛma bɛ Nyamenle ne. Bɛmmasu yɛɛ bɛmmadi nyane biala.”

¹⁰Akee Nihɛmaya zele bɛ kɛ, “Bɛhɔ sua nu na bɛhɔlie bɛ nye; bɛli debie mɔɔ yɛ fɛ na bɛnlo nwanye fɛlɛko. Bɛmaa menli mɔɔ ɛnlɛ bie la bie. Ɔluakɛ ɛnɛ le Ɛdɛnkɛma kenle nwuanzanwuanza. Bɛmmadi nyane, ɔluakɛ fɛlɛkolilɛ ne mɔɔ Ɛdɛnkɛma fa maa la le bɛ anwosesebɛ.”

¹¹Na Livaema ne gogole menli ne amuala ahonle zele kɛ, “Bɛyɛ ngungoonwu, ɔluakɛ ɛnɛ kenle ye le kenle nwuanzanwuanza; bɛmmadi nyane.”

¹²Yemɔti menli ne kɔsɔɔti hɔle sua nu hɔlile debie na bɛnlonle nwanye. Bɛ nee menli mɔɔ ɛnlɛ bie la hyɛle mɔɔ bɛlɛ la na bɛlile fɛlɛko, ɔboalekɛ bɛdele edwɛkɛ ne mɔɔ bɛgengale bɛhilele bɛ la abo.

¹³Ye kenle nwiɔ ne azo, mbusua mgbanyinli, sɛlɛvolɛma, yɛɛ Livaema bɔle nu hɔle sɛlɛvolɛ Ɛzela ɛkɛ ne kɛ bɛkazukoa mɛla ne.

¹⁴ Na bɛnwunle kɛ mɛla ne mɔɔ Ɛdɛnkɛma luale Mosisi anwo zo vale manle bɛ la, bɛhɛlɛ ye nuhua kɛ, saa siane nsuu Ɛvoyia ne dwu a ɔwɔ kɛ Yizilayɛma tɛnlɛdɛnla kpɔda kpɔda bo,

¹⁵na bɛbɔ ye nolo wɔ Gyɛlusalɛm nee azuamgbole nee ngyikyi kɔsɔɔti azo kɛ, “Bɛhɔ awoka ne mɔ azo bɛhɔbubu ɔlivi nya, ɛbɔ nu ɔlivi nya, mbaka nya mɔɔ kola maa alubo, yɛɛ arɛlɛ nee mraalɛ kukue mrɛlakɛ bɛrasisi kpɔda kpɔda, kɛmɔ bɛhɛlɛ ye wɔ Mɛla ne anu la.”

¹⁶Yemɔti menli ne hɔpɛle mrɛlakɛ, bɛbubule nya nya bɛrasisile kpɔda kpɔda wɔ bɛ azua ne mɔ ati zo, wɔ bɛ awuke ne mɔ anu, wɔ Ɛzonlenlɛ Sua ne alie wienyi ne anwo yɛɛ ɛleka kpatawienyi ne mɔ mɔɔ wɔ Nzule Anlenkɛ Kpole ne nee Yifelaem Anlenkɛ Kpole ne mɔ anyunlu la.

¹⁷Bɛ kɔsɔɔti mɔɔ bɛvi nlɔnu bɛrale la sisile kpɔda dɛnlanle ɔ bo. Ɔvi Nɛn ara Dwɔhyua mekɛ zo toonwo mɔɔ radwule mekɛ zɔhane la, bɔ zo mɔɔ bɛyɛ ɛhye bie ɔ. Yemɔti awie biala anwo zandele ye na ɔ nye liele.

¹⁸Ɔvi kenle ko zɔhane, alehyenlɛ biala Ɛzela gengale Nyamenle Mɛla buluku ne hilele menli ne. Bɛlile ɛvoyia ne kenle nsuu. Ye kenle mɔtwɛ ne azo, kɛmɔ mɛla ne se la, bɛyiale bɛyɛle nzɛlɛlɛ na bɛvale ɛvoyialilɛ ne bɛrale awieleɛ.