Read Nzema Nih 9 Bible Online

Nih 9 - Nzema bible

Nih 9

¹Siane ko ne ala anu, ye kenle abulanwiɔ nee nna ne azo, Yizilayɛma hedale ɛrele, vale mgbane wɔzale bɛ nwo, na bɛyiale nu bɛhyele ɛhɔne bɛlile bɛ ɛtane ne mɔ anwo nyane.

²Yizilayɛma ne hwenle bɛ nwo vile nyɛvolɛ ne mɔ avinli na bɛhanle bɛ ɛtane ne mɔ nee bɛ ze mɔ ninyɛndane ne mɔ kɔsɔɔti bɛdole gua.

³Bɛgyinlanle nzisi bɛgengale Ɛdɛnkɛma bɛ Nyamenle ne Mɛla ne bɛhilele bɛ kɛyɛ dɔnehwele nsa. Bɛvale dɔnehwele nsa noko bɛhanle bɛ ɛtane ne mɔ na bɛyeyɛle Ɛdɛnkɛma bɛ Nyamenle ne.

⁴Livaema sɛlɛdwee ne, menli mɔɔ gyinlanle zolɛ la a le ɛhye mɔ: Gyɛhyua, Beenae, Kademeɛle, Hyɛbanaya, Bɛnae, Hyɛlibaya, Beenae yɛɛ Kɛneenae. Bɛvale ɛnelɛ kpole bɛzɛlɛle Ɛdɛnkɛma bɛ Nyamenle ne.

⁵Akee Livaema ɛhye mɔ: Gyɛhyua, Kademeɛle, Beenae, Hahyabenaya, Hodaya, Hyɛlibaya, Hyɛbanaya yɛɛ Pɛtahaya zele kɛ, “Bɛdwazo bɛye Ɛdɛnkɛma bɛ Nyamenle ne ayɛlɛ; bɛye ye ayɛlɛ dahuu! Kanza dasanli biala ayɛlɛyelɛ le ekyi bɔbɔ a, awie biala ɛye ye duma nwuanzanwuanza ne ayɛlɛ.”

⁶Na Yizilayɛma amuala yɛle nzɛlɛlɛ ɛhye: “Wɔmɔ Ɛdɛnkɛma, ɛ ngomekye ala yɛɛ ɛle Ɛdɛnkɛma a; wɔmɔ yɛɛ ɛbɔle anwuma nee anwomanyunlu nwɔlɔra a. Wɔmɔ yɛɛ ɛbɔle azɛlɛ nee zolɛ ninyɛne, nyevile nee nuhua ninyɛne a; wɔmɔ yɛɛ ɛmanle bɛ kɔsɔɔti ngoane a. Anwuma tumivolɛma kɔsɔɔti bɔ bɛ ti aze sonle wɔ.

⁷ Wɔmɔ Ɛdɛnkɛma Nyamenle yɛɛ ɛyele Ebelam, ɛyele ye ɛvile Yule mɔɔ wɔ Babelonia na ɛhakyile ye duma ɛvɛlɛle ye Ebileham.

⁸ Ɛnwunle kɛ ɔdi nɔhalɛ ɔmaa wɔ, na ɛ nee ye yɛle ngyekyeleɛ. Ɛbɔle ye ɛwɔkɛ kɛ ɛkɛva Keenama, Hɛtema, yɛɛ Amɔlema, Pɛlɛzema nee Gyibɛsema, yɛɛ Gɛgahyema azɛlɛ ne mɔ ɛkɛmaa ɔ bo zo amra. Ɛlile wɔ ɛwɔkɛ zo, ɔboalekɛ ɛdi nɔhalɛ.

⁹ “Ɛnwunle kɛ yɛ mgbanyinli zile nwunle amaneɛ wɔ Yigyibiti, ɛdele bɛ ɛzunlɛ wɔ Ndɔ Nyevile[2] ne anloa na ɛliele bɛ.

¹⁰ Ɛyɛle nwanwane ninyɛne ɛhilele Yigyibiti belemgbunli ne, ɛyɛle bie ɛhilele ye mgbanyima nee menli mɔɔ wɔ azɛlɛ ne azo la, ɔboalekɛ ɛze kɛ bɛzile bɛsisile wɔ menli ne la. Na ɛliele duma ne mɔɔ ɛnɛ nee ɛnɛ ɛtɛdɛ la.

¹¹ Ɛkpakyele adenle ɛdole nyevile ne anu, na ɛmanle bɛluale azɛlɛ resee zo bɛpɛle; menli mɔɔ ɛlɛfoa bɛ la wule azule buma ne anu, bɛnlomanle kɛ bolɛ wɔ nyevile ne mɔɔ ɛzɛkye la anu.

¹² Ɛvale amungu bolomolo ɛlile bɛ nyunlu alehyenlɛ, ɛvale senle bolonwonwo ɛhilele bɛ adenle aledwolɛ.

¹³ Ɛvi anwuma ɛdwule Boka Saenae azo, ɛdendɛle ɛhilele wɔ menli ne wɔ boka ne azo; ɛmanle bɛ nɔhalɛ mɛla nee ngyehyɛlɛ na ɛhilehilele bɛ kɛ bɛli zo.

¹⁴Ɛhilele bɛ kɛ bɛzie Ɛnwomenlelielɛ Kenle ne nwuanzanwuanza, na ɛluale wɔ sonvolɛ Mosisi anwo zo ɛvale mɛla ne ɛmanle bɛ.

¹⁵ “Ɛhɔne hunle bɛ, ɛmanle bɛ anwuma kpanwo, nzuhɔne hunle bɛ, ɛmanle bɛ bolɛ nu nzukpa. Ɛzele bɛ kɛ bɛhɔva azɛlɛ ne mɔɔ ɛhanle ndane ɛvale ɛmanle bɛ la.

¹⁶ Noko yɛ mgbanyima yɛle mgbanyizonle nee anzosesebɛ, na bɛkpole kɛ bɛnrɛli wɔ mɛla ne mɔ azo.

¹⁷ Bɛanyɛ tieyɛ; bɛ rɛle vile mɔɔ ɛyɛle la amuala, bɛ rɛle vile nwanwane ninyɛne mɔɔ ɛyɛle la. Mgbanyizonle nu, bɛyele sonla lile bɛ ti kɛ ɔva bɛ ɔzia ɔhɔ kanrazonlenlɛ nu wɔ Yigyibiti. Noko ɛle Nyamenle mɔɔ ɛfa ɛtane ɛkyɛ, ɛkyɛ na wɔava ɛya; ɛle ɛlolɛ nee ɛhulolɛ. Wɔ anwunvɔnezelɛ ne le kpole bo zo, wɔamkpo bɛ.

¹⁸ Bɛyɛle ɛnlankɛ ananze, na bɛzele kɛ ɔle bɛ nyamenle; kɛ yemɔ a ɔyele bɛ ɔvile Yigyibiti a. Bɛhanle wɔ ɛya kpole!

¹⁹ Noko wɔamkpo bɛ wɔ fienemgbole ne anu, ɔluakɛ wɔ anwunvɔnezelɛ ne le kpole, Wɔanye amungu bolomolo ne anzɛɛ senle bolonwonwo ne mɔɔ hilele bɛ adenle ewiazo nee nɔɔzo la.

²⁰Wɔ kpalɛ ti ɛvale wɔ Sunsum ne ɛhilehilele bɛ, ɛvale mana ɛlile bɛ adane, ɛmanle bɛ nzukpa bɛnlonle.

²¹Ɛvolɛ abulanla, wɔ fienemgbole ne anu, ɛmanle bɛ debie biala mɔɔ bɛhyianle nwolɛ la; bɛ ndanlɛ antete yɛɛ bɛ gyakɛ amkpomgba ɛlɛ.

²²“Ɛmanle bɛlile maanle maanle mɔɔ nee bɛ bɔ ɛweɛne la anwo zo konim, na ɛhyɛle bɛ azɛlɛ ne mɔ ɛmanle bɛ. Bɛhonle bɛvale Hɛhyebɔn azɛlɛ ne mɔɔ Saehɔn di zo belemgbunli la, yɛɛ Beehyan maanle ne mɔɔ Ɔɔgo di nu belemgbunli la.

²³Ɛmanle bɛ mralɛ dɔɔnwo kɛ anwomanyunlu nwɔlɔra, na ɛmanle bɛhonle bɛvale maanle ne mɔɔ ɛvale ɛbɔle bɛ nlenya mɔ ɛwɔkɛ la.

²⁴ Bɛlile Keenama anwo zo konim bɛvale azɛlɛ ne, ɛvole menli mɔɔ wɔ ɛkɛ ne la akɔme zo; ɛmanle wɔ menli ne tumi bɛvale Keena arelemgbunli nee menli bɛyɛle mɔɔ bɛdabɛ bɛkulo la.

²⁵ Wɔ menli ne mɔ honle vale ninyɛne ɛhye mɔ: azuamgbole mɔɔ bɛhye nwolɛ, azɛlɛ mɔɔ kye aleɛ, azua mɔɔ anwonyia ɛyiyi bɛ, bula mɔɔ bɛbɔ, ɔlivi mbaka, mbaka mɔɔ so ma, yɛɛ vanye tola. Bɛlile debie biala mɔɔ bɛkulo la na bɛyɛle mbelane, bɛlile ninyɛne kpalɛ mɔɔ ɛmanle bɛ la kɔsɔɔti anwo fɛlɛko.

²⁶ “Wɔ menli ne dele ɛ nwo atua na bɛandie wɔ aneɛ, bɛhakyile bɛ nzi bɛzile wɔ mɛla ne. Bɛhunle Nyamenle kpɔmanvolɛma mɔɔ bɔle bɛ kɔkɔ, na bɛzele bɛ kɛ bɛzia bɛdoa wɔ la; bɛbɔle munzule kpole!

²⁷Yemɔti ɛmanle bɛ kpɔvolɛma lile bɛ nwo zo konim, na bɛziele bɛ. Wɔ bɛ amaneɛnwunlɛ nu, bɛzɛlɛle wɔ moalɛ, na ɛliele zolɛ wɔ anwuma lɔ. Wɔ anwunvɔnezelɛ ne kpole ti, ɛmanle bɛ mgbanyima ɛmanle bɛlile bɛ ti, na bɛliele bɛ bɛvile bɛ kpɔvolɛma asa anu.

²⁸Anzonudwolɛ rale, na bɛyɛle ɛtane bɛtiale wɔ bieko, na eza ɛmanle bɛ kpɔvolɛma lile bɛ nwo zo konim. Noko mɔɔ bɛvule bɛ nwo na bɛzɛlɛle la, ɛdele bɛ ne wɔ anwuma lɔ, na mekɛ dɔɔnwo ne ala ɔlua wɔ anwunvɔnezelɛ ne kpole ne ati, ɛliele bɛ.

²⁹ Ɛbɔle bɛ kɔkɔ kɛ bɛli wɔ ngilehilelɛ ne mɔ azo, na mgbanyizonle nu ala bɛkpole wɔ mɛla nee wɔ ngyehyɛlɛ ne mɔ; noko wɔ mɛla zo ɛlilɛ ne a le ngoane adenle ne a. Adubɛnwo nee anzosesebɛ nu, bɛkpole kɛ bɛnrɛli zolɛ.

³⁰ Ɛbɔle bɛ kɔkɔ abotane nu ɛvolɛ biala, ɛluale wɔ Sunsum ne azo ɛmanle wɔ kpɔmanvolɛma dendɛle, na wɔ menli ne yɛle ateakpaso; yemɔti ɛmanle maanle maanle lile bɛ nwo zo konim.

³¹Noko, kɛmɔ wɔ anwunvɔnezelɛ ne le kpole la ati, wɔamkpo bɛ yɛɛ wɔanzɛkye bɛ. Ɛle ɛlolɛ nee anwunvɔnezelɛ Nyamenle.

³² “O Nyamenle, yɛ Nyamenle, ɛle kpole! Ɛ nwo yɛ ɛzulolɛ, ɛle tumivolɛ! Ɛsie wɔ ngyekyeleɛ ɛwɔkɛ ne mɔ nɔhalɛ nu. Ɔvi mekɛ mɔɔ Aselea arelemgbunli sisile yɛ badwu ɛnɛ, yɛnwu amaneɛ dɔɔnwo! Yɛ arelemgbunli, yɛ mgbanyima, yɛ sɛlɛvolɛma nee yɛ Nyamenle kpɔmanvolɛma, Yɛ mgbanyinli nee yɛ menli ne mɔ kɔsɔɔti ɛnwu amaneɛ. Kakye yɛ na yɛnwu amaneɛ somaa!

³³Ɛdi benle kɛ wɔhwe yɛ nzo a; yɛyɛ ɛtane bɔbɔ ɛdeɛ, noko wɔli nɔhalɛ.

³⁴Yɛ arelemgbunli, yɛ mgbanyima nee yɛ sɛlɛvolɛma, yɛɛ yɛ mgbanyinli anli wɔ mɛla ne azo. Bɛandie wɔ mɛla ne mɔ yɛɛ bɛande wɔ kɔkɔbɔlɛ ne.

³⁵Bɛanzonle wɔ wɔ bɛ maanle ye anu. Bɛannwu boɛ kpole ne mɔɔ ɛyɛle bɛ la, na yeayɛ azɛlɛ kpandaanwo ne mɔɔ kye aleɛ la, yɛɛ bɛandwe bɛ nwo bɛanvi ɛtane nwo.

³⁶Ɛnɛ yɛyɛ ahanra wɔ maanle mɔɔ ɛvale ɛmanle yɛ nlenya mɔ la anu, wɔ azɛlɛ ye mɔɔ kye aleɛ maa yɛ la azo.

³⁷Aleɛ mɔɔ azɛlɛ ne maa la kɔ arelemgbunli ne mɔ mɔɔ sie yɛ la ɛkɛ, ɔboalekɛ yɛyɛ ɛtane. Bɛfa yɛ nee yɛ nlankɛ bɛyɛ mɔɔ bɛdabɛ bɛkulo la, yɛwɔ nyane nu kpole!”

³⁸Ɔlua ninyɛne ɛhye mɔ kɔsɔɔti mɔɔ ɛsisi la ati, yɛdayɛ Yizilayɛma, yɛyɛ ngyehyɛlɛ ɛhye, na yɛ mgbanyima, yɛ Livaema nee yɛ sɛlɛvolɛma ava bɛ sa awula ɔ bo.