Read Nzema Ɛst 1 Bible Online

Ɛst 1 - Nzema bible

Ɛst 1

¹ Mekɛ mɔɔ Zɛzɛse a di Maanle Maanle belemgbunli wɔ Pɛhyea la ɛnee ye suakpole a le Susa. Ɔziele maanle maanle mɔɔ bo ɛya ko abulanwiɔ nee nsuu, ɔvi Yendea toonwo kɔkpula Yiteyopea.

³Ɔlile ɛvolɛ nsa wɔ ebia ne azo la ɔdole ye mgbanyima nee sonvolɛma, Pɛhyea nee Midea sogya mgbanyinli, menli mɔɔ di munli nee amɛnladoma mɔɔ nea maanle maanle ne mɔ azo la ɛkponle,

⁴na ɔvale kenle ngoko ɛya ko abulatwɛ (siane nsia) ɔyele ye anwonyia mɔɔ wɔ ye belemgbunlililɛ ne anwo la ɔhilele.

⁵Ɛhye anzi, belemgbunli ne dole Susa suakpole ne azo amra ɛkponle toonwo kenle kɔkɔlɛ nsuu wɔ ye suakunlu alie kpandaanwo ne anwo. Sukoavolɛma nee koahweabanema kɔsɔɔti hɔle ɛkponledolɛ ne bie.

⁶Bɛvale ninyɛne ngɛnlɛma ngakyile dɔɔnwo bɛzieziele suakunlu ɛkɛ ne: mgbɛnu ndanlɛ fufule nee buluwu mɔɔ bɛva lenen ndanlɛ kɔkɔlɛ ndenrɛndenra ngɛnlɛma bɛbobɔ bɛ avinli, na dwɛtɛ fufule ngɛba sosɔ bɛ nloa la hendɛhenda mpila mɔɔ bɛvale awolɛ memeamemea mɔɔ sonle bolɛ la a bɛsisile la. Mbia mɔɔ gyigyi alie nwo ɛkɛ ne la, bɛvale ezukoa nvutuke nee dwɛtɛ fufule a bɛyɛle a. Azɛlɛ ne anwo bɔbɔ, bɛvale awolɛ memeamemea mɔɔ sonle bolɛ la a bɛdole a.

⁷Nza mɔɔ bɛnlonle la, bɛzule ye ezukoa nvutuke ahanrɛlɛ ngakyile nu, yɛɛ belemgbunli ne ɔdaye ye ahunlunyele nu ala ɔhwenle ye nwanye kpalɛ mɔɔ ɔlɛ la ɔvindele.

⁸Wɔ nza ne ɛnlonlɛ nu, bɛansisi awie biala anwo zo. Awie biala nlonle mɔɔ ɔdaye ɔkola la, ɔluakɛ belemgbunli ne manle suakunlu sonvolɛma ne mɛla kɛ bɛzu awie biala mɔɔ ɔdaye ɔkɛhola ye no la.

⁹Mekɛ ɛhye anu ala Belemgbunli Raalɛ Vahyetae ɔdaye ɔdole mraalɛ ne mɔ ɛkponle wɔ Belemgbunli Zɛzɛse suakunlu ɛkɛ ne.

¹⁰Kenle nsuu ne azo, mɔɔ ɛnee belemgbunli ne ɛlɛno nza na ɔ nye ɛlie kpalɛ kpalɛ la, ɔzoanle ɔmanle bɛhɔvɛlɛle ɔdaye Belemgbunli Zɛzɛse ɔ ti anwo sonvolɛma nsuu ne mɔɔ di ɔ nzi la ɔmanle bɛrale. Bɛmɛ a le Mɛhuman, Bezeta, Haabona, Begeta, Abageta, Zita, yɛɛ Kaakase.

¹¹Ɔzele bɛ kɛ bɛhɔze Belemgbunli Raalɛ Vahyetae kɛ ɔzoa ye belemgbunli kyɛlɛ ne na ɔ nee bɛ ɛlua nwolɛ ɛrɛla. Ɔyɛle ɛhye amaa saa ɔba a yeanyia adenle yeava belemgbunli raalɛ ne anwofɛlɛko ne yeadu ɔ nloa anu wɔ menli ne anyunlu, ɔluakɛ ɛnee belemgbunli raalɛ ne anwo yɛ fɛ kpole kpalɛ.

¹²Na Belemgbunli Raalɛ Vahyetae dule ɔ gye. Ɛhye ati belemgbunli ne ahonle futule na ɔvale ɛya.

¹³Belemgbunli ne lɛ mgbanyima bie mɔɔ ze mɛla, na bɛdi pɛlepɛle, na bɛtu ye folɛ la wɔ ɛkɛ. Saa edwɛkɛ mɔɔ le kɛ ɛhye la bie si a, menli ɛhye mɔ yɛɛ ɔbiza bɛ adwenle wɔ nwolɛ a.

¹⁴Mgbanyima ne mɔ a le Kaahyina, Hyita, Ademeeta, Tahyehye, Milɛse, Maasina, yɛɛ Mɛmukan. Bɛmɛ a bɛle Pɛhyea nee Midea maanle ne mɔ anu mgbanyima nsuu mɔɔ lumuale wɔ maanle ne ɛbulɛ nu a.

¹⁵Belemgbunli Zɛzɛse bizale mgbanyima ne mɔ kɛ, “Kɛ mɛla ne se ɛ, duzu a ɔwɔ kɛ bɛfa bɛyɛ Belemgbunli Raalɛ Vahyetae a? Menzoanle kɛ bɛhɔvɛlɛ ye la, ɔdule ɔ gye. Yeamba!”

¹⁶Na Mɛmukan vale dole belemgbunli nee ye mgbanyima ne mɔ anyunlu kɛ, “Debie mɔɔ Belemgbunli Raalɛ Vahyetae ɛyɛ la, tɛ belemgbunli angomekye yɛɛ yegua ɔ nyunlu aze a, na yegua mgbanyima nee menli kɔsɔɔti mɔɔ wɔ Belemgbunli Zɛzɛse maanle maanle ne mɔ anu la amuala anyunlu aze.

¹⁷Ɔluakɛ mraalɛ kɔsɔɔti bade belemgbunli raalɛ ye nyɛleɛ mɔɔ yeyɛ la na ɔlua zolɛ bɛnrɛbu bɛ hu mɔ bie. Bɛbaha kɛ, ‘Belemgbunli Zɛzɛse zoanle kɛ bɛhɔvɛlɛ Belemgbunli Raalɛ Vahyetae kɛ ɔrɛla la, yeampili ye.’

¹⁸Ɛnɛ kenle ye, Pɛhyea nee Midea mraalɛ mɔɔ ɛde belemgbunli raalɛ ne subane mɔɔ ɛhile la anwo bie la baha ahile bɛ hu mɔ kolaa na sɛnzɛne adɔ, na ɛyavalɛ dɔɔnwo nee mgbane mgbane ɛyɛlɛ bara, ɔluakɛ mraalɛ anye ɛnrɛzɔ bɛ hu mɔ.

¹⁹Nana, saa ɛkɛkponle a anrɛɛ mese ɛmaa bɛhɛlɛ mɛla ɛhye bɛboka Pɛhyeama nee Mideama maamɛla ne anwo mɔɔ bɛngakyi ye ɛlɛ a, kɛ ɔvi ɛnɛ mɔɔ kɔ la, Vahyetae agyakɛ ba ɛnrɛtia Belemgbunli Zɛzɛse anwo ɛkɛ ne bieko ɛlɛ; na fa ye dehelɛ gyinlabelɛ ne maa raalɛ mɔɔ lɛ subane kpalɛ la.

²⁰Saa bɛbɔ mɛla ɛhye nolo wɔ belemgbunli ne maanle maanle ne mɔ anu a, mraalɛ muala bava enililɛ amaa bɛ hu mɔ, mɔɔ ɔnva nwolɛ kɛ bɛ hu mɔ le mgbolema anzɛɛ koahweabanema a.”

²¹Folɛdulɛ ɛhye yɛle belemgbunli nee ye mgbanyima ne mɔ fɛ kpole na belemgbunli ne yɛle, kɛmɔ Mɛmukan zuzule la.

²²Ɔhɛlɛle ngɛlata ɔhɔle ye maanle maanle ne mɔ amuala anu, maanle ko biala ɔdaye ye aneɛ nu kɛ, “Wɔ awuke biala anu, nrenya ne a le kpanyinli a, yɛɛ ɔ nloa edwɛkɛ, bɛndu bɛndo.”