Read Nzema Ɛst 2 Bible Online

Ɛst 2 - Nzema bible

Ɛst 2

¹Nzinlii mɔɔ Belemgbunli Zɛzɛse ɛya ne dwole la, ɛnee ɔtɛkakye debie mɔɔ Vahyetae ɛyɛ la nee ɔdaye Zɛzɛse ye mɛla ne mɔɔ yebɔ ye nolo wɔ Vahyetae anwo wɔ ɛleka biala la.

²Yemɔti belemgbunli ne folɛdulɛma ne bie mɔ mɔɔ bikye ye kpalɛ la zuzule hilele ye kɛ, “Duzu ati a ɛmkpondɛ mbɛlɛra mɔɔ anwo yɛ fɛ kpalɛ la bie ɛ?

³Yeye mbɔlɔba wɔ maanle ye maanzinli ne mɔ anu maa bɛva mbɛlɛra mɔɔ anwo yɛ fɛ la amuala bɛrɛla Susa suakpole ye azo na fa bɛ wula Higae, mɔɔ le sonvolɛ nrenya ne mɔɔ nea wɔ mraalɛ ne mɔ anwo zo la asa anu; na bɛbɔ ɔ bo kɛ bɛkeha bɛ.

⁴Na akee fa bɛ nuhua ko mɔɔ ɛ nye die ɔ nwo la yɛ ye belemgbunli raalɛ sie Vahyetae agyakɛ anu.” Nzuzulɛ ɛhye zɔle belemgbunli ne anye, zɔhane ati ɔliele ɔdole nu na ɔyɛle.

⁵Dwuunli bie wɔ suakpole Susa azo, bɛfɛlɛ ye Mɔdekae. Ɔ ze a le Gyeeyɛɛ, Gyeeyɛɛ ɔ ze a le Hyemɛyae, yɛɛ Hyemɛyae ɔ ze a le Kɛhye mɔɔ vi Bɛngyaman abusua ekpunli ne anu la.

⁶ Mekɛ mɔɔ Belemgbunli Nɛbukadenɛza hyele Dwuda Belemgbunli Gyɛhɔyaken nee menli bie nuokɛ wɔ Gyɛlusalɛm na ɔ nee bɛ hɔle Babelɔn la, Mɔdekae boka nwolɛ.

⁷Mɔdekae awuvuanyi ara raalɛ a le Ɛseta mɔɔ eza bɛfɛlɛ ye Hadasa wɔ Hibulu nu la. Ɛseta le raalɛ mɔɔ anwo yɛ fɛ a, yɛɛ eza ɔgyi zolɛ sengɔɔnwo. Ɔ nli nee ɔ ze wule la, Mɔdekae a lile ye adane a, na ɔvale ye ɔyɛle kɛ ɔ kunlu ralɛ.

⁸Mekɛ mɔɔ belemgbunli ne nolo ne dwule maanle maanle ne mɔ anu ɛleka biala na bɛ nee mbɛlɛra ne mɔ ba Susa la, bɛvale Ɛseta noko bɛbokale nwolɛ. Ɔdaye noko bɛliele ye wɔ belemgbunli sua nu ɛkɛ na bɛvale ye bɛwulale Higae, mɔɔ nea belemgbunli sua nu ɛkɛ ne mraalɛ nu la asa anu.

⁹Higae anye liele Ɛseta anwo kpole na ɛkɛ ne ala ɔbɔle ye ɛhehanlɛ bo. Eza ɔmanle ye nwolɛ aleɛ kpalɛ. Higae eza manle ye ɛleka kpalɛ wɔ belemgbunli sua nu ɛkɛ ne mraalɛ nu, na ɔkpale nu ɔyele mbɛlɛra nsuu wɔ suakunlu ɛkɛ ne kɛ bɛzonle Ɛseta.

¹⁰Mɔdekae bɔle Ɛseta anloa, yemɔti Ɛseta angile ɔ nwo kɛ ɔle Dwuunli.

¹¹Na Mɔdekae lile belemgbunli sua nu ɛkɛ ne mraalɛ nu anuhɔlɛ ne anyunlu akɔneaba dahuu, kɛ ɔnea kɛ Ɛseta te kpɔkɛ nee debie mɔɔ bazi ɔ nwo zo la.

¹²Bɛvale siane bulu nee nwiɔ a bɛhehanle mbɛlɛra ne mɔ a. Bɛvale siane nsia bɛkpokpale bɛ aabɛya nwole yɛɛ bɛvale siane nsia bɛkpokpale bɛ sakyeɛ. Mekɛ ne dwule la, bɛvale mbɛlɛra ne mɔ bɛhɔle Belemgbunli Zɛzɛse ɛkɛ ne ngoko.

¹³Saa bɛlɛra ne bahɔ belemgbunli ne ɛkɛ a, ɔsiezie ɔ nwo, kɛmɔ ɔdaye ɔkulo la na ɔvi belemgbunli sua nu ɛkɛ ne mraalɛ nu yeahɔ suakunlu ɛkɛ.

¹⁴Ɔkɔ nɔsolɛ nu na ɔba nwonlomɔ a, bɛfa ye bɛkɔ ɛleka mɔɔ belemgbunli mgbɔnla ne mɔ wɔ la. Ɛleka ɛhye, sonvolɛ mɔɔ nea ɛkɛ ne la a le Hyeeyahyegaze. Saa bɛlɛra mɔɔ kɛhɔ belemgbunli ɛkɛ ne la sia ba a, ɔngɔ bieko, kyesɛ belemgbunli ne anye liele ɔ nwo. Saa ɔba ye zɔhane a belemgbunli ne soa maa bɛkɔfɛlɛ ye.

¹⁵Mekɛ dwule kɛ akee ɔwɔ kɛ Ɛseta ɔdaye ɔkɔ belemgbunli ne ɛkɛ ne. Bɛfɛlɛ Ɛseta ɔ ze Abeheli. Abeheli awozoa a le Mɔdekae mɔɔ Ɛseta ɛyɛ ɔdaye ɔ kunlu ralɛ la. Mekɛ ne dwule la, ɛnee awie biala mɔɔ anye kɛbɔ Ɛseta anwo zo la kulo ye. Higae, mɔɔ le sonvolɛ ne mɔɔ nea mbɛlɛra ne mɔ anwo zo la dule Ɛseta folɛ; yeammaa yeanziezie ɔ nwo kpalɛ biala.

¹⁶Belemgbunli Zɛzɛse lile ɛvolɛ nsuu wɔ ebia ne azo la, ye siane ne mɔɔ tɔ zolɛ bulu mɔɔ bɛfɛlɛ ye “Tibɛte” la anu yɛɛ bɛvale Ɛseta bɛhɔle ye suakunlu ɛkɛ ne a.

¹⁷Belemgbunli ne hulole Ɛseta dɛlale mbɛlɛra ne mɔ amuala, na ɔhulole ye edwɛkɛ ɔdɛlale raalɛ biala mɔɔ ɛra ye suakunlu ɛkɛ ne la. Yemɔti ɔvale belemgbunli kyɛlɛ ne ɔzoale ye na ɔyɛle ye Belemgbunli Raalɛ ɔziele Vahyetae agyakɛ anu.

¹⁸Akee Belemgbunli Zɛzɛse dole ɛkponle kpole bie manle Ɛseta na ɔdole ɛsalɛ ɔvɛlɛle ye maanle mgbanyima nee ye mbɔlɔba ne mɔ amuala. Mekɛ ne anu belemgbunli ne gyakyile ye adwule mɔɔ ɔdie ɔfi ye maanle maanle ne mɔ lɔ la anu ekyii na ɔvale ahyɛlɛdeɛ dɔɔnwo ɔmanle menli.

¹⁹Mekɛ dwule mɔɔ bɛboɔboale mbɛlɛra mɔɔ ɛnze mrenya la anloa bieko la, ɛnee Mɔdekae wɔ belemgbunli ne gyima nu,

²⁰noko Ɛseta ɛdeɛ ɛnee ɔtɛkilele ɔ nwo yɛɛ ɔtɛkilele maanle holɛ ko nee menli mɔɔ ɔvi bɛ nuhua la. Ɔyɛle ɛhye, ɔluakɛ ɛnee Mɔdekae ɛbɔ ɔ nloa yɛɛ Ɛseta noko yɛle tieyɛ manle Mɔdekae, kɛmɔ ɔde na yeara belemgbunli sua nu la.

²¹Mekɛ mɔɔ ɛnee Mɔdekae wɔ gyima nu la, sinzavolɛma nwiɔ mɔɔ nea nwolodo ne mɔɔ kɔ belemgbunli suakunlu ɛkɛ ne la hɔle Belemgbunli Zɛzɛse ati akpamo kɛ bɛku ye. Sinzavolɛma nwiɔ ne a le Begeteena nee Tilɛhye.

²²Mɔdekae dele ɛhye anwo bie, ɔfetele zolɛ ɔhilele Belemgbunli Raalɛ Ɛseta, na Ɛseta hanle hilele belemgbunli ne.

²³Belemgbunli Zɛzɛse manle bɛnleɛnleanle edwɛkɛ ne anu, na bɛnwunle kɛ amgba edwɛkɛ ne le nɔhalɛ. Zɔhane ati bɛhunle sinzavolɛma nwiɔ ne na bɛhɛlɛle mɔɔ zile la buluku nu bɛdole ɛkɛ.