Read Nzema Ɛst 3 Bible Online

Ɛst 3 - Nzema bible

Ɛst 3

¹Nzinlii Belemgbunli Zɛzɛse yɛle nrenya bie mɔɔ bɛfɛlɛ ye Heeman, mɔɔ vi Agage abusua nu na ɔ ze a le Hamɛdeeta la sonvolɛ kpanyinli ɔmanle ɔdɛlale ye suakunlu ɛkɛ ne mgbanyima ne mɔ amuala.

²Sonvolɛma mɔɔ wɔ suakunlu ɛkɛ ne la amuala bɔle bɛ ti aze manle ye, kɛmɔ belemgbunli ne hanle kɛ bɛyɛ la. Na Mɔdekae ɛdeɛ, yeangoto Heeman ɛlɛ.

³Sonvolɛma mɔɔ wɔ suakunlu ɛkɛ ne la bizale Mɔdekae kɛ, “Duzu ati a ɛnli belemgbunli ne mɛla ne azo a?”

⁴Bɛbizale ye nwolɛ edwɛkɛ fane dɔɔnwo, noko yeandɛne bɛ zo. Dahuu ye edwɛkɛ a le kɛ, “Mame, mele Dwuunli.” Ɛhye ati bɛbɔle Heeman amaneɛ, amaa bɛanlea kɛ saa edwɛkɛ ne kɔda Heeman anyunlu a Mɔdekae kɛva ɔ nwo dwɔɔ.

⁵Heeman nwunle kɛ Mɔdekae amgba ɛmbɔ ɔ ti aze ɛmmaa ye, na ɛya hunle ye kpole.

⁶Noko yeangulo kɛ ɔkɛhu Mɔdekae angome. Kɛmɔ bɛmaa yede kɛ Mɔdekae le Dwuunli la ati, ɔhulole kɛ ɔkɛhu Dwuuma amuala mɔɔ wɔ Belemgbunli Zɛzɛse maanle ne anu la.

⁷Belemgbunli Zɛzɛse lile ebia ne la, ye ɛvolɛ bulu nee nwiɔ ne azo, ye siane ne mɔɔ lumua mɔɔ bɛfɛlɛ ye “Naesan” la anu, Heeman manle bɛhwenle adunyi. Adunyi ɛhwenlɛ ne, Hibulu nu bɛfɛlɛ ye “Pulu.” Saa bɛbahwe adunyi ne anzɛɛ “Pulu” ne a, Heeman batɛnla ye ebia nu. Siane ko biala anu, kenle ko biala bɛtwe ɔ ti adunyi; na bɛhwenle dedee la ɔkpulale siane bulu nee nwiɔ ne mɔɔ bɛfɛlɛ ye “Eda” la anu kenle bulu nee nsa ne. Na kenle ɛhye yɛɛ ɔwɔ kɛ bɛfa bɛdi Dwuuma anwo gyima mɔɔ le zɛhae la a.

⁸Akee Heeman hanle hilele Belemgbunli Zɛzɛse kɛ, “Menli bie mɔɔ bɛdabɛ asolo bɛ amaamuo la ɛde ɛkponde wɔ maanle maanle mɔɔ ɛsie bɛ la amuala anu. Bɛnli wɔ mɛla ɛdeɛ ne azo. Ɛhye ati ɔnle kpalɛ kɛ belemgbunli kɛlie bɛ wɔ ye maanle ye anu.

⁹Saa ɛ nee me kɛyɛ adwenle a, anrɛɛ mese ɛyɛ ye mɛla ɛmaa bɛhu bɛ muala. Ɛkponle ɛhye azo a, mebadua dwɛtɛ fufule ‘talɛnte’ apenle bulu meamaa menli mɔɔ nea belemgbunli ne gyima zo la, amaa bɛava bɛagua wɔ gya ne anu.”

¹⁰Yemɔti belemgbunli ne yele ɔ sa kpɔdelera ne mɔɔ ɔfa ɔsi kɛlata zo ɔyɛ mɛla la ɔmanle Agagenli Heeman, mɔɔ le Hamɛdeeta ara nrenya ne mɔɔ kpɔ Dwuuma la,

¹¹na ɔzele ye kɛ, “Menli ne wɔ ɛ sa nu. Ezukoa ne le wɔ ɛdeɛ. Mɔɔ ɛnea a ɔfɛta bɛ la, fa yɛ bɛ.”

¹²Wɔ siane ne mɔɔ lumua la anu, ye kenle bulu nee nsa ne azo, Heeman manle bɛyiale belemgbunli ne kɛlɛhɛlɛvolɛma ne mɔ na ɔmanle bɛhɛlɛle mɛla mɔɔ yeli la anwo ngɛlata kɛ bɛva bɛhɔmaa mgbanyima mɔɔ le kɛ safohyenlema, amɛnladoma, yɛɛ arane mbɔlɔba mgbanyima ne mɔ amuala. Maanle ko biala anu amra kɛlata ɛdeɛ ne bɛhɛlɛle ye wɔ bɛdabɛ bɛ aneɛ nee bɛ ɛhɛlɛndenle nu. Bɛhɛlɛle ngɛlata ne mɔ wɔ Belemgbunli Zɛzɛse duma nu.

¹³Bɛvale ngɛlata ne mɔ bɛzoanle menli mɔɔ kola nriandi kpalɛ la a hɔle a. Ngɛlata ne mɔ kile kɛ bɛhu Dwuuma, ngakula nee mgbanyinli, yɛɛ mraalɛ kɔsɔɔti na bɛbɔ bɛ bo zo, na bɛve bɛ ninyɛne. Ngɛlata ne kile kɛ bɛva kenle ko ala a bɛyɛ ɛhye mɔ a, na bɛyɛ ye wɔ siane bulu nee nwiɔ ne mɔɔ bɛfɛlɛ ye “Eda” la ye kenle ne mɔɔ tɔ zolɛ bulu nee nsa ne la azo.

¹⁴Bɛhyehyɛle kɛ bɛbɔ mɛla ɛhye nolo wɔ maanle biala anu bɛmaa menli ne amuala ɛde, na bɛaboɔboa bɛ nwo.

¹⁵Menli mɔɔ bɛzoanle bɛ la manle bɛ nwo yɛle ndɛ bɛhɔle na eza bɛbɔle mɛla ne nolo wɔ Susa mɔɔ le maanle maanle ne suakpole la azo. Akee belemgbunli ne nee Heeman dɛnlanle aze nlonle, liele bɛ nye, noko wɔ Susa suakpole ne azo ɛdeɛ, ɛnee menli adwenle ɛzɛkye kpalɛ.