Read Nzema Ɛst 4 Bible Online

Ɛst 4 - Nzema bible

Ɛst 4

¹Mekɛ mɔɔ Mɔdekae dele edwɛkɛ mɔɔ ɛzi la, ɔsuosuanle ye tɛladeɛ ne mɔɔ ɔwula la anu, na ɔvale ɛrele ɔhedale, na ɔvale nzonle ɔbɔle ɔ nwo, na akee ɔvale ɛzunlɛ ɔyele awolɛ ɔdudule gua toonwo ɔhɔdwule suakpole ne avinli lɔ.

²Ɔhɔle toonwo ɔhɔle belemgbunli ne anuhɔlɛ kpole ne anloa, noko yeanwolo nu, ɔluakɛ bɛngeda ɛrele bɛngɔ suakunlu ɛkɛ ne.

³Maanle ne anu ɛleka biala mɔɔ bɛkɛde belemgbunli ne nolo ne la, Dwuuma mɔɔ wɔ ɛkɛ ne la di nyane kpalɛ, bɛdi buada, na bɛsu bɛye awolɛ. Bɛ nuhua dɔɔnwo bɔbɔ fa nzonle bɔ bɛ nwo na bɛkeda ɛrele bɛda.

⁴Mɔɔ Ɛseta sonvolɛ mraalɛ nee mrenya ne mɔ nwunle mɔɔ Mɔdekae ɛlɛyɛ la, bɛhanle bɛhilele ye, na ye adwenle zɛkyele. Ɛhye ati ɔvale adɛladeɛ kɛ bɛva bɛhɔmaa Mɔdekae ɛwula na ɔkpa ɛrele ne ɔgua, noko Mɔdekae anlie.

⁵Akee Ɛseta vɛlɛle Hatakye, mɔɔ le sonvolɛ nrenya mɔɔ belemgbunli ne ɛye ye kɛ ɔzonle Ɛseta la, na ɔzoanle ye kɛ ɔhɔbiza Mɔdekae deɛ holɛ ko mɔɔ ɔlɛyɛ la abo, nee kɛ ɔyɛle mɔɔ ɔrale ye zɔhane la.

⁶Hatakye hɔle Mɔdekae anwo ɛkɛ wɔ suakpole ne ɛleka wienyi ne mɔɔ bɛyia la, wɔ belemgbunli sua ne anyunlu ɛkɛ.

⁷Mɔdekae hanle mɔɔ ɛzi ɔ nwo zo la amuala hilele ye nee ezukoa mɔɔ Heeman ɛbɔ ɛwɔkɛ kɛ saa bɛku Dwuuma amuala a ɔkɛdua ɔkɛgua belemgbunli ne gya nu la ɔhilele ye.

⁸Mɔdekae eza vale nolobɔlɛ kɛlata ne mɔɔ bɛva bɛdo gua wɔ Susa mɔɔ kile kɛ bɛhu Dwuuma bɛbɔ bɛ bo zo la bie manle Hatakye kɛ ɔva ɔhɔmaa Ɛseta, na ɔhile nuhua ɔhile ye. Ɔzele Hatakye kɛ ɔze Ɛseta kɛ ɔdaye noko ɔhɔnwu belemgbunli na ɔbodo ye ɔmaa ɔnwu ye menli ne anwunvɔne.

⁹Hatakye yɛle ɛhye,

¹⁰na Ɛseta vale nrɛlaleɛ manle Hatakye kɛ ɔva ɔhɔmaa Mɔdekae kɛ,

¹¹“Mɛla mɔɔ wɔ suakunlu ɛke la a le kɛ, awie biala, nrenya o, raalɛ o, mɔɔ bɛanvɛlɛ ye na ɔkɛwolo belemgbunli suakunlu ɛkɛ ne kɛ ɔkanwu ye la, ɔwɔ kɛ bɛku ye. Awie biala, ɛbɔ ye belemgbunli folɛdulɛma anwo zo toonwo badwu menli mɔɔ wɔ maanle ye maanzinli ne mɔ kɔsɔɔti anu la, ze mɛla ɛhye. Kyesɛ sonla mɔɔ belemgbunli ne kɛkpogya ye tumi nvutuke kpɔma ne zo kɛhile ye la, yɛɛ kɛnyia ɔ ti a. Na mame noko, ye siane ko ɛne, belemgbunli ɛtɛfɛlɛle me.”

¹²Mɔdekae dele Ɛseta nrɛlaleɛ ne la,

¹³ɔmanle bɛhɔbɔle ye kɔkɔ: ɔse, “Mmadwenle kɛ ɛwɔ belemgbunli sua nu la ati, mɔɔ bazi Dwuuma anwo zo la bakpa ɛ ti.

¹⁴Saa ɛyɛ koonwu wɔ mekɛ ɛhye anu a, moalɛ vi anwuma bara amaa Dwuuma anyia bɛ ti, noko wɔmɔ, ɛbawu na ɛ ze abusua ne abɔ tɔɔ. Noko akee, nwane a ze a? Bie a ɛnee edwɛkɛ mɔɔ le kɛ ɛhye mɔ la ati yɛɛ wɔrayɛ belemgbunli raalɛ a.”

¹⁵Ɛseta vale mualɛ hɔmanle Mɔdekae kɛ,

¹⁶“Kɔ na kɔboɔboa Dwuuma mɔɔ wɔ Susa ɛke la amuala anloa, maa bɛhye ɛhɔne na bɛzɛlɛ bɛmaa me. Bɛmmadi debie biala yɛɛ bɛmmano nzule toonwo kenle nsa. Me nee me sonvolɛ mraalɛ ne mɔ yɛdayɛ yɛbayɛ zɔhane ala. Ɛhye anzi, mebahɔ belemgbunli ɛkɛ. Ɛhye tia mɛla ne bɔbɔ ɛdeɛ, noko saa ɔlua ɛhye ati na ɔwɔ kɛ mewu a, menwɔwu.”

¹⁷Akee Mɔdekae hɔle na ɔhɔyɛle debie biala mɔɔ Ɛseta zele ye la.