Read Nzema Ɛst 5 Bible Online

Ɛst 5 - Nzema bible

Ɛst 5

¹Kenle nsa ne dwule la, Ɛseta wulale ye belemgbunli raalɛ tɛladeɛ ne na ɔhɔgyinlanle suakunlu ɛkɛ ne alie ne anwo, ɛleka mɔɔ nee belemgbunli asalo kpole ne anye bɔ zolɛ la. Mekɛ ne anu ɛnee belemgbunli ne de ye ebia nu wɔ ye sua ne anu, ɛleka mɔɔ nee suakunlu ɛkɛ ne anuhɔlɛ ne anye bɔ zolɛ la.

²Belemgbunli ne nwunle Belemgbunli Raalɛ Ɛseta kɛ ɔgyi alie ne anwo la, ɔ nye liele, na ɔkpogyale ye tumi ezukoa nvutuke kpɔma ne ati zo ɔhilele ye. Ɛseta dudule agyakɛ hɔle ɔ nyunlu na ɔvale ɔ sa ɔhɔhanle belemgbunli tumi kpɔma ne ati.

³Belemgbunli ne bizale ye kɛ, “Belemgbunli Raalɛ Ɛseta, duzu ɔ? Duzu a ɛkpondɛ a? Saa ɛkpondɛ me maanle ye foa ko bɔbɔ a, ɛ sa baha ye.”

⁴Ɛseta buale ye kɛ, “Nana, mesɛlɛ wɔ, saa mekola ye ka a anrɛɛ mese saa ɛkulo a ɛ nee Heeman bɛrɛla me ɛkɛ ɛnɛ nɔsolɛ na meyɛ debie mezie wɔ na bɛrakpula bɛ sa.”

⁵Belemgbunli zele kɛ, “Bɛhɔvɛlɛ Heeman bɛmaa ɔrɛla ndɛndɛ, na yɛhɔ Ɛseta ɛvɛlɛlɛ ne.” Zɔhane ati belemgbunli ne nee Heeman hɔle Ɛseta ɛkponle ne mɔɔ ɔdole ɔmanle belemgbunli ne la abo.

⁶Mekɛ mɔɔ ɛnee bɛwɔ zolɛ bɛlɛno nwanye la, belemgbunli bizale Ɛseta kɛ, “Duzu a ɛkpondɛ a? Debie mɔɔ ɛkpondɛ la, mebayɛ meamaa wɔ. Duzu a ɛkpondɛ a? Saa ɛkulo me belemgbunli maanle ye foa ko bɔbɔ a, mebava meamaa wɔ.”

⁷Ɛseta buale kɛ, “Debie mɔɔ mehyia nwolɛ na mekpondɛ kɛ ɛyɛ ɛmaa me la yemɔ a le kɛ

⁸saa me nyunlu ɛra anyia wɔ Nana anyunlu, na mɔɔ mekulo na mekpondɛ kɛ Nana yɛ maa me la ɔkɛyɛ ɛdeɛ a, ɛnee ɛhyema nɔsolɛ Nana nee Heeman bɛrɛla bɛrakpula bɛ sa wɔ ɛke na menye edwɛkɛ ne mɔɔ Nana ɛbiza me la anloa.”

⁹Kenle ko zɔhane Heeman vale anyelielɛ nee fɛlɛko ngome a hɔle a. Na mɔɔ ɔkɔ na ɔnwunle Mɔdekae wɔ suakunlu ɛkɛ ne anuhɔlɛ ne, na yeandwazo, yɛɛ ye ahonle amkputi ye bɔbɔ la, ɔvale Mɔdekae anwo ɛya kpole.

¹⁰Noko Heeman zɔle ɔ nwo, yeanga edwɛkɛ biala na ɔhɔle sua nu. Ɔdwule sua nu la, ɔzoanle ɔmanle bɛhɔvɛlɛle ɔ gɔnwo mɔ nee ɔ ye Zilɛhye.

¹¹Bɛrale la, Heeman sosɔle zolɛ hanle ɔ nwo mɔɔ yenyia ye kpole, ɔ mra dodo mɔɔ yewo bɛ, yɛɛ ɔ nyunlu mɔɔ belemgbunli ne ɛmaa yenyia wɔ gyima nu yeva yewula ɔdaye Heeman anyunlunyia la amuala ɔhilele bɛ. Eza ɔhanle kɛ belemgbunli ɛzi ɛmaa ye dibilɛ yedɛla amɛnladoma nee sonvolɛma amuala mɔɔ wɔ suakunlu ɛkɛ ne la ɔhilele bɛ.

¹²Akee ɔvale ɔzɔle zolɛ kɛ, “Belemgbunli Raalɛ Ɛseta ammaa awie biala adenle ammaa ɔ nee belemgbunli ne amba ɛkponledolɛ ne bie kɛ medame me ngomekye ala. Eza yedo ɛsalɛ yevɛlɛ me nee belemgbunli ne kɛ ɛhyema yɛrɛla.

¹³Noko ɛhye mɔ amuala biala ɛnyɛ me fɛ, ɔluakɛ Dwuunli Mɔdekae ɔdaye kɛ dahuu ɔde suakunlu anuhɔlɛ ɛkɛ ne ala ɛne.”

¹⁴Ɔ nloa penle la, ɔ ye Zilɛhye nee ɔ gɔnwo mɔ zuzule hilele ye kɛ, “Na maa bɛziezie ɛzinzelɛ ɛhuleka, mɔɔ ye anwumahɔlɛ bayɛ mita abulanwiɔ nee nwiɔ la na ɛhyema nwonlomɔ ka kile belemgbunli ne maa ɔmaa bɛzinze Mɔdekae wɔ zolɛ bɛhu ye ɛ? Ɛyɛ ɛhye ɛwie a, akee wɔava anyelielɛ wɔahɔ ɛkponledolɛ ne abo.” Heeman liele dole nuhua, na amgba noko ɔmanle bɛzieziele ɛzinzelɛ ɛhuleka ne.