Read Nzema Ɛst 8 Bible Online

Ɛst 8 - Nzema bible

Ɛst 8

¹Kenle ko zɔhane Belemgbunli Zɛzɛse vale Heeman mɔɔ le Dwuuma kpɔvolɛ ne la debie biala manle Belemgbunli Raalɛ Ɛseta. Akee Mɔdekae nyianle adenle wɔ belemgbunli sua nu ɛkɛ ne, ɔluakɛ ɛnee Ɛseta ɛha ɛhile belemgbunli ne kɛ ye awie a le Mɔdekae.

²Belemgbunli ne vale ye kpɔdelera ne mɔɔ ɔfa ɔsi kɛlata zo, mɔɔ ɔliele ɔvile Heeman ɛkɛ ne la manle Mɔdekae. Na Ɛseta yɛle Mɔdekae kpanyinli mɔɔ nea debie biala mɔɔ Heeman lɛ la azo.

³Akee Ɛseta dule dɔle belemgbunli ne agyakɛ anu, na ɔvale ɛzunlɛ ɔbodole ye kɛ ɔbɔ mɔdenle ɔye munzule kpole ne mɔɔ Agage anlɔnra Heeman ɛhyehyɛ ɛva Dwuuma amuala akɔme ɛwula nu la wɔ bɛ ti.

⁴Belemgbunli ne kpogyale ye tumi ezukoa nvutuke kpɔma ne ati zo hilele Ɛseta,

⁵na Ɛseta dwazole gyinlanle. Na ɔzele kɛ, “Awulae, mesɛlɛ wɔ, mmafa ɛya. Saa ɔyɛ wɔ ɛhulolɛ na mesɔ ɛ nye, na eza saa Nana ɔdaye ɔnea na ɔle kpalɛ ɛdeɛ a, ɛnee maa bɛhɛlɛ ɛ nloa edwɛkɛ bɛhɔpɛ Agage anlɔnra Heeman, mɔɔ le Hamɛdeeta ara ne ngɛlata ne mɔ mɔɔ ɔhɛlɛle kɛ ɔfa yeazɛkye Dwuuma amuala mɔɔ wɔ ɛke nee maanzinli ne mɔ amuala anu la anu.

⁶Ɔluakɛ menrɛhola munzule kpole ɛhye mɔɔ bazi me menli ne mɔ anwo zo la anloa gyinla, yɛɛ menrɛhola me nwo sɔ kɛ megyinla meanlea, wɔ mekɛ mɔɔ bɛlɛku me menli ne amuala bɛabɔ bɛ bo zo la.”

⁷Na Belemgbunli Zɛzɛse zele Belemgbunli Raalɛ Ɛseta nee Dwuunli Mɔdekae kɛ, “Bɛdie, meva debie biala mɔɔ le Heeman ɛdeɛ la memaa Ɛseta na memaa bɛzinze Heeman bɛhu ye, wɔ ye adwenle ɛtane ne mɔɔ ɔvale kɛ ɔku Dwuuma la ati.

⁸Na ɛdawɔ noko ɛze kɛ kɛlata mɔɔ bɛkɛva belemgbunli ne duma bɛkɛhɛlɛ na bɛkɛva ye kpɔdelera ne bɛkɛzi zolɛ la, bɛndwe bɛnzia, yɛɛ bɛmpɛ nuhua. Zɔhane ati bɛdabɛ bɛva belemgbunli ne duma bɛhɛlɛ mɔɔ bɛdabɛ bɛnea a bɛkulo kɛ Dwuuma yɛ la, bɛva belemgbunli ne kpɔdelera ne bɛzi zolɛ na bɛva bɛhɔmaa bɛ.”

⁹Siane nsa ne mɔɔ bɛfɛlɛ ye “Sivan” la ye kenle abulanwiɔ nee nsa ne azo, Mɔdekae vɛlɛle belemgbunli ne kɛlɛhɛlɛvolɛma ne mɔ na ɔhanle mɔɔ ɔkpondɛ kɛ bɛkɛlɛ wɔ Dwuuma anwo la ɔhilele bɛ. Bɛhɛlɛle edwɛkɛ ne bɛhɔmanle amɛnladoma, maanzinli zo neavolɛma, yɛɛ maanle maanle ɛya ko abulanwiɔ nee nsuu ne mɔɔ vi Yendea kɔkpula Yiteyopea la anu arelemgbunli. Bɛhɛlɛle kɛlata ne wɔ maanle ko biala ɔdaye ye aneɛ nee ye ɛhɛlɛndenle nu, yɛɛ akee bɛhɛlɛle Dwuuma mɔɔ wɔ maanle maanle ne mɔ anu la wɔ bɛdabɛ bɛ aneɛ nee bɛ ɛhɛlɛndenle nu.

¹⁰Mɔdekae manle bɛvale Belemgbunli Zɛzɛse duma a bɛhɛlɛle ngɛlata ne mɔ a, yɛɛ bɛvale belemgbunli ne kpɔdelera ne bɛsisile ngɛlata ne mɔ azo. Belemgbunli sonvolɛma mɔɔ tɛnla mgbɔnwɔ mɔɔ anwo yɛ ndɛ na bɛyɛne bɛ wɔ belemgbunli ne ɔdaye ye tunli nu la azo a hɔle a.

¹¹Ngɛlata ne mɔ manle Dwuuma mɔɔ wɔ suakpole biala azo la adenle kɛ bɛboɔboa bɛ nloa na bɛho bɛlie bɛ nwo. Ɛlɔne biala mɔɔ kɛra bɛ nwo zo wɔ menli anzɛɛ maanle biala anu la, bɛhu bɛ, bɛhu bɛ mra nee bɛ mraalɛ, bɛbɔ bɛ bo zo na bɛve bɛ ninyɛne.

¹²Ngɛlata ne mɔ kile kɛ, siane bulu nee nwiɔ ne mɔɔ bɛfɛlɛ ye “Eda” la, ye kenle bulu nee nsa ne azo, yɛɛ ɔwɔ kɛ ɛhye si wɔ Belemgbunli Zɛzɛse maanle maanle ne kɔsɔɔti anu a.

¹³Ɔwɔ kɛ bɛyɛ kɛlata ne mɔɔ bɛ sa baha ye maanzinli ne mɔ anu la anu edwɛkɛ ne mɛla; ɔwɔ kɛ bɛbɔ edwɛkɛ ne nolo bɛkile menli ne amuala na bɛmaa Dwuuma adenle bɛmaa bɛboɔboa bɛ nwo bɛ nee kpɔvolɛma ko die bɛ nwo.

¹⁴Zɔhane ati bɛmanle belemgbunli ne sonvolɛma ne vole mgbɔnwɔ mɔɔ anwo yɛ ndɛ kpalɛ la azo a hɔle a, wɔ belemgbunli ne ɔdaye ye duma nu. Bɛbɔle mɛla ɛhye nolo wɔ Susa, mɔɔ le maanle maanle ne suakpole la azo noko.

¹⁵Akee Mɔdekae vi belemgbunli sua nu finde a ɔwula belemgbunli tɛladeɛ buluwu nee fufule, na ɔsoa belemgbunli ezukoa nvutuke kyɛlɛ, na yeava dwɛsɛ ɛdanlɛ anye nwohyee nee kɔkɔlɛ kɛnlɛma bie yeagua zolɛ. Ɔvi belemgbunli sua nu ɔfinde a ɛnee awie biala anye ɛlie.

¹⁶Dwuuma mɔɔ wɔ suakpole ne azo la anwo dɔle bɛ, bɛlile fɛlɛko, bɛ nye liele, na awie biala lile bɛ eni.

¹⁷Wɔ maanzinli biala anu anzɛɛ suakpole biala azo mɔɔ belemgbunli ne kɛlata ne nee ye mɛla ne kɛdwu la, Dwuuma anye die, bɛdi fɛlɛko, bɛsie kenle bɛdie bɛ ɛnwomenle na bɛto ɛkponle. Menli dɔɔnwo noko mɔɔ wɔ maanle ne anu la zulole Dwuuma, na ɔlua zolɛ bɛhakyile bɛyɛle Dwuuma.