Read Nzema Ade 10 Bible Online

Ade 10 - Nzema bible

Ade 10

¹Akee Ɛdɛnkɛma zele Mosisi kɛ, “Kɔ belemgbunli ne ɛkɛ, ɔluakɛ memaa ye nee ye mgbanyima ne mɔ ahonle ɛyɛ se, amaa meahile bɛ me sɛkɛlɛneɛ ɛhye mɔ wɔ bɛ avinli,

²na wɔabɔ ye nolo wɔahile ɛ mra nee ɛ mra amra, kɛ menzile menyɛle Yigyibitima nee sɛkɛlɛneɛ mɔɔ menyɛle wɔ bɛ avinli la, na ɛdawɔ noko wɔanwu kɛ medame a mele Ɛdɛnkɛma a.”

³Yemɔti Mosisi nee Aalɔn hɔle belemgbunli ne ɛkɛ hɔzele ye kɛ, “Kɛ Ɛdɛnkɛma, Hibuluma Nyamenle ne se la ɛne, ‘Kenlenzu yɛɛ ɛkɛkpo kɛ ɛnrɛmemaa ɛ nwo zo ɛnrɛhile me a? Maa me menli ne ɛhɔ, amaa bɛazonle me.

⁴Saa ɛkpo na wɔammaa me menli ne angɔ a, ɛnee nea kɛ, ɛhyema mebamaa abɛbɛ arava wɔ maanle ne,

⁵na bɛaheda azɛlɛ ne azo bɔkɔɔ mɔɔ awie biala ɛnnwu azɛlɛ ne a. Bɛbali debie biala mɔɔ ezuawolɛ ne dɔle wiele na ɔhale la amuala; bɛbali aleɛ biala mɔɔ wɔ ɛbɔ nu la.

⁶Bɛbava wɔ, wɔ mgbanyima nee Yigyibitima kɔsɔɔti azua ne mɔ; na ɛhye, sumunli kɛ bɛ ze mɔ nee bɛ nlenya mɔ rale azɛlɛ ye azo toonwo mɔɔ yeradwu ɛnɛ la, bɛtɛnwunle bie ɛlɛ.’ ” Na Mosisi nee Aalɔn hakyile bɛ nwo hɔle.

⁷Belemgbunli ne mgbanyima ne mɔ hanle hilele ye kɛ, “Kenlenzu yɛɛ nrenya ɛhye kɛgyakyi yɛ ɛgyegyelɛ a? Maa menli ne ɛhɔ ɛ, amaa bɛazonle Ɛdɛnkɛma bɛ Nyamenle ne. Asoo ɛtɛnwunle kɛ Yigyibiti ɛbɔ bɔkɔɔ ɔ?”

⁸Yemɔti bɛhɔvale Mosisi nee Aalɔn bɛrale belemgbunli ne anyunlu, na ɔzele bɛ kɛ, “Bɛhɔzonle Ɛdɛnkɛma bɛ Nyamenle ne; na nwane mɔ a kɔ a?”

⁹Mosisi buale kɛ, “Yɛ nee ngakula nee mgbanyinli, yɛ mra mrenya nee mraalɛ, yɛ mboane nee yɛ nyɛmoa muala, ɔluakɛ ɔwɔ kɛ yɛdi ɛvoyia yɛwula Ɛdɛnkɛma anyunlunyia.”

¹⁰Na belemgbunli ne zele bɛ kɛ, “Meka Ɛdɛnkɛma kɛ menrɛmaa bɛ nee mraalɛ nee ngakula ne mɔ ɛnrɛhɔ fee. Bɛlɛ adwenle ɛtane wɔ bɛ ti anu.

¹¹Telekɔ![4] Maa mrenya ne mɔ angome ɛhɔzonle Ɛdɛnkɛma, ɔluakɛ ɛhye ala a ɛnee ɛkpondɛ a.” Na bɛvoanle Mosisi nee Aalɔn bɛvile belemgbunli ne anyunlu.

¹²Ɛdɛnkɛma zele Mosisi kɛ, “Maa ɛ sa zo wɔ Yigyibiti azɛlɛ ye azo maa abɛbɛ ɛrɛla ɛrali aleɛ biala mɔɔ wɔ azɛlɛ ne azo mɔɔ ezuawolɛ ne anzɛkye ye la.”

¹³Yemɔti Mosisi manle ɔ sa zo wɔ Yigyibiti azɛlɛ ne azo, na Ɛdɛnkɛma manle aduduleɛ anwoma dule azɛlɛ ne azo ewia ne nee nɔe ne; ye nwonlomɔ ne ɛnee aduduleɛ anwoma ne ɛmaa abɛbɛ ɛbu azɛlɛ ne azo.

¹⁴ Abɛbɛ ne mɔ rale Yigyibiti azɛlɛ ne azo, bɛvale maanle ne ɛleka biala na bɛbɔle bɛ nwo atɛnlase. Bɛ pinopino ɛdeɛ, bieko ɛtɛbale, yɛɛ bieko ɛnrɛra ɛlɛ.

¹⁵Bɛvale azɛlɛ ne bɔkɔɔ, na azɛlɛ ne azo yɛle fii kokye. Bɛlile aleɛ nee mbakama mɔɔ ezuawolɛ ne gyakyile la; debie amunli kokye bɔbɔ anga, yɛɛ nzoleɛ biala anga baka kpole anzɛɛ ekyi bɔbɔ azo wɔ ɛya anzɛɛ kpɔkɛ nu wɔ Yigyibiti maanle ne kɔsɔɔti anu.

¹⁶Na ndɛndɛ ne ala belemgbunli ne vɛlɛle Mosisi nee Aalɔn na ɔzele bɛ kɛ, “Meyɛ ɛtane metia Ɛdɛnkɛma bɛ Nyamenle ne nee bɛdabɛ.

¹⁷Yemɔti mesɛlɛ bɛ, bɛva me ɛtane ko ye bɛhyɛ me na bɛzɛlɛ Ɛdɛnkɛma bɛ Nyamenle ne kɛ ɔye ewule ɛhye ɔvi me nwo zo.”

¹⁸Yemɔti Mosisi vile belemgbunli ne anwo ɛkɛ na ɔhɔzɛlɛle Ɛdɛnkɛma.

¹⁹Na Ɛdɛnkɛma manle adɔleɛ anwoma ɛsesebɛ bie dule na ɔpiepianle abɛbɛ ne mɔ ɔhɔguale Suwɛze Ebolo[5] ne anu; kokye anga Yigyibiti maanle ne anu.

²⁰Na eza Ɛdɛnkɛma manle belemgbunli ne ahonle yɛle se bieko, yemɔti yeammaa Yizilayɛma angɔ.

²¹Akee Ɛdɛnkɛma zele Mosisi kɛ, “Tende ɛ sa anwomanyunlu maa awozinli kabikabi mɔɔ kɛde menli ne kpalɛ kpalɛ la ɛva Yigyibiti azɛlɛ ne.”

²² Yemɔti Mosisi dendenle ɔ sa anwomanyunlu na awozinli kabikabi vale Yigyibiti maanle ne kenle kɔkɔlɛ nsa.

²³Yigyibitinli biala annwu ɔ gɔnwo, yɛɛ Yigyibitinli biala anvinde toonwo kenle nsa. Na ɛleka mɔɔ Yizilayɛma de la ɛdeɛ, wienyi dale ɛkɛ.

²⁴Akee belemgbunli ne vɛlɛle Mosisi na ɔzele ye kɛ, “Bɛhɔ na bɛhɔzonle Ɛdɛnkɛma, bɛ nee bɛ mra nee bɛ mraalɛ ne mɔ kɔsɔɔti bɛhɔ. Na bɛgyakyi bɛ mboane nee bɛ nyɛmoa ne mɔ ɛke.”

²⁵Na Mosisi hanle kɛ, “Eza ɔwɔ kɛ yɛnyia azubɔdeɛ nee ɛyelalɛ azubɔdeɛ, amaa yɛava yɛabɔ azu yɛamaa Ɛdɛnkɛma yɛ Nyamenle ne.

²⁶Ɔwɔ kɛ yɛ nee yɛ nlankɛ ne mɔ kɔsɔɔti kɔ. Yɛnrɛgyakyi ɛnlankɛ gyakɛ mgbɔlaboa mgbane ko bɔbɔ ɛke. Ɔwɔ kɛ yɛnyia bɛ na yɛava yɛazonle Ɛdɛnkɛma yɛ Nyamenle ne. Yɛtɛnwunle debie mɔɔ ɔwɔ kɛ yɛfa yɛsonle Ɛdɛnkɛma a, kyesɛ yɛdwu nehane kolaa.”

²⁷Na Ɛdɛnkɛma manle belemgbunli ne ahonle yɛle se, yemɔti yeammaa bɛangɔ.

²⁸Akee belemgbunli ne zele ye kɛ, “Ɛvi me nyunlu ɛkɛ ne kɔ! Dwenle ɛ nwo, mmamaa menwu ɛ nyunlu bieko! Kenle biala mɔɔ menwɔnwu ɛ nyunlu la, ɛbawu!”

²⁹Mosisi hanle kɛ, “Kɛmɔ wɔha la, ɛnrɛnwu me nyunlu bieko.”