Read Nzema Ade 12 Bible Online

Ade 12 - Nzema bible

Ade 12

¹ Ɛdɛnkɛma zele Mosisi nee Aalɔn wɔ Yigyibiti azɛlɛ zo kɛ,

²“Siane ɛhye bayɛ bɛ siane mɔɔ lumua a; ɔbayɛ bɛ ɛvolɛ ne anu siane mɔɔ lumua la.

³Ka kile Yizilayɛma ɛlɔne ne amuala kɛ siane ɛhye, ye kenle mɔɔ tɔ zolɛ bulu la, nrenya biala nee ye awuke nu amra ɛva boane anzɛɛ abɔnkye ralɛ ko.

⁴Saa nane ne bo awuke ne anu amra anwo zo a, ɛnee awuke ngyikyi nwiɔ mɔɔ zua zolɛ la ɛbɔ nu ɛva ko mɔɔ kɛza menli ne di, kɛmɔ bɛ dodo de la.

⁵Ɔwɔ kɛ boane ne anzɛɛ abɔnkye ne yɛ nyinli mɔɔ anwo ɛnlɛ dɛne na yeli ɛvolɛ ko ala la.

⁶Bɛbava bɛazie toonwo siane ɛhye ye kenle bulu nee nna ne azo, akee Yizilayɛma kɔsɔɔti bahu bɛ mboane ne mɔ kenle ko ne nɔsolɛ nu.

⁷Bɛbava nane ne mogya ne bie bɛaha azua mɔɔ bɛkɛli nane ne wɔ nu la nlenkɛ ne felɛmo nwiɔ ne nee ɔ ti zo ɛdeɛ ne mɔ anwo.

⁸Bɛbava kpanwo mɔɔ mgbɔvonle ɛnle nu nee nya nya ɛnwonle bɛali nane ne ndondo.

⁹Bɛmmadi bie amolɛ anzɛɛ bɛmmato na bɛali. Bɛli ye ndondo, ɔ ti o, ye ndwɛlɛ o, ɔ kunlu ɔ kunlu ne mɔ o, bɛdondo.

¹⁰Bɛmmagyakyi bie bɛmaa aleɛ kye zolɛ. Biala mɔɔ aleɛ kɛhye zolɛ la, bɛyela ye.

¹¹Akee adenle mɔɔ bɛpe nu bɛli la ɛne: bɛhye bɛ adɛladeɛ ne mɔ azo, bɛwula bɛ mgbɔlaboa ne mɔ, na bɛva bɛ agbɔma ne mɔ bɛlɛ bɛ sa nu, na bɛli ye ndɛndɛ. Ɔle Ɛdɛnkɛma Akpabɛnwo Ɛvoyia.

¹²“Ɔluakɛ mebapɛ nu Yigyibiti azɛlɛ zo kenle ko ne nɔe ne. Mebahu Yigyibiti belamunli mralɛ muala, menli nee nyɛmoa, na meabua Yigyibiti awozonle kɔsɔɔti ndɛne. Medame a mele Ɛdɛnkɛma a.

¹³Mogya ne bayɛ azua mɔɔ bɛwɔ nu la sɛkɛlɛneɛ, ɛleka biala mɔɔ menwɔnwu mogya la, mebapɛ nu, amaa saa melɛku Yigyibitima a meangu bɛ.

¹⁴Kenle zɔhane bayɛ ngakyelɛ kenle amaa bɛ, na bɛbazie ye kɛ Ɛdɛnkɛma Ɛvoyia kenle. Awolɛndoazo kɔsɔɔti bazie kenle ne na bɛali ɛvoyia ne.”

¹⁵Ɛdɛnkɛma zele kɛ, “Bɛbali kpanwo mɔɔ mgbɔvonle ɛnle nu la kenle nsuu. Kenle ne mɔɔ lumua la, bɛye mgbɔvonle biala bɛvi bɛ azua nu, ɔluakɛ ɔvi kenle ne mɔɔ lumua la toonwo mɔɔ kɔdwu kenle nsuu ne la, saa awie biala di debie mɔɔ mgbɔvonle wɔ nu la a, bɛbaye ye bɛavi Yizilayɛma anu.

¹⁶Kenle ne mɔɔ lumua la, bɛyia na bɛzonle, yɛɛ kenle nsuu ne azo bɛyia na bɛzonle. Kenle nwiɔ zɔhane ɔnle kɛ bɛyɛ gyima, debie mɔɔ bɛdi la, yemɔ ala a ɔwɔ kɛ bɛyɛ a.

¹⁷Ɔwɔ kɛ bɛdi Angye Ɛvoyia ne, ɔluakɛ kenle ɛhye anu yɛɛ menyele bɛ muala menvile Yigyibiti azɛlɛ zo a. Yemɔti ɔwɔ kɛ bɛ awolɛndoazo kɔsɔɔti di ɛvoyia ɛhye.

¹⁸Siane ne mɔɔ lumua la anu kenle ne mɔɔ tɔ zolɛ bulu nee nna ne la nɔsolɛ nu toonwo mɔɔ kɔdwu kenle abulanwiɔ nee ko ne azo nɔsolɛ nu la, bɛbali kpanwo mɔɔ mgbɔvonle ɛnle nu la.

¹⁹Kenle nsuu ne anu, bɛmmafa mgbɔvonle bɛsie bɛ azua nu, ɔluakɛ awie biala mɔɔ kɛli debie mɔɔ mgbɔvonle wɔ nu la, saa ɔle ɛyɛvolɛ o, anzɛɛ ekulomeni o, bɛbaye ye bɛavi Yizilayɛma avinli. Bɛmmadi debie biala mɔɔ bɛwula ye mgbɔvonle la. Ɛleka biala mɔɔ bɛwɔ la, bɛli kpanwo mɔɔ mgbɔvonle ɛnle nu la.”

²⁰

²¹Akee Mosisi vɛlɛle Yizilayɛ mgbanyima ne mɔ amuala na ɔhanle ɔhilele bɛ kɛ, “Awie biala ɛhɔhye boane ko ɛhu ye ɛmaa ye awuke nu amra ɛva ɛli Akpabɛnwo ne.

²²Bɛva nyinlanyinla bɛbɔ boane mogya ne mɔɔ wɔ kyɛnze ne anu la anu, na bɛva bɛha bɛ felɛmo ne mɔ ati zo nee bɛ mbaka nwiɔ ne anwo, yɛɛ bɛ biala mmafinde toonwo nwonlomɔ.

²³ Ɔluakɛ Ɛdɛnkɛma barapɛ nuhua yeahɔhu Yigyibitima. Saa ɔnwu mogya ne mɔɔ wɔ felɛmo ne anwo la a ɔbapɛ nuhua; ɔnrɛmaa sɛkyevolɛ ne ɛnrɛwolo bɛ azua nu ɛnrɛhu bɛ.

²⁴Bɛbali mɛla ɛhye azo kɛ ɔle mɛla mɔɔ ɔwɔ ɛkɛ ne dahuu ɔmaa bɛ nee bɛ bo zo amra a.

²⁵Saa bɛdwu azɛlɛ ne mɔɔ Ɛdɛnkɛma ɛva ɛbɔ bɛ ɛwɔkɛ la azo a, bɛyɛ ɛzonlenlɛ ɛhye.

²⁶Na saa bɛ mra biza bɛ kɛ, ‘Ɛzonlenlɛ ɛhye abo a le duzu?’ a,

²⁷bɛze bɛ kɛ, ‘Ɔle Ɛdɛnkɛma Akpabɛnwo azubɔlɛ, ɔluakɛ mekɛ mɔɔ ɔku Yigyibitima na ɔdwule Yizilayɛma azua nu la, ɔpɛle nuhua.’ ” Na menli ne bɔle bɛ ti aze zonlenle.

²⁸Na kɛmɔ Ɛdɛnkɛma zele Mosisi nee Aalɔn la, zɔhane ala yɛɛ Yizilayɛma yɛle a.

²⁹Alevinli mu nwiɔ avinli Ɛdɛnkɛma hunle belamunli mralɛ kɔsɔɔti mɔɔ wɔ Yigyibiti azɛlɛ zo la, ɔvi belemgbunli ne mɔɔ de ebia ne azo la belamunli ralɛ ne anwo zo toonwo kɔdwu sonla mɔɔ la efiade la belamunli ralɛ ne anwo zo; ɔhunle nyɛmoa kɔsɔɔti amra mɔɔ lumua la.

³⁰Na belemgbunli nee ye mgbanyima nee Yigyibitima amuala dwazole nɔe ne zunle yele awolɛ, ɔluakɛ awuke biala ɛnle ɛkɛ mɔɔ awie anwu nuhua a.

³¹Na belemgbunli ne vɛlɛle Mosisi nee Aalɔn nɔe ne na ɔzele bɛ kɛ, “Bɛha bɛ nwo bɛhɔ, bɛdabɛ nee Yizilayɛma kɔsɔɔti, bɛvi me menli Yigyibitima avinli bɛhɔ; bɛhɔzonle Ɛdɛnkɛma, kɛmɔ bɛdabɛ bɛha la.

³²Bɛva bɛ nlankɛ nee bɛ nyɛmoa kɔsɔɔti bɛhɔ. Anrɛɛ bɛzɛlɛ bɛmaa medame noko.”

³³Yigyibitima hanle Yizilayɛma nu kɛ bɛmaa bɛ nwo ɛyɛ ndɛ bɛvi maanle ne anu; ɔluakɛ bɛse, “Anrɛɛ yɛ kɔsɔɔti yɛyɛ avunli ala ɛne.”

³⁴Yemɔti menli ne mɔ kyekyele bɛ ɛdɔkɛ ne mɔ mɔɔ mgbɔvonle ɛnle nu la nee bɛ ahyɛnze mɔɔ bɛfa bɛto kpanwo la wɔ ndanlɛ nu guale bɛ kɔme zo.

³⁵ Ɛnee Yizilayɛma ɛyɛ mɔɔ Mosisi hanle hilele bɛ la. Bɛbizale Yigyibitima bɛliele dwɛtɛ fufule nee ezukoa nvutuke anwoneɛ nee ndanlɛ.

³⁶Ɛnee Ɛdɛnkɛma ɛmaa Yizilayɛma anyunlu ɛra anyia wɔ Yigyibitima anyunlu, yemɔti debie biala mɔɔ bɛbizale la, Yigyibitima vale manle bɛ. Ɛhye manle bɛkpokpole Yigyibitima bɔkɔɔ.

³⁷Yizilayɛma vi Relamɛsizi maanzinli nu zile nu hɔle Sɛko. Bɛkɛyɛ menli apenle ngoko ɛya nsia, bɛandia mraalɛ nee ngakula bɛamboka nwolɛ.

³⁸Menli gyɛne gyɛne dɔɔnwo nee bɛ hɔle; bɛvale bɛ nlankɛ, mboane yɛɛ mbɔnkye noko bɛhɔle.

³⁹Bɛloale ɛdɔkɛ ne mɔɔ bɛanwula ye mgbɔvonle, mɔɔ bɛ nee ye vi Yigyibiti la tata. Bɛanwula ye mgbɔvonle, ɔluakɛ bɛdule bɛ arɛlevilɛ nu, bɛannyia adenle bɛanva aleɛ biala bɛanzia bɛ nwo.

⁴⁰ Mekɛ dodo mɔɔ Yizilayɛma lile wɔ Yigyibiti la le ɛvolɛ ɛya nna abulasa.

⁴¹Na kenle ko ne mɔɔ tɔ zolɛ a ɔyɛ ɛvolɛ ɛya nna abulasa ne la, kenle ko zɔhane a Yizilayɛma ɛwolaa ne kɔsɔɔti vile Yigyibiti azɛlɛ zo a.

⁴²Kenle ko ne nɔe ne Ɛdɛnkɛma zinzale ye menli ne manle bɛvile Yigyibiti azɛlɛ zo. Yemɔti wɔ bɛ awolɛndoazo muala anu, saa ɔdwu kenle zɔhane nɔɔzo a, Yizilayɛma kɔsɔɔti si epe ye Ɛdɛnkɛma ayɛlɛ.

⁴³Na Ɛdɛnkɛma zele Mosisi nee Aalɔn kɛ, “Akpabɛnwo ne anwo ngyehyɛlɛ ɛne: Ɛyɛvolɛ biala ɛnli ye aleɛ ne bie,

⁴⁴noko kanranli biala mɔɔ bɛva ezukoa bɛdɔ ye la, saa bɛyɛ ye mrenyanu nzonlɛ a ɔdi aleɛ ne bie.

⁴⁵Adendulɛnli anzɛɛ ɛkpanli biala ɛnli aleɛ ne bie.

⁴⁶ Awuke ko mɔɔ bɛkɛdo aleɛ ne wɔ nu la, ɔwɔ kɛ bɛdi ɔ muala wɔ nu; ɔnle kɛ bɛfa bie bɛpɛ gua, yɛɛ bɛmmabɔ bowule biala anu.

⁴⁷Ɔwɔ kɛ Yizilayɛma kɔsɔɔti di ɛvoyia ne.

⁴⁸Saa sonla gyɛne bie nee bɛ rale na ɔkulo kɛ ɔdi ɛvoyia ne bie a, ɔwɔ kɛ nrenya biala mɔɔ wɔ ye awuke nu ɛkɛ ne la yɛ ye mrenyanu nzonlɛ kolaa na yeabikye bɛ yeali ɛvoyia ne bie; ɛnee yeyɛ kɛ sonla mɔɔ vi maanle ne anu la. Awie biala mɔɔ bɛtɛyɛle ye mrenyanu nzonlɛ la, ɔnle kɛ ɔdi bie.

⁴⁹Mɛla ko ne ala a wɔ ɛkɛ maa sonla mɔɔ vi maanle ne anu nee ɛyɛvolɛ mɔɔ nee bɛ rale la a.”

⁵⁰Ɛhye yɛɛ Yizilayɛma yɛle a; kɛmɔ Ɛdɛnkɛma zele Mosisi nee Aalɔn la, zɔhane ala a bɛyɛle a.

⁵¹Na kenle ko zɔhane, Ɛdɛnkɛma yele Yizilayɛma ɛwolaa ne vile Yigyibiti azɛlɛ zo.