Read Nzema Ade 14 Bible Online

Ade 14 - Nzema bible

Ade 14

¹Akee Ɛdɛnkɛma zele Mosisi kɛ,

²“Ka kile Yizilayɛma ne mɔ kɛ bɛzia bɛ nzi bɛhɔyɛ azokoɛleɛ wɔ Pae Hahaelo, wɔ Megedɔlo nee Ndɔ Nyevile ne avinli, mɔɔ bikye Beeyale Zifɔn la.

³Yigyibiti belemgbunli ne baha kɛ, ‘Yizilayɛma ɛminli fienemgbole ne anu na bɛlɛdi ahyimango.’

⁴Mebamaa belemgbunli ne ahonle ayɛ se, na yeadoa bɛ, na meanyia anyunlunyia wɔ belemgbunli ne nee ye ɛlɔnema ne kɔsɔɔti anyunlu, amaa Yigyibitima anwu kɛ medame a mele Ɛdɛnkɛma a.” Na Yizilayɛma yɛle mɔɔ bɛhanle bɛhilele bɛ la.

⁵Mɔɔ bɛbɔle Yigyibiti belemgbunli ne amaneɛ kɛ menli ne ɛnriandi ɛhɔ la, ɔ nee ye mgbanyima ne mɔ nyianle Yizilayɛma ne anwo adwenle ngakyile na bɛhanle kɛ, “Duzu a yɛyɛ la, kɛ yɛmaa Yizilayɛma ɛgyakyi yɛ ɛzonlenlɛ ɛhɔ a?”

⁶Yemɔti ɔvale ye konle ehwili ne nee ye ɛlɔnema ne;

⁷ɔvale konle ehwili ne mɔ anu ɛya nsia, na ɔvale Yigyibiti konle ehwili ngakyile ne mɔ amuala na ɔvale safohyenlema ɔguguale nu.

⁸Ɛdɛnkɛma manle Yigyibiti belemgbunli ne ahonle yɛle se. Ɔbulule debie biala azo na ɔdoale Yizilayɛma wɔ mekɛ mɔɔ ɛnee bɛlua adenle nu konimlilɛ nu bɛlɛkɔ la.

⁹Yigyibitima, belemgbunli ne mgbɔnwɔ ne mɔ, ye konle ehwili ne mɔ, menli mɔɔ ka mgbɔnwɔ nee ɛlɔnema ne mɔ kɔsɔɔti belele zile Yizilayɛma zo na bɛhɔdole bɛ kɛ bɛzokoɛ Ndɔ Nyevile ne anloa, wɔ Pae Hahaelo nee Beeyale Zifɔn avinli.

¹⁰Mɔɔ belemgbunli ne kpumgbunle bɛ na Yizilayɛma manle bɛ nye zo nwunle kɛ Yigyibitima ɛlɛba bɛ nwo zo la, ɛzulolɛ hanle bɛ. Yizilayɛma zunle vɛlɛle Ɛdɛnkɛma,

¹¹na bɛhanle bɛhilele Mosisi kɛ, “Anzɛɛ azie biala ɛnle Yigyibiti mɔɔ yemɔti wɔva yɛ wɔra ɛmaa yɛarawu yɛagua fienemgbole ye anu a? Wɔye yɛ wɔvi Yigyibiti la, se wɔnwu ɛbɛla mɔɔ wɔbɔ la?

¹²Anzɛɛ yɛanze wɔ kɛ, ‘Gyakyi yɛ koonwu maa yɛzonle Yigyibitima ɔ?’ Ɔluakɛ ɔle kpalɛ kɛ anrɛɛ ɛnee yɛkɛzonle Yigyibitima tɛla kɛ yɛkɛwu yɛkɛgua fienemgbole ye anu.”

¹³Na Mosisi zele menli ne kɛ, “Bɛmmasulo, bɛgyinla kpundii na bɛnlea kɛ ɛnɛ Ɛdɛnkɛma bazi alie bɛ la. Ɔluakɛ Yigyibitima mɔɔ bɛnwu bɛ ɛnɛ la, bɛnrɛnwu bɛ bieko ɛlɛ.

¹⁴Ɛdɛnkɛma baho amaa bɛ; bɛmɛ, bɛzie bɛ nwo diinyi.”

¹⁵Ɛdɛnkɛma zele Mosisi kɛ, “Duzu ati a bɛlɛsu bɛavɛlɛ me a? Ka kile Yizilayɛma kɛ bɛhɔ bɛ nyunlu.

¹⁶Maa wɔ kpɔma ne zo; tende ɛ sa nyevile ne anu maa nuhua ɛhyɛ nwiɔ ɛmaa Yizilayɛma ɛlua azɛlɛ resee zo ɛpɛ.

¹⁷Mebamaa Yigyibitima ahonle ayɛ se, bɛbadoa bɛ na ɛhye bamaa meali konim meanyia me nyunlu wɔ Yigyibiti belemgbunli ne nee ye ɛlɔnema, ye konle ehwili ne mɔ, nee ye konlema mɔɔ ka mgbɔnwɔ la ɛkɛ.

¹⁸Na mɔɔ menwɔli konim wɔ belemgbunli ne, ye konle ehwili ne mɔ nee menli mɔɔ ka ye mgbɔnwɔ ne mɔ la anwo zo la, yɛɛ Yigyibitima banwu kɛ medame a mele Ɛdɛnkɛma a.”

¹⁹Akee Nyamenle soanvolɛ ne mɔɔ li Yizilayɛma pemgbenleamgbe ne anyunlu la zenle lile bɛ nzi. Amungu mpila ne mɔɔ li bɛ nyunlu la zenle ralile bɛ nzi,

²⁰na ɔragyinlanle Yigyibitima nee Yizilayɛma avinli. Amungu ne yele awozinli kabikabi manle Yigyibitima, na wienyi dale Yizilayɛma anyunlu. Yemɔti nɔe ne, ɛlɔnema ekpunli nwiɔ ne ambikye nwolɛ fee.

²¹Akee Mosisi dendenle ɔ sa nyevile ne anu, na Ɛdɛnkɛma manle aduduleɛ anwoma anu ɛsesebɛ bie bɔle nɔe ne amuala, na ɔhyɛle nyevile ne anu ɔyele azɛlɛ resee ɔdole nyevile ne avinli.

²²Yizilayɛma luale nyevile ne anu azɛlɛ resee ne azo; nyevile ne dwazole bolonwonwo wɔ foa ko nee foa ko yɛle kɛ bane wɔ bɛ fema zo nee bɛ bɛne zo.

²³Yigyibitima, belemgbunli mgbɔnwɔ ne, ye konle ehwili ne mɔ, nee ye menli mɔɔ ka mgbɔnwɔ ne mɔ la kɔsɔɔti hɔluale nyevile ne anu azɛlɛ resee ne azo dinle Yizilayɛma.

²⁴Aleɛbahye ne Ɛdɛnkɛma luale amungu nee senle mpila ne anu nleanle Yigyibitima na Yigyibiti ɛlɔnema ne anye zo danle bɛ.

²⁵Ɛdɛnkɛma manle bɛ konle ehwili ne mɔ agyakɛ miminle mɔɔ bɛtwe bɛ nwo fee a ɔnyɛ boɛ a. Na Yigyibitima hanle kɛ, “Bɛmaa yɛnriandi yɛvi Yizilayɛma anyunlu, ɔluakɛ Ɛdɛnkɛma ɛlɛko atia yɛ amaa bɛ.”

²⁶Na Ɛdɛnkɛma zele Mosisi kɛ, “Tende ɛ sa nyevile ne anu maa nyevile ne ɛha ɛbɔ nu ɛva Yigyibitima, bɛ konle ehwili ne mɔ, nee menli mɔɔ ka mgbɔnwɔ ne mɔ la anwo zo.”

²⁷Yemɔti Mosisi dendenle ɔ sa nyevile ne anu, na nwonlomɔ ne, nyevile ne yile rale ɔ bo zo ne. Yigyibitima bɔle mɔdenle kɛ bɛnriandi, na Ɛdɛnkɛma hanle bɛ guale nyevile ne anu.

²⁸Nyevile ne yile bɔle nu monlanle konle ehwili ne mɔ, menli mɔɔ ka mgbɔnwɔ ne mɔ, nee Yigyibitima pemgbenleamgbe ne mɔɔ ɛlɛfoa Yizilayɛma la; bɛ nuhua ko bɔbɔ anga.

²⁹Nyevile ne dwazole bolonwonwo yɛle bane wɔ Yizilayɛma fema zo nee bɛ bɛne zo, na bɛluale azɛlɛ resee zo bɛpɛle nyevile ne.

³⁰Ɛdɛnkɛma liele Yizilayɛma kenle ko ne vile Yigyibitima asa anu. Na Yizilayɛma nwunle Yigyibitima avunli ne mɔ wɔ nyevile ne anloa.

³¹Eza Yizilayɛma nwunle gyima kpole mɔɔ Ɛdɛnkɛma lile tiale Yigyibitima la. Menli ne zulole Ɛdɛnkɛma na bɛliele Ɛdɛnkɛma nee ye sonvolɛ Mosisi bɛlile.