Read Nzema Ade 16 Bible Online

Ade 16 - Nzema bible

Ade 16

¹Yizilayɛma kɔsɔɔti vi Yilem rale fienemgbole ne mɔɔ wɔ Yilem nee Saenae avinli la anu. Bɛdule bɛ bo wɔ Yigyibiti azɛlɛ zo la, ye siane mɔɔ tɔ zolɛ nwiɔ, ye kenle bulu nee nnu ne azo yɛɛ bɛdwule ɛkɛ ne a.

²Na Yizilayɛma amuala dendɛle bɛ nzo abo tiale Mosisi nee Aalɔn wɔ fienemgbole ne anu.

³Bɛzele Mosisi nee Aalɔn kɛ, “Ɔle kpalɛ kɛ anrɛɛ Ɛdɛnkɛma hunle yɛ wɔ Yigyibiti azɛlɛ zo. Ɛkɛ ne, yɛdɛnlanle aze yɛlile nane nee aleɛ yɛ ko yile tɛkɛɛ. Bɛva yɛ bɛragua fienemgbole ye anu bɛmaa ɛhɔne ahu menli pemgbenleamgbe ɛhye.”

⁴ Akee Ɛdɛnkɛma zele Mosisi kɛ, “Nea, mebamaa aleɛ vi anwuma adɔ kɛ ezule. Kenle ko biala menli ne bahɔsesa mɔɔ sa bɛ di kenle ko la ala, amaa meazɔ bɛ meanlea saa bɛkɛli me mɛla ne azo anzɛɛ bɛnrɛli zolɛ.

⁵Kenle nsia ne azo, bɛva kenle ko aleɛ ne fane nwiɔ na bɛrado.”

⁶Na Mosisi nee Aalɔn hanle hilele menli ne kɔsɔɔti kɛ, “Nɔsolɛ nu bɛbanwu kɛ Ɛdɛnkɛma a yele bɛ vile Yigyibiti azɛlɛ zo a.

⁷Na ye nwonlomɔ nu, bɛbanwu Ɛdɛnkɛma anyunlunyia ne, ɔboalekɛ yede bɛ ɛdendɛlɛ mɔɔ bɛdendɛ bɛtia ye la. Ɔluakɛ yɛmɛ, yɛle duzu mɔɔ yemɔti ɔwɔ kɛ bɛtendɛ bɛtia yɛ a?”

⁸Na Mosisi hanle kɛ, “Nɔsolɛ nu Ɛdɛnkɛma bamaa bɛ nane bɛali na nwonlomɔ nu yeamaa bɛ kpanwo bɛali bɛ ko ayi, ɔboalekɛ Ɛdɛnkɛma ɛde bɛ ɛdendɛlɛ mɔɔ bɛtendɛ bɛtia ye la, na yɛmɛ, yɛle duzu? Tɛ yɛmɛ yɛɛ bɛtendɛ bɛatia yɛ a, bɛtendɛ bɛtia Ɛdɛnkɛma.”

⁹Na Mosisi hanle hilele Aalɔn kɛ, “Ka kile Yizilayɛma kɔsɔɔti kɛ bɛrɛla Ɛdɛnkɛma anyunlu ɛke, ɔluakɛ yede ɛdendɛlɛ mɔɔ bɛlɛtendɛ bɛatia ye la.”

¹⁰Na mɔɔ Aalɔn dendɛle hilele Yizilayɛma ne la, bɛdole bɛ nye fienemgbole ne anu lɔ, na nea, Ɛdɛnkɛma anyunlunyia ne dale amungu ne anu.

¹¹Na Ɛdɛnkɛma zele Mosisi kɛ,

¹²“Mede Yizilayɛma ɛdendɛlɛ mɔɔ bɛtendɛ bɛtia me la; ka kile bɛ kɛ: Nɔsolɛ nu bɛbali nane na nwonlomɔ bɛali kpanwo; akee bɛbanwu kɛ medame a mele Ɛdɛnkɛma bɛ Nyamenle ne a.”

¹³Ɔdwule nɔsolɛ nu la nloma kyelɛwele kpolane ravale azokoɛleɛ ne, na ye nwonlomɔ ne ɛbɔlɛ dɔle azokoɛleɛ ne ɛleka biala.

¹⁴Na mɔɔ ɛbɔlɛ ne wele la, bɛnwunle kɛ debie ahunguma ngyikyi nwonwohyee kɛ ɛbɔndwoba la dɔɔnwo gua ndile ne azo wɔ fienemgbole ne anu.

¹⁵Mɔɔ Yizilayɛma ne nwunle ye la, bɛbizebizale bɛ nwo ngoko kɛ, “Duzu debie ɛ?” Ɔluakɛ ɛnee bɛnze ye deɛ holɛ. Na Mosisi zele bɛ kɛ, “Ɔle kpanwo mɔɔ Ɛdɛnkɛma ɛva ɛmaa bɛ kɛ bɛli a.

¹⁶Na mɔɔ Ɛdɛnkɛma ɛha ye wɔ nwolɛ la ɛne: ‘Awie biala ɛsesa dɔɔnwo biala mɔɔ kɛza ye di la, menli mɔɔ wɔ ye awuke ne anu la, ko biala ɛdeɛ litili nwiɔ.’ ”

¹⁷Na Yizilayɛma ne yɛle ye zɔhane, bie mɔ sesale dɔɔnwo, bie mɔ noko sesale ekyi.

¹⁸ Na mɔɔ bɛzuzule bɛhilele bɛ nwo la, bɛnwunle kɛ awie mɔɔ sesale dɔɔnwo la ansesa mɔɔ bo zolɛ yɛɛ mɔɔ sesale ekyi la angyia bieko anwo. Awie biala sesale mɔɔ le ɔ nloa azo la pɛpɛ.

¹⁹Na Mosisi hanle hilele bɛ kɛ, “Awie biala mmafa bie sie ɔmaa aleɛ kye zolɛ.”

²⁰Noko bɛandie Mosisi, bie mɔ gyakyile bie manle aleɛ hyenle zolɛ, na bɛlɔle azonlɛ, bɛbɔnle nvoanvoa, na Mosisi vale bɛ nwo ɛya kpole.

²¹Nwonlomɔ biala bɛsesale bie. Awie biala sesale mɔɔ kɛza ye di la, yɛɛ kɛ ewia ne fi la ɛnee yeholo.

²²Kenle nsia ne azo bɛsesale kpanwo ne mɔnwo, sonla ko biala ɛdeɛ litili nna. Na mɔɔ mgbanyima ne mɔ rahanle hilele Mosisi la,

²³Mosisi zele bɛ kɛ, “Kɛ Ɛdɛnkɛma se la ɛne: ‘Ɛhyema le ɛnwomenlelielɛ kenle nwuanzanwuanza maa Ɛdɛnkɛma; bɛdondo mɔɔ bɛtondo la na bɛdo mɔɔ bɛto bɛali la. Biala mɔɔ kɛha la bɛva bɛzie ɛhyema.’ ”

²⁴Na kɛmɔ Mosisi hanle hilele bɛ la, bɛvale bie bɛziele bɛmanle aleɛ hyenle; yeambɔ nvinli yɛɛ yeanlɔ azonlɛ.

²⁵Mosisi zele bɛ kɛ, “Bɛli ɛhye ɛnɛ, ɔboalekɛ ɛnɛ le Ɛdɛnkɛma Ɛnwomenlelielɛ Kenle. Bɛnrɛnyia aleɛ biala wɔ ɛleka biala.

²⁶Bɛsesa aleɛ kenle nsia. Kenle nsuu ne le Ɛnwomenlelielɛ Kenle, yemɔti bɛnrɛnyia aleɛ biala.”

²⁷Na kenle nsuu ne azo menli ne bie mɔ hɔle kɛ bɛkasesa aleɛ, na bɛannyia bie.

²⁸Na Ɛdɛnkɛma zele Mosisi kɛ, “Kenlenzu yɛɛ bɛkɛkpo kɛ bɛnrɛli me mɛla ne mɔ azo a?

²⁹Bɛnlea! Ɛdɛnkɛma ɛmaa bɛ ɛnwomenlelielɛ kenle, yemɔti kenle nsia ne azo ɔmaa bɛ kenle nwiɔ aleɛ, zɔhane ati kenle nsuu ne azo, awie biala ɛdɛnla ye sua nu; yɛɛ awie biala mmatu ɔ gyakɛ.”

³⁰Yemɔti menli ne liele bɛ ɛnwomenle kenle nsuu ne.

³¹Yizilayɛma ne vɛlɛle aleɛ ne mana.[8] Ɔle kɛ ma fufule ekyi bie, yɛɛ ye fɛlɛko le kɛ belɛde mɔɔ bɛva wolɛ bɛyɛ la.

³²Na Mosisi hanle kɛ, “Kɛ Ɛdɛnkɛma se la ɛne! ‘Bɛva mana ne litili nwiɔ bɛzie, amaa bɛ awolɛndoazo ne mɔ kɔsɔɔti anwu aleɛ ne mɔɔ menvale menlile bɛ adane wɔ fienemgbole ne anu wɔ mekɛ mɔɔ menyele bɛ menvile Yigyibiti azɛlɛ zo la.’ ”

³³Na Mosisi hanle hilele Aalɔn kɛ, “Fa dwora, na fa mana litili nwiɔ gua nu na sie ye Ɛdɛnkɛma anyunlu ɛkɛ maa wɔ awolɛndoazo kɔsɔɔti.”

³⁴Na kɛmɔ Ɛdɛnkɛma zele Mosisi la, Aalɔn vale ziele Ɛdɛnkɛma Ngyekyeleɛ Ɛlɛka ne anyunlu.

³⁵Yizilayɛma lile mana ne ɛvolɛ abulanla hɔkpulale mekɛ mɔɔ bɛradwule azɛlɛ kpalɛ mɔɔ bɛdidi zolɛ a ɔyɛ boɛ la azo la. Bɛlile mana toonwo bɛdwule Keena ɛweɛne zo.

³⁶(Mekɛ ne anu ɛnee nzuzuleɛ ko le litili abulanwiɔ.)