Read Nzema Ade 2 Bible Online

Ade 2 - Nzema bible

Ade 2

¹Mekɛ ne anu nrenya bie mɔɔ vi Livae abusua ekpunli ne anu la gyale raalɛ wɔ abusua ekpunli ko ne ala anu.

² Raalɛ ne vale ɛkolɛ na ɔwole ralɛ nrenya; na mɔɔ ɔnwunle kɛ ralɛ ne anwo si yɛ fɛ la, ɔvale ye ɔveale toonwo siane nsa.

³Na mɔɔ ɛnee akee ɔfa ye ɔfea bieko a ɔnyɛ boɛ la, ɔvale ndɔ ɔnwonle kɛndɛne, ɔvale bilewu ɔfɔlele nuhua, amaa nzule angɔ nu, ɔvale kakula ne ɔdole nuhua na ɔvale ɔhɔziele ndɔ ne anu wɔ azule ne anloa.

⁴Akee kakula ne adiema raalɛ gyinlanle moa ekyii zinzale ye, amaa yeanwu edwɛkɛ mɔɔ kɛzi kakula ne anwo zo la.

⁵Yigyibiti belemgbunli ne ara raalɛ ne nee ye sonvolɛma hɔle azule ne anu kɛ ɔkabia, ɛnee ye sonvolɛ mraalɛ ne mɔ luolua azule ne anloa. Mɔɔ ɔlɛbia la ɔnwunle kɛ kɛndɛne ne gyi ndɔ ne anu; ɔmanle ye sonvolɛ raalɛ ko hɔvale rale.

⁶Ɔdukuele zolɛ la ɔnwunle kakula ne, na alɔbɔlɛ, ɛnee kakula ne ɛlɛsu. Ɔlile kakula ne anwo nyane na ɔhanle kɛ, “Hibuluma ne amra ne mɔ ko ɛne.”

⁷Ɔ diema raalɛ ne bizale belemgbunli ara raalɛ ne kɛ, “Mengɔnvɛlɛ Hibulu mraalɛ ne mɔ ko memaa ɔrava kakula ne ɔhɔli ye adane ɔmaa wɔ ɔ?”

⁸Belemgbunli ara raalɛ ne zele ye kɛ, “Ɛhɛe, kɔ.” Yemɔti kakula raalɛ ne hɔvɛlɛle kakula ne ɔ nli.

⁹Belemgbunli ara raalɛ ne zele ye kɛ, “Fa kakula ɛhye kɔ, kɔli ye adane maa me na mebadua wɔ kakɛ.” Yemɔti raalɛ ne vale kakula ne hɔlile ye adane.

¹⁰ Kakula ne nyinle, ɔ nli vale ye rɛlɛle belemgbunli ara raalɛ ne, na ɔrayɛle ɔ ra. Ɔdonle ye Mosisi,[1] na ɔzele kɛ, “Ɔboalekɛ menyele ye menvile nzule nu.”

¹¹Mosisi nyinle la, kenle ko ɔhɔkpɔlale ye menli ne, ɔhɔnleanle gyima ɛsesebɛ mɔɔ bɛlɛyɛ la, na ɔnwunle kɛ Yigyibitinli bie ɛlɛbo ye menli Hibuluma ne mɔ ko.

¹²Ɔdole ɔ nye bɛne nee fema na yeannwu awie biala la, ɔhunle Yigyibitinli ne na ɔvunle ye ɔveale ɛnwea ne anu.

¹³Aleɛ hyenle na eza ɔhɔle bɛ ɛkpɔlalɛ bieko la, ɛnee Hibuluma nwiɔ ɛlɛko. Ɔzele nuhua ne mɔɔ anyɛ ye boɛ la kɛ, “Duzu ati a wɔbɔ ɛ gɔnwo ɛ?”

¹⁴Nrenya ne buale ye kɛ, “Nwane a yɛle wɔ yɛ nwo zo neavolɛ nee ndɛnebuavolɛ a? Wɔdwenle nwo kɛ ɛku me, kɛmɔ ɛhunle Yigyibitinli ne la ɔ?” Akee Mosisi zulole na ɔhanle ɔhilele ɔ nwo kɛ, “Nɔhalɛ, edwɛkɛ ne ɛla ali.”

¹⁵ Mɔɔ belemgbunli ne dele edwɛkɛ ne la, ɔyɛle kɛ ɔku Mosisi. Na Mosisi nriandile hɔle Medean maanle nu. Kenle ko Mosisi hɔdɛnlanle bula bie anwo, na Sɛlɛvolɛ Gyɛtulo mɔɔ wɔ Medean la amra mraalɛ nsuu ne rale bula ne azo kɛ bɛbaza nzule bɛahɔgua bɛ ze mboane nee mbɔnkye adidi nlɛka ne mɔ anu bɛamaa bɛanlo.

¹⁷Mboaneneavolɛma bie ravoanle bɛ; na Mosisi dwazole boale bɛ na ɔnleanle ɔmanle mboane ne mɔ nzule.

¹⁸Mɔɔ bɛziale bɛhɔle la bɛ ze Riliwɛle[2] bizale bɛ kɛ, “Duzu ati a ɛnɛ bɛra sua nu ndɛndɛ zɛhae a?”

¹⁹Bɛhanle kɛ, “Yigyibitinli bie liele yɛ ti wɔ mboaneneavolɛma ne asa anu, ɔsesale nzule ne bie ɔmanle yɛ na eza ɔnleanle ɔmanle mboane nee mbɔnkye ne mɔ nlonle nzule.”

²⁰Riliwɛle bizale ɔ mra mraalɛ ne mɔ kɛ, “Na ɔwɔ nienwu? Duzu ati a bɛgyakyi ye nehane ɛ? Bɛvɛlɛ ye bɛmaa ɔrali debie.”

²¹Na Mosisi kponlenle zolɛ ɔ nee nrenya ne dɛnlanle. Ɔvale ɔ ra raalɛ Zepɔla ɔmanle Mosisi gyale.

²²Ɔ nee ye wole ralɛ nrenya. Mosisi hanle hilele ɔ nwo kɛ, “Mele ɛyɛvolɛ wɔ awie mɔ maanle nu” Yemɔti ɔdonle ye Gɛhyɔm.[3]

²³Mekɛ ne hɔle bie kpalɛ la Yigyibiti belemgbunli ne wule. Akee Yizilayɛma nwunle amaneɛ kpole kpalɛ wɔ akɛlɛzonlenlɛ nu. Bɛzunle bɛvɛlɛle moalɛ, na bɛ ɛzunlɛ ne dwule Nyamenle anyunlu.

²⁴ Nyamenle dele bɛ ɛzunlɛ ne na ɔhakyele ye ngyekyeleɛ ne mɔɔ ɔ nee Ebileham, Ayezeke, nee Gyekɔbo kyekyele la.

²⁵Na Nyamenle nwunle Yizilayɛma tɛnlabelɛ nu, na nyane hanle ye.