Read Nzema Ade 23 Bible Online

Ade 23 - Nzema bible

Ade 23

¹ “Bɛmmabɔ nzekue. Bɛmmadi daselɛ adalɛ bɛboa sonla mɔɔ le amumuyɛ la.

²Bɛmmadi menli dɔɔnwo anzi bɛyɛ ɛtane; yɛɛ bɛmmatoa menli ne dɔɔnwo ti bɛkyea nɔhalɛ nye wɔ bɛ daselɛlilɛ nu bɛsɛkye pɛlepɛlelilɛ.

³ Bɛdi ehyianli edwɛkɛ a, bɛmmadi mɔguazo.

⁴“Saa ɛnwu kɛ wɔ kpɔvolɛ ɛnlankɛ anzɛɛ asoaso ɛde ɛlɛkɔ a, kye ye kɔmaa ye.

⁵Saa ɛnwu kɛ adesoa ɛdɔ wɔ kpɔvolɛ asoaso nwo zo a, boa ye maa ɔdwazo ye; mmapɛ nu ɛkɔ.

⁶ “Saa ehyianvolɛ nyia edwɛkɛ a, bɛmmakyea nɔhalɛ ne anye.

⁷Bɛmmato awie ɛzonle, bɛmmaku sonla mɔɔ ɛnze nwolɛ bie na ɔdi pɛlepɛle la, ɔluakɛ menrɛgyakyi amumuyɛnli ne dwɔɔ.

⁸Bɛmmadie ndoloboa, ɔluakɛ ndoloboa si mgbanyima mɔɔ di edwɛkɛ la anye na ɔsɛkye menli mɔɔ di benle la edwɛkɛ.

⁹“Bɛmmasisi ɛyɛvolɛ; bɛze kɛ ɛyɛvolɛ edwɛkɛ si yɛ nyane la, ɔluakɛ ɛnee bɛdabɛ bɛle nyɛvolɛ wɔ Yigyibiti azɛlɛ zo.

¹⁰ “Ɛvolɛ nsia anu bɛbalua bɛ ɛya ne mɔ bɛabu,

¹¹na ɛvolɛ nsuu ne azo bɛmaa azɛlɛ ne ɛla ɛkɛ ne mgbane, amaa ehyianvolɛma ali mɔɔ kɛfifi zolɛ la, na mɔɔ kɛha la nanemgbole noko ali. Zɔhane ala yɛɛ bɛyɛ bɛ vanye nee ɔlivi avule ne mɔ a.

¹² “Bɛva kenle nsia bɛyɛ gyima, na kenle nsuu ne azo, bɛlie bɛ ɛnwomenle, amaa bɛ nlankɛ nyinli nee bɛ asoaso ne mɔ alie bɛ ɛnwomenle na bɛ ahanra nee nyɛvolɛ mɔɔ yɛ gyima maa bɛ la alie bɛ ɛnwomenle.

¹³“Edwɛkɛ biala mɔɔ meha mehile bɛ la, bɛdie ye boɛ. Bɛmmabɔ nyamenle gyɛne biala duma, yɛɛ bɛmmamaa bie duma finde bɛ nloa.

¹⁴“Ɛvolɛ ko biala bɛli ɛvoyia mgbole nsa bɛwula me anyunlunyia.

¹⁵“Bɛli Angye Ɛvoyia ne wɔ siane Ebebe ne anu, kɛmɔ menzele bɛ la. Bɛbali kpanwo mɔɔ mgbɔvonle ɛnle nu la kenle nsuu, ɔluakɛ siane ɛhye anu a bɛvile Yigyibiti a. Biala mmafa ɔ sa mgbane ba me nyunlu.

¹⁶“Bɛli Bɛyɔba Ɛvoyia ne, wɔ mekɛ mɔɔ bɛkɛze kɛ bɛte bɛ ma mɔɔ lumua la, na bɛli Kpɔda Bo Ɛdɛnlanlɛ Ɛvoyia ne wɔ ɛbuhenle ne awieleɛ, wɔ mekɛ mɔɔ bɛkɛwie bɛ ninyɛne mɔɔ wɔ bɛ ɛya ne mɔ anu la twe ba sua nu la.

¹⁷“Ɛvolɛ biala, wɔ ɛvoyia fane nsa ɛhye mɔ ɛlilɛ nu, ɔwɔ kɛ nrenya biala ba medame Awulae bɛ Nyamenle ne anyunlu.

¹⁸“Saa bɛku ayɛmoa bɛabɔ azu bɛamaa me a, bɛmmafa kpanwo mɔɔ mgbɔvonle wɔ nu la bɛboka nwolɛ. Bɛmmamaa nyɛmoa mɔɔ bɛkɛva bɛkɛbɔ azu bɛkɛmaa me la ɛnlome ne ka ɛkɛ ne toonwo aleɛ kye zolɛ.

¹⁹ “Bɛyɔba mɔɔ kɛlumua kɛvinde bɛ ɛya avule ne mɔ anu la, bɛva bɛrɛla medame Ɛdɛnkɛma bɛ Nyamenle ne sua nu. “Bɛmmato boane anzɛɛ abɔnkye ralɛ wɔ ɔ nli nyɛfonzule nu bɛdi.

²⁰“Bɛnlea, mebazoa Nyamenle soanvolɛ meamaa yeali bɛ nyunlu, yeazinza bɛ wɔ bɛ adendulɛ nu ɔ nee bɛ ahɔ ɛleka mɔɔ meziezie memaa bɛ la.

²¹Bɛdie ye na bɛyɛ tieyɛ bɛmaa ye. Bɛmmate ɔ nwo atua, ɔluakɛ ɔnrɛva bɛ mɛladonlɛ biala ɔnrɛhyɛ bɛ, ɔboalekɛ ɔgyi me gyakɛ anu.

²²Saa bɛtie ɔ ne na bɛyɛ mɔɔ menwɔha la a, mebayɛ kpɔvolɛ meamaa bɛ kpɔvolɛma na meaho meatia menli mɔɔ ko tia bɛ la.

²³Saa me soanvolɛ ne di bɛ nyunlu nee bɛ kɔ Amɔlema, Hɛtema, Pɛlɛzema, Keenama, Haevaema, nee Gyibɛsema maanle nu na mebɔ bɛ bo zo bɔkɔɔ a,

²⁴bɛmmabɔ bɛ ti aze bɛmaa bɛ nyamenle ne mɔ yɛɛ bɛmmasonle bɛ, anzɛɛ bɛmmayɛ bɛ ɛzonlenlɛ ne mɔ bie. Bɛzɛkye bɛ na bɛbubu bɛ ɛzonlenlɛ mpila ne mɔ dwɔkɔdwɔkɔ.

²⁵Bɛzonle me ngomekye, Ɛdɛnkɛma bɛ Nyamenle ne, na mebayila bɛ aleɛ nee bɛ nzule zo; eza mebaye anwondolɛ meavi bɛ avinli.

²⁶Bɛ maanle ne anu raalɛ biala ako ɛnrɛkpɔne yɛɛ bie ɛnrɛyɛ mota. Mebamaa bɛ ngoane tendenle.

²⁷“Mebaha menli mɔɔ ko tia bɛ la ɛzulolɛ meamaa bɛ nye zo ada bɛ, na meamaa bɛ kpɔvolɛma agua ɛbɔ nu.

²⁸Mebamaa ngɛkɛba mɔɔ le kɛ nrɛlabɔlɛ la alumua bɛ nyunlu ahɔvoa Haevaema, Keenama, yɛɛ Hɛtema.[15]

²⁹Menrɛva ɛvolɛ ko ala menrɛdu bɛ, anrɛɛ azɛlɛ ne kɛla ɛkɛ ne mgbane kɛmaa nanemgbole kɛzo zolɛ kɛgyegye bɛ.

³⁰Mebadu bɛ ngyikyi ngyikyi kɔkpula mekɛ mɔɔ bɛ nwo kɛzo na bɛkɛva azɛlɛ ne kɔsɔɔti la.

³¹Mebagya bɛ ɛweɛne ne meavi Akaba Ebolo ne anu meahɔ Azule Yufileti ne anloa, na meava ye fienemgbole ne anu toonwo meahɔgua ye Mɛdetɛlenia Nyevile ne anloa. Mebamaa bɛali menli ne anwo zo konim na bɛavoa bɛ bɛavi azɛlɛ ne azo.

³²Bɛ nee bɛ anzɛɛ bɛ nyamenle ne mɔ mmayɛ ngyehyɛlɛ biala.

³³Bɛmmamaa menli ne mɔ tɛnla bɛ maanle ne anu, anrɛɛ bɛkɛmaa bɛkɛyɛ ɛtane bɛkɛtia me, ɔluakɛ saa bɛsonle bɛ nyamenle ne mɔ a, ɔbayɛ ɛhane yeamaa bɛ.”