Read Nzema Ade 25 Bible Online

Ade 25 - Nzema bible

Ade 25

¹Ɛdɛnkɛma zele Mosisi kɛ,

²“Ka kile Yizilayɛma kɛ bɛbɔ azu bɛmaa me. Die awie biala asa anu azubɔdeɛ biala mɔɔ vi ye ahonle nu la.

³Azubɔdeɛ mɔɔ ɛbalie wɔavi bɛ ɛkɛ ne la ɛne: ezukoa nvutuke, dwɛtɛ fufule, yɛɛ kɔbele;

⁴lenen ɛdanlɛ mɔɔ anye te, boane enrinli ɛdanlɛ anye buluwu, buluwu nee kɔkɔlɛ afonla nee kɔkɔlɛ, abɔnkye enrinli ɛdanlɛ,

⁵mboane nyinli nwoma mɔɔ bɛwula bɛ kɔkɔlɛ, abɔnkye nwoma, akasea baka,

⁶kɛnlaneɛ nwole, ninyɛne evuanlɛ mɔɔ bɛfa bɛyɛ ɛkpokpalɛ nwole nee ɛyɛlɛ evuanlɛ,

⁷ɔnekese awolɛ nee awolɛ ɛsesebɛ mɔɔ bɛfa bɛbobɔ Sɛlɛvolɛ Kpanyinli ne ɛzonlenlɛ tɛladeɛ ne mɔɔ bɛfɛlɛ ye yifɔdo[16] nee ɔ kɛnra azo aguzo ne mɔ anu la.

⁸Maa menli ne ɛziezie ɛleka nwuanzanwuanza ɛmaa me, amaa meadɛnla bɛ avinli.

⁹Yɛɛ siezie nuhua, kɛmɔ menwɔzi menwɔhile wɔ la.

¹⁰“Fa akasea ndaboa bobɔ ɛlɛka. Maa ye tendenle ɛyɛ mita ko nee ekyi, ye tɛtɛlɛ ɛyɛ mita foa ko nee ekyi, na ye anwumahɔlɛ ɔdaye noko ɔyɛ mita foa ko nee ekyi.

¹¹Kolo ezukoa nvutuke tagyee gua nwolɛ amuala nee ɔ kunlu na fa bie to ɔ nloa bɛnra yia.

¹²Fa ezukoa nvutuke ngɛba nna mɔɔ bɛsosɔ nu bɛdwu la sosɔ ɔ gyakɛ nna ne, nwiɔ wɔ ye foa ko yɛɛ nwiɔ wɔ ye foa ko noko.

¹³Se akasea mbaka nwiɔ mɔɔ bɛfa bɛsoa la, na fa nvutuke fɔle nwolɛ,

¹⁴na fa wulowula ye tɛbanu nee ye tɛbanu ngɛba nwiɔ ne anu.

¹⁵Ɔnle kɛ bɛyeye mbaka ne mɔ. Ɔwɔ kɛ bɛboa ɛlɛka ne ngɛba ne mɔ anu.

¹⁶Na akee fa awolɛ ndɛbandɛba nwiɔ ne mɔɔ mehɛlɛ mɛla ne mɔ zolɛ mɔɔ mebava meamaa wɔ la gua nu.

¹⁷ “Akee fa nvutuke tagyee yɛ ɛlɛka ne mɔɔ ye tendenle le mita ko nee ekyi na ye tɛtɛlɛ le mita foa ko nee ekyi la nduazo.

¹⁸Fa nvutuke mɔɔ bɛva hamenle bɛbolo la yɛ abɔdeɛ mɔɔ lɛ ndɛbalɛ[17] la nwiɔ

¹⁹siezie ɔ ti nee ɔ ti. Fa bɛ boka tile ne yɛ maa bɛyɛ kpundii mɔɔ ɛkpɔkye bɛ a bɛmkpɔkye a.

²⁰Abɔdeɛ nwiɔ ne mɔɔ lɛ ndɛbalɛ la bagyinlegyinla nduazo ne ati nee ɔ ti, bɛ nye bɔ zolɛ, bɛ mu nwiɔ bɛ nye gyi ɛlɛka ne ati ne anwo. Ɔwɔ kɛ bɛyɛ bɛ mɔɔ bɛdɛlɛdɛlɛ bɛ ndɛba ne mɔ anu bɛmaa bɛheda ɛlɛka ne azo.

²¹Akee ɛbava awolɛ ndɛbandɛba nwiɔ ne mɔɔ mebava meamaa wɔ la wɔagua ɛlɛka ne anu na wɔava ɔ ti ne wɔadua zolɛ.

²²Na me nee wɔ bayia ɛkɛ, na ɛlɛka ne azo, abɔdeɛ nwiɔ ne andɛba ne mɔ avinli yɛɛ mebadendɛ meava me mɛla ne mɔ amuala meamaa wɔ na wɔava wɔamaa Yizilayɛma a.

²³“Fa akasea ndaboa bobɔ ɛkponle; maa ye tendenle ɛyɛ mita ko, ye tɛtɛlɛ ɛyɛ mita foa ko, na ye anwumahɔlɛ ɛyɛ mita foa ko nee ekyi.

²⁴Fa ezukoa nvutuke tagyee fɔle nwolɛ amuala na fa bie to ɔ nloa bɛnra yia.

²⁵Fa kɛba mɔɔ ye tɛtɛlɛ le kɛ bɛ sa taakɛ la to ɔ nloa na kolo ezukoa nvutuke gua kɛba ne anwo.

²⁶Yɛ ezukoa nvutuke ngɛba nna sosɔ ye muleɛ nna ne, ɛleka mɔɔ ɔ gyakɛ ne mɔ wɔ la.

²⁷Ɔwɔ kɛ ngɛba ne mɔ mɔɔ bɛbava mbaka ne mɔ bɛawulowula nuhua bɛazoa ɛkponle ne la bikye ɔ nloa.

²⁸Fa akasea mbaka yɛ mbaka zɔhane mɔ na fa ezukoa nvutuke fɔle nwolɛ na bɛava bɛazoa ɛkponle ne.

²⁹Fa ezukoa nvutuke tagyee yɛ agbɛlɛte nee ahyɛnze mɔɔ bɛbava ɛyɛlɛ bɛagua nu, nwanye dwora, yɛɛ dwora akunlu kuloonwu mɔɔ bɛbava bɛaye ɛdɛne la.

³⁰ Bɛva ɛkponle ne bɛzie me Ngyekyeleɛ Ɛlɛka ne anyunlu ɛkɛ ne na bɛva kpanwo mɔɔ dahuu bɛkɛva bɛkɛbɔ azu bɛkɛmaa me la bɛgua zolɛ.

³¹“Bɛva ezukoa nvutuke tagyee bɛyɛ kɛnlaneɛ baka. Bɛva hamenle bɛbolo ezukoa nvutuke tagyee bɛyɛ ɔ bo tɛtɛlɛ ne nee baka mumua ne. Ye ndotolo ne mɔ, ye ahɔpo ne mɔ, nee ɔ sa ɔ sa ne mɔ, bɛva bɛ bɛbɔ nu bɛyɛ ye debie munli ko.

³²Ɔwɔ kɛ kɛnlaneɛ baka ne nyia ngane nsia, ye foa ko ɛdeɛ nsa yɛɛ ye foa ko noko ɛdeɛ nsa.

³³Ngane nsia ne mɔ, ɔwɔ kɛ ko biala nyia kɔpo mɔɔ lɛ nduazo mɔɔ bɛyɛ ye kɛ alemɔndo ndotolo mɔɔ ɛkpuke na ɛnyelɛ nee nya duodua ɔ bo la nsa.

³⁴Akee kɛnlaneɛ baka mumua ne, ɔwɔ kɛ ahɔpo nna mɔɔ lɛ nduazo na bɛyɛ bɛ kɛ alemɔndo ndotolo mɔɔ ekpuke na ɛnyelɛ duodua ɔ bo la gyinlegyinla zolɛ.

³⁵Akee kɛnlaneɛ baka ne asa ngane nsia ne mɔ, ɔwɔ kɛ ɛnyelɛ zɔhane bie gyinla ko biala abo.

³⁶Ndotolo ne mɔ, ngane ne mɔ, yɛɛ kɛnlaneɛ baka ne, ɔwɔ kɛ bɛfa ezukoa nvutuke tagyee mɔɔ bɛva hamenle bɛbolo la bɛyɛ ye debie ko.

³⁷Bɛyɛ ahɛnlaneɛ nsuu bɛziezie kɛnlaneɛ baka ne azo bɛmaa bɛda bɛgua ɔ nyunlu fɔɔnwo.

³⁸Maa bɛ dabekɛ nee bɛ bo ahyɛnze ndɛbandɛba ne mɔ ɛyɛ ezukoa nvutuke tagyee.

³⁹Fa ezukoa nvutuke tagyee kilo abulasa nee nnu yɛ kɛnlaneɛ baka ne nee nwolɛ ninyɛne ɛhye mɔ kɔsɔɔti.

⁴⁰ Nea maa bɛyɛ bɛ kɛmɔ melɛfa meahile wɔ wɔ boka ye azo la.