Read Nzema Ade 31 Bible Online

Ade 31 - Nzema bible

Ade 31

¹Ɛdɛnkɛma zele Mosisi kɛ,

²“Nea, meye Yulae ara nrenya Bɛzalii, mɔɔ ɔ nlenya a le Huuli mɔɔ vi Dwuda abusua ekpunli ne anu la,

³na meva Nyamenle Sunsum ne meyi ye tɛkɛɛ. Memaa ye nrɛlɛbɛ nee ndelebɛbo, adwenle nee adwinli ngakyile muala anwo adwenle,

⁴mɔɔ ɔkola ɔfa ezukoa nvutuke, dwɛtɛ fufule, yɛɛ kɔbele ɔdi adwinli,

⁵ɔsiezie awolɛ nwo, ɔse mbaka, na ɔdi adwinli ngakyile biala a.

⁶Eza meye Ahesamake ara nrenya Oholeabe noko mɔɔ vi Dan abusua ekpunli ne anu la kɛ ɔ nee ye ɛyɛ gyima. Eza memaa dwinvolɛma gyɛne gyɛne adwenle kpole, amaa bɛahola debie biala mɔɔ meze wɔ kɛ ɛyɛ la yɛ.

⁷Ɛdɛnkɛma Ndanlɛ Sua ne, Ngyekyeleɛ Ɛlɛka ne nee anwunvɔnezelɛ ebia ne mɔɔ dua zolɛ la, yɛɛ Ndanlɛ Sua ne anu ɛziezielɛ ninyɛne kɔsɔɔti,

⁸ɛkponle ne nee nwolɛ ninyɛne kɔsɔɔti, ɛyɛlɛ ɛyelalɛ azukponle ne,

⁹ɛyelalɛ azubɔlɛ azukponle ne nee nwolɛ ninyɛne, kyɛnze ne mɔɔ bɛwowo bɛ sa nee bɛ gyakɛ anwo nuhua nee ɔ bo ne,

¹⁰Aalɔn nee ɔ mra mrenya ne mɔ sɛlɛvolɛ adɛladeɛ ngɛnlɛma ne mɔ mɔɔ bɛbawula bɛazonle la,

¹¹ɛkpokpalɛ nwole ne, yɛɛ Ɛleka Nwuanzanwuanza ne ɛyɛlɛ evuanlɛ ne; ninyɛne ɛhye mɔ kɔsɔɔti, ɔwɔ kɛ bɛyɛ bɛ kɛ mɔɔ meze wɔ la.”

¹²Ɛdɛnkɛma zele Mosisi kɛ,

¹³“Ka kile Yizilayɛma kɛ: Bɛzie me Ɛnwomenlelielɛ Kenle ne, ɔboalekɛ ɔle sɛkɛlɛneɛ ɔmaa bɛ nee medame wɔ mekɛ mɔɔ bara la amuala kɛ medame, Ɛdɛnkɛma a mede bɛ nwo meyɛ bɛ me menli a.

¹⁴Bɛzie Ɛnwomenlelielɛ Kenle ne, ɔboalekɛ ɔle nwuanzanwuanza. Awie biala mɔɔ anzie Kenle ne la, ɔwɔ kɛ bɛku ye. Awie biala mɔɔ kɛyɛ gyima wɔ nu la, ɔwɔ kɛ bɛye ye bɛfi ye menli avinli.

¹⁵Kenle nsia yɛɛ ɔwɔ kɛ bɛfa bɛyɛ gyima a, na kenle ne mɔɔ tɔ zolɛ nsuu ne la le Ɛnwomenlelielɛ Kenle, bɛdu bɛzie ɛkɛ bɛmaa me. Awie biala mɔɔ kɛyɛ gyima kenle ko ne la, ɔwɔ kɛ bɛku ye.

¹⁶Ɔwɔ kɛ Yizilayɛma sie kenle ɛhye mekɛ biala, bɛkile kɛ ɔle ngyekyeleɛ mɔɔ bɛntulu ye ɛlɛ la anwo sɛkɛlɛneɛ.

¹⁷Ɔle sɛkɛlɛneɛ mɔɔ ɛnlɛ awieleɛ mɔɔ wɔ Yizilayɛma nee medame yɛ avinli a, ɔboalekɛ medame, Ɛdɛnkɛma, menvale kenle nsia membɔle anwuma nee aze, ye kenle nsuu ne azo, mengyakyile gyima menliele me ɛnwomenle.”

¹⁸Mɔɔ Nyamenle wiele tendɛ kile Mosisi wɔ Saenae Boka ne azo la, ɔvale awolɛ ndɛbandɛba nwiɔ ne mɔɔ Nyamenle mumua ne ɛva ɔ sa ɛrɛlɛsɛka ɛhɛlɛ mɛla ne mɔ zolɛ la ɔmanle Mosisi.