Read Nzema Ade 33 Bible Online

Ade 33 - Nzema bible

Ade 33

¹Ɛdɛnkɛma zele Mosisi kɛ, “Fa menli ne mɔɔ ɛ nee bɛ vi Yigyibiti azɛlɛ zo ɛra la fi ɛke kɔ azɛlɛ ne mɔɔ menganle ndane menvale membɔle Ebileham, Ayezeke, nee Gyekɔbo ɛwɔkɛ kɛ, mebava meamaa bɛ bo zo amra la azo.

²Mebamaa Nyamenle soanvolɛ ali bɛ nyunlu, na meavoa Keenama, Amɔlema, Hɛtema, Pɛlɛzema, Haevaema, yɛɛ Gyibɛsema.

³Bɛhɔ azɛlɛ ne mɔɔ kye aleɛ la azo; na mame, me nee bɛ ɛnrɛhɔ, anrɛɛ menwɔbɔ bɛ bo zo wɔ adenle nu, ɔluakɛ bɛle menli mɔɔ anzo yɛ se a.”

⁴Mɔɔ menli ne dele amaneɛ ɛtane ɛhye la, bɛlile nyane, bɛanva bɛ anwoneɛ ne mɔ bɛanziezie bɛ nwo bieko.

⁵Ɔluakɛ ɛnee Ɛdɛnkɛma ɛha ɛhile Mosisi kɛ, “Ka kile Yizilayɛma kɛ, ‘Bɛle menli anzosesebɛma mɔɔ saa me nee bɛ tudu agyakɛ ekyii bɔbɔ a, mebabɔ bɛ bo zo a. Yemɔti bɛyeye bɛ anwoneɛ ne mɔ mɔɔ bɛva bɛziezie bɛ nwo la, amaa meanwu kɛ mesi meayɛ bɛ la.’ ”

⁶Yemɔti mɔɔ Yizilayɛma ne vile Saenae Boka la bɛyeyele bɛ anwoneɛ ne mɔ kɔsɔɔti.

⁷Saa Yizilayɛma yɛ azokoɛleɛ biala a Mosisi sie Ndanlɛ Sua ne maa ɔ nee azokoɛleɛ ne avinli twe; na ɔvɛlɛle ye Ɛdɛnkɛma Nyianu Ndanlɛ Sua. Awie biala mɔɔ kpondɛ kɛ ɔbiza Ɛdɛnkɛma debie la kɔ Nyianu Ndanlɛ Sua ne mɔɔ wɔ azokoɛleɛ ne kandiba la anu.

⁸Mekɛ biala mɔɔ Mosisi kɛze kɛ ɔkɔ Ndanlɛ Sua ne anu la, menli ne kɔsɔɔti dwazo gyinlegyinla bɛ ndanlɛ azua ne nlenkɛ ne mɔ anloa nea ye toonwo ɔkɔwolo nu.

⁹Kɛ Mosisi wolo Ndanlɛ Sua ne anu la, ɛnee amungu mpila ne ɛdwu aze ɛragyinla Ndanlɛ Sua ne anlenkɛ ne anloa, na Ɛdɛnkɛma adendɛ ahile Mosisi wɔ amungu ne anu.

¹⁰Saa menli ne mɔ nwu kɛ amungu mpila ne gyi Ndanlɛ Sua ne anlenkɛ ne anloa a, ɛnee bɛ kɔsɔɔti bɛdwazo bɛgyinlegyinla bɛ nlenkɛ ne mɔ anloa bɛlɛsonle.

¹¹Ɛdɛnkɛma luale adenle zɛhae anu dendɛle hilele Mosisi, kɛmɔ sonla si tendɛ kile ɔ gɔnwo ala la. Saa Mosisi sia ba azokoɛleɛ ɛkɛ ne bieko a, ye sonvolɛ kpavolɛ ne, Nɛn ara nrenya Dwɔhyua ɛnvi Ndanlɛ Sua ne anu fee.

¹²Mosisi hanle hilele Ɛdɛnkɛma kɛ, “Nɔhalɛ, wɔze me kɛ, ‘Di menli ɛhye ati fa bɛ kɔ azɛlɛ zɔhane azo’ noko ahenle mɔɔ baboka me la, ɛtɛkanle. Wɔze me kɛ ɛze me kpalɛ kpalɛ, yɛɛ eza mezɔ ɛ nye.

¹³Yemɔti mesɛlɛ wɔ, saa mezɔ ɛ nye ɛdeɛ a, ɛnee kile me wɔ ndenle ne mɔ, amaa meazonle wɔ na meazɔ ɛ nye dahuu. Eza kakye kɛ maanle ɛhye le wɔ menli.”

¹⁴Ɛdɛnkɛma zele kɛ, “Me nee wɔ bahɔ, yɛɛ mebamaa ɛ nzo nu adwo wɔ.”

¹⁵Mosisi buale ye kɛ, “Saa ɛ nee yɛ ɛnrɛhɔ ɛdeɛ a, ɛnee mmamaa yɛfi ɛke.

¹⁶Ɔluakɛ, kɛ ɔkɛyɛ na bɛanwu kɛ medame nee wɔ menli ne yɛsɔ ɛ nye ɛ? Wɔ ɛlualɛ mɔɔ ɛ nee yɛ lua la yɛɛ maa menli nwu ngakyile mɔɔ wɔ yɛ nee menli gyɛne gyɛne mɔɔ wɔ aleɛabo la avinli a.”

¹⁷Na Ɛdɛnkɛma zele Mosisi kɛ, “Edwɛkɛ kpɔkɛ ko ɛhye mɔɔ wɔha la ati, me nee bɛ bahɔ, ɔluakɛ meze wɔ kpalɛ kpalɛ, yɛɛ wɔzɔ me nye.”

¹⁸Mosisi bodole ye kɛ, “Mesɛlɛ wɔ, kile me wɔ anyunlunyia ne.”

¹⁹ Ɛdɛnkɛma buale ye kɛ, “Mebamaa me wienyi kpole ne ada ɛ nwo zo, na meado me duma ‘Ɛdɛnkɛma’ ne kpaanu meahile wɔ. Mebayɛ menli mɔɔ ɔwɔ kɛ meyɛ bɛ boɛ la boɛ, na meaze menli mɔɔ ɔwɔ kɛ mese bɛ anwunvɔne la anwunvɔne.

²⁰Noko akee ɛnrɛnwu me nyunlu, ɔluakɛ awie biala ɛnrɛnwu me nyunlu na ɔnrɛdɛnla ngoane nu.

²¹Nea, bodane bie wɔ me foa ko ɛke mɔɔ ɛbagyinla zolɛ a.

²²Mekɛ mɔɔ me anyunlunyia ne kɛze kɛ ɔpɛ nu la, mebava wɔ meawula bodane ne kuma bie anu, meava me sa meaheda zolɛ kɔkpula kɛ menwɔpɛ nu menwɔze la.

²³Akee mebaye me sa, ɛbanwu me kɔme anzi, na me nyunlu ɛdeɛ, ɛnrɛnwu ye.”