Read Nzema Ade 35 Bible Online

Ade 35 - Nzema bible

Ade 35

¹Mosisi yiale Yizilayɛma kɔsɔɔti na ɔhanle ɔhilele bɛ kɛ, “Debie mɔɔ Ɛdɛnkɛma se bɛyɛ la ɛne:

² Bɛva kenle nsia bɛyɛ bɛ gyima, na kenle nsuu ne le Ɛnwomenlelielɛ Kenle. Ɔle kenle nwuanzanwuanza mɔɔ bɛdu bɛzie ɛkɛ bɛmaa Ɛdɛnkɛma a. Awie biala mɔɔ kɛyɛ gyima kenle ko ne la, ɔwɔ kɛ bɛku ye.

³Senle bɔbɔ, bɛmmawuda bie bɛ azua nu wɔ Ɛnwomenlelielɛ Kenle ne.”

⁴Mosisi hanle hilele Yizilayɛma kɔsɔɔti kɛ, “Debie mɔɔ Ɛdɛnkɛma se bɛyɛ la ɛne:

⁵Awie biala ɛbɔ azu ɛmaa Ɛdɛnkɛma. Awie biala mɔɔ ɔdaye ɔkulo la ɛva azubɔdeɛ ɛrɛlɛ Ɛdɛnkɛma: azubɔdeɛ mɔɔ le kɛ ezukoa nvutuke, dwɛtɛ fufule, yɛɛ kɔbele;

⁶mboane enrinli buluwu, buluwu nee kɔkɔlɛ afonla, nee kɔkɔlɛ; lenen ɛdanlɛ nyɛma, ɛdanlɛ mɔɔ bɛva mbɔnkye enrinli bɛnwo;

⁷mboane nyinli nwoma mɔɔ bɛwula bɛ ayile kɔkɔlɛ, nee mbɔnkye nwoma; akasea mbaka;

⁸kɛnlaneɛ nwole; ninyɛne mɔɔ bɛfa bɛyɛ ɛkpokpalɛ nwole nee ɛyɛlɛ evuanlɛ;

⁹kanɛlea nee ezukoa awolɛ ngakyile mɔɔ bɛfa bɛbobɔ Sɛlɛvolɛ Kpanyinli ne ɛzonlenlɛ tɛladeɛ ne mɔɔ bɛfɛlɛ ye yifɔdo nee akɛnrazo aguzo ne mɔ anu la.

¹⁰“Menli mɔɔ ze adwinli di wɔ bɛ nu la ɛrayɛ debie biala mɔɔ Ɛdɛnkɛma ɛha la.

¹¹Ndanlɛ Sua ne, debie mɔɔ bɛfa bɛwowa ɔ kunlu nee ɔ nzi, ye nzosɔnu ne mɔ, ye ɛgyinlanlɛ felɛmo ne mɔ, ye ndaboa mɔɔ bɛfa bɛbeɛbea nu, ye mbaka sika nee bɛ adiabo ne mɔ;

¹²Ngyekyeleɛ Ɛlɛka ne nee ye mbaka ne mɔ, ye nduazo ne nee mgbɛnu ndanlɛ ne;

¹³ɛkponle ne, ye mbaka ne mɔ, nee nwolɛ ahyɛnze ne mɔ; kpanwo mɔɔ bɛfa bɛbɔ azu bɛmaa Nyamenle;

¹⁴ahɛnlaneɛ ne mɔ, kɛnlaneɛ baka ne, ahɛnlaneɛ ninyɛne ne mɔ, nee nwolɛ nwole;

¹⁵ɛyɛlɛ ɛyelalɛ azukponle ne nee ye mbaka ne mɔ, ɛkpokpalɛ nwole ne; ɛyɛlɛ evuanlɛ ne; Ndanlɛ Sua ne anlenkɛ ne anloa ɛdanlɛ ne;

¹⁶azukponle ne mɔɔ bɛyela azubɔdeɛ ne mɔ zolɛ, nee ye kɔbele kɛlakɛlɛ ne, ye mbaka ne mɔ nee nwolɛ ninyɛne; kyɛnze kuloonwu ne mɔɔ bɛwowo bɛ sa nee bɛ gyakɛ anwo nu la nee ɔ bo ne;

¹⁷alie ne anwo ɛwowalɛ ndanlɛ ne mɔ, ye mbaka sika ne mɔ nee bɛ adiabo ne mɔ; alie ne anwo anuhɔlɛ ɛdanlɛ ne,

¹⁸Ndanlɛ Sua ne nee alie ne anwo bane ne adakola ne mɔ nee mɛkaleɛ ne mɔ,

¹⁹yɛɛ sɛlɛvolɛma adɛladeɛ nwuanzanwuanza ne mɔ mɔɔ Aalɔn nee ɔ mra mrenya ne mɔ bawula azonle wɔ Ɛleka Nwuanzanwuanza ne la.”

²⁰Akee Yizilayɛma kɔsɔɔti vile Mosisi anwo ɛkɛ.

²¹Bɛdabɛ mɔɔ bɛ sunsum manle bɛ anwosesebɛ la, yeyele bɛ ahonle nu vale bɛ azubɔdeɛ ne mɔ rɛlɛle Ɛdɛnkɛma kɛ bɛva bɛzi Nyianu Ndanlɛ Sua ne. Bɛvale debie biala mɔɔ hyia wɔ ye ɛzonlenlɛ nu nee ninyɛne mɔɔ bɛfa bɛnwo sɛlɛvolɛma adɛladeɛ ne mɔ la bɛrale.

²²Awie biala, mraalɛ nee mrenya mɔɔ kulo la vale anwoneɛ, bɛ bonyi nu ngɛba, asomadeɛ, mgbɔdelera nee ngɛba, bɛ kɔme nu ndweabane, nee ezukoa nvutuke anwoneɛ ngakyile radole ehono bɔle azu manle Ɛdɛnkɛma.

²³Awie biala mɔɔ lɛ mboane enrinli buluwu anzɛɛ buluwu nee kɔkɔlɛ afonla anzɛɛ kɔkɔlɛ, lenen nyɛma kɛnlɛma, mbɔnkye enrinli, yɛɛ mboane anzɛɛ mbɔnkye nwoma mɔɔ bɛwula bɛ ayile la vale rale.

²⁴Awie biala mɔɔ lɛ dwɛtɛ fufule anzɛɛ kɔbele azubɔdeɛ la vale rabɔle azu manle Ɛdɛnkɛma. Awie biala noko mɔɔ lɛ akasea baka mɔɔ bɛfa bɛyɛ gyima ne anwo debie biala a ɔyɛ boɛ la vale rale.

²⁵Mraalɛ mɔɔ ze ninyɛne nwo la yɛle ɛdanlɛnwolɛ nyɛma buluwu, buluwu nee kɔkɔlɛ afonla, nee kɔkɔlɛ, yɛɛ lenen nyɛma rale.

²⁶Mraalɛ noko mɔɔ kola la vale mbɔnkye enrinli nwonle nyɛma.

²⁷Mgbanyima ne mɔ vale kanɛlea awolɛ nee ezukoa awolɛ gyɛne gyɛne rale kɛ bɛva bɛbobɔ ɛzonlenlɛ tɛladeɛ ne nee akɛnrazo aguzo ne mɔ anu,

²⁸eza bɛvale ninyɛne evuanlɛ, nwole mɔɔ bɛfa bɛsɔ kɛnlaneɛ, nee mɔɔ bɛfa bɛyɛ ɛkpokpalɛ nwole la, yɛɛ ɛyɛlɛ evuanlɛ bɛrale.

²⁹Yizilayɛma kɔsɔɔti, mraalɛ nee mrenya mɔɔ lɛ ɛhulolɛ la yeyele bɛ ahonle nu vale bɛ azubɔdeɛ rɛlɛle Ɛdɛnkɛma manle bɛvale bɛyɛle gyima ne mɔɔ ɔzele Mosisi kɛ ɔyɛ la.

³⁰Mosisi hanle hilele Yizilayɛma kɛ, “Bɛnlea, Ɛdɛnkɛma ɛnlea nu ɛye Yulae ara nrenya Bɛzalii, Huuli anlɔnra ne mɔɔ vi Dwuda abusua ekpunli ne anu la,

³¹na yeva Nyamenle Sunsum ne yeyi ye tɛkɛɛ, yemaa ye anwosesebɛ nee ndelebɛbo, adwenle nee adwinlililɛ ngakyile kɔsɔɔti,

³²mɔɔ bɛfa ezukoa nvutuke, dwɛtɛ fufule nee kɔbele bɛdi la,

³³anwoneɛ ɛyɛlɛ, awolɛ nee mbaka ɛzelɛ, nee adwinli ngakyile biala anwo nrɛlɛbɛ.

³⁴Ɛdɛnkɛma ɛmaa ye anwosesebɛ kɛ ɔhile ɔdaye nee Ahesamake ara nrenya Oholeabe mɔɔ vi Dan abusua ekpunli ne anu la.

³⁵Yemaa bɛ nrɛlɛbɛ mɔɔ bɛkola bɛfa bɛdi adwinli biala, anwoneɛ nee awolɛ zo ɛhɛlɛlɛ, ninyɛne nu ɛnwolɛ, nee mboane enrinli buluwu, buluwu nee kɔkɔlɛ afonla, nee kɔkɔlɛ, yɛɛ lenen nyɛma ngɛnlɛma ndanlɛ ɛnwonlɛ. Yemɔti bɛkola bɛyɛ gyima ngakyile biala.