Read Nzema Ade 36 Bible Online

Ade 36 - Nzema bible

Ade 36

¹“Bɛzalii, Oholeabe, nee awie biala mɔɔ Ɛdɛnkɛma ɛmaa ye adwinlililɛ nwo nrɛlɛbɛ nee ndelebɛbo, na ɔze kɛ bɛsi bɛsi Ndanlɛ Sua Nwuanzanwuanza la ɔwɔ kɛ yɛ debie biala, kɛmɔ Ɛdɛnkɛma ɛhile la.”

²Mosisi vɛlɛle Bɛzalii, Oholeabe, nee dwinvolɛ biala mɔɔ Ɛdɛnkɛma ɛmaa ye adwinlililɛ nwo nrɛlɛbɛ na ɔlɛ ɛhulolɛ kpalɛ la kɛ bɛbɔ gyima ne abo.

³Mosisi vale azubɔdeɛ ne mɔ mɔɔ Yizilayɛma ɛva ɛra kɛ bɛva bɛzi Ndanlɛ Sua nwuanzanwuanza ne la kɔsɔɔti manle bɛ. Menli ne hɔle zolɛ vale azubɔdeɛ ninyɛne rɛlɛle Mosisi nwonlomɔ biala.

⁴Yemɔti dwinvolɛma mɔɔ ɛnee ɛlɛyɛ gyima ne la hɔle ekpunli ngoko

⁵hɔbɔle Mosisi amaneɛ kɛ, “Ninyɛne mɔɔ menli ne ɛlɛfa ara la akee bo gyima mumua ne mɔɔ Ɛdɛnkɛma ɛhile kɛ yɛyɛ la azo.”

⁶Yemɔti Mosisi manle bɛbɔle nolo wɔ azokoɛleɛ ne kɛ, “Nrenya anzɛɛ raalɛ biala mmafa Ndanlɛ Sua nwuanzanwuanza ne ɛzilɛ nwo azubɔdeɛ bieko ba.” Yemɔti menli ne anva bieko amba.

⁷Ninyɛne mɔɔ ɛnee bɛ nee bɛ ɛra la bo gyima ne azo.

⁸Dwinvolɛma ne mɔɔ ze gyima kpalɛ kpalɛ la amuala vale mgbɛnu ndanlɛ bulu hyehyɛle Ndanlɛ Sua ne; bɛvale ndanlɛ mɔɔ bɛva lenen nyɛma kɛnlɛma, mboane enrinli buluwu, buluwu nee kɔkɔlɛ afonla, nee kɔkɔlɛ bɛnwo na bɛnwo abɔdeɛ mɔɔ lɛ ndɛbalɛ la bɛgua nu la a bɛzile sua ne a.

⁹Ndanlɛ ne mɔ amuala sɛ mgbole, ko biala tendenle le mita bulu nee nwiɔ yɛɛ ye tɛtɛlɛ le mita nwiɔ.

¹⁰Bɛvale nnu bɛbɔle nwolɛ bɛkpomgbale ye mumua ko, yɛɛ eza bɛvale nnu ne noko bɛbɔle nwolɛ bɛkpomgbale.

¹¹Bɛvale ɛdanlɛ buluwu bɛkpomgbale bɛbɔle ahotosalɛ bɛsosɔle mɔɔ tɔ zolɛ nwiɔ ne la a.

¹²Bɛbɔle ahotosalɛ abulanlu bɛsosɔle alumua ɛdeɛ ne mɔɔ bɛbɔle bɛ nwolɛ la anloa na eza bɛabɔ abulanlu bɛasosɔ amozi ɛdeɛ ne noko mɔɔ bɛbɔle bɛ nwolɛ la anloa. Mgbɛnu ndanlɛ fane nwiɔ ne anloa ahotosalɛ ne mɔ, ko biala nee ɔ gɔnwo anye bɔ zo.

¹³Bɛyɛle ezukoa nvutuke nzosɔnu abulanlu bɛvale bɛsosɔle mgbɛnu ndanlɛ fane nwiɔ ne ahotosalɛ ne mɔ bɛmanle ɛdanlɛ ne yɛle mumua ko.

¹⁴Bɛvale mgbɛnu ndanlɛ mɔɔ bɛva mbɔnkye enrinli bɛnwo la azinli bulu nee ko bɛbɔle bɛ nwolɛ bɛvale bɛhedale Ndanlɛ Sua ne azo.

¹⁵Bɛ muala bɛ mgbole sɛ, ko biala tendenle le mita bulu nee nsa, yɛɛ ye tɛtɛlɛ le mita nwiɔ.

¹⁶Bɛvale azinli nnu bɛbɔle nwolɛ bɛkpomgbale, yɛɛ bɛvale nsia ne noko bɛbɔle nwolɛ bɛkpomgbale.

¹⁷Bɛbɔle ndanlɛ azinli ahotosalɛ abulanlu bɛsosɔle alumua ɛdeɛ ne anloa, yɛɛ bɛvale abulanlu noko bɛsosɔle amozi ɛdeɛ ne noko anloa.

¹⁸Bɛvale kɔbele bɛyɛle nzosɔnu abulanlu bɛsosɔle ndanlɛ nwiɔ ne bɛyɛle ye debie mumua ko.

¹⁹Akee bɛvale mboane nee mbɔnkye nwoma mɔɔ bɛwula ye ayile la bɛhedale sua ne azo.

²⁰Bɛvale akasea mbaka felɛmo bɛgyinlanle Ndanlɛ Sua ne.

²¹Felɛmo ko anwumahɔlɛ le mita nna yɛɛ ye tɛtɛlɛ le mita foa ko nee ekyi.

²²Bɛmanle ko biala ɛsalɛ nwiɔ, amaa bɛfa bɛ bɛabobɔ nwo a yeayɛ boɛ.

²³Bɛgyinlanle felɛmo abulanwiɔ wɔ nyiakɛ afoa nu,

²⁴yɛɛ bɛvale dwɛtɛ fufule bɛyɛle adiabo abulanla bɛzieziele bɛ zolɛ. Felɛmo ko biala lɛ adiabo nwiɔ mɔɔ sosɔ ɔ sa ne mɔ anu a.

²⁵Bɛgyinlanle felɛmo ne abulanwiɔ wɔ sɔlɔ afoa nu,

²⁶yɛɛ bɛziele bɛ adiabo abulanla zo. Felɛmo ko biala lɛ adiabo nwiɔ.

²⁷Adɔleɛ afoa nu, bɛyɛle nlenkɛ felɛmo nsia,

²⁸yɛɛ bɛyɛle nwiɔ wɔ ye mgbɛnezo nwiɔ ne mɔɔ wɔ ɔ nzi la.

²⁹Mgbɛnezo felɛmo nwiɔ ne, bɛbɔle bɛ nwo anwuma toonwo ɔdwule aze. Bɛyɛle felɛmo nwiɔ zɛhae wɔ sua ne mgbɛnezo nwiɔ ne azo.

³⁰Yemɔti felɛmo ne mɔ le mɔtwɛ yɛɛ dwɛtɛ fufule adiabo bulu nee nsia, felɛmo ko biala gyi adiabo nwiɔ azo.

³¹Bɛzele akasea mbaka mɔɔ bɛfa bɛbeɛbea nu la bulu nee nnu, Ndanlɛ Sua ne tɛbanu ko ɛdeɛ nnu,

³²ye tɛbanu ko noko ɛdeɛ nnu, yɛɛ ɔ nzi adɔleɛ afoa nu ɛdeɛ nnu.

³³Baka ne mɔɔ bea Ndanlɛ Sua ne bane ne mɔ avinli la vi bane nwo kɔkpula bane nwo, yɛɛ ɔbea felɛmo ne mɔ avinli.

³⁴Bɛvale ezukoa nvutuke bɛfɔlele felɛmo ne mɔ anwo, na bɛava ezukoa nvutuke ngɛba bɛasosɔ bɛ, amaa bɛava mbaka ne mɔ mɔɔ beɛbea avinli mɔɔ ezukoa nvutuke fɔle nwolɛ la bɛawulowula nu.

³⁵Bɛvale mboane enrinli buluwu, buluwu nee kɔkɔlɛ afonla, nee kɔkɔlɛ yɛɛ lenen nyɛma kɛnlɛma bɛnwonle ngbɛnu ɛdanlɛ ne na bɛnwonle abɔdeɛ mɔɔ lɛ ndɛbalɛ la bɛguale nu.

³⁶Bɛzele akasea mbaka nna, bɛvale ezukoa nvutuke bɛfɔlele nwolɛ, bɛvale bie nzosɔnu bɛsosɔle bɛ na bɛvale mgbɛnu ɛdanlɛ ne bɛhendanle bɛ. Akee bɛyɛle dwɛtɛ fufule adiabo nna na bɛvale mbaka ne mɔ bɛzieziele zolɛ.

³⁷Bɛvale ɛdanlɛ kɛnlɛma mɔɔ bɛva mboane enrinli buluwu, buluwu nee kɔkɔlɛ afonla, nee kɔkɔlɛ yɛɛ lenen nyɛma kpalɛ bɛnwo na bɛnwo nuhua la bɛkpomgbale ɛdanlɛ bɛhendanle Ndanlɛ Sua ne anlenkɛ ne anloa.

³⁸Ɛdanlɛ ɛhye, bɛzele mbaka nnu bɛvale nzosɔnu bɛsosɔle bɛ, bɛvale ezukoa nvutuke bɛfɔlele bɛ ti nee mbaka mumua ne mɔ anwo na bɛyɛle kɔbele adiabo nnu bɛvale ye mbaka ne mɔ bɛzieziele zolɛ.