Read Nzema Ade 37 Bible Online

Ade 37 - Nzema bible

Ade 37

¹Bɛzalii vale akasea ndaboa bobɔle Ngyekyeleɛ Ɛlɛka ne. Ye tendenle le mita ko, ye tɛtɛlɛ le mita foa ko nee ekyi, yɛɛ ye anwumahɔlɛ le mita foa ko nee ekyi.

²Ɔvale ezukoa nvutuke tagyee ɔfɔlele ɔ kunlu nee nwolɛ na ɔvale ezukoa nvutuke ɔdole ɔ nloa kɛba ɔyiale.

³Ɔvale ezukoa nvutuke ɔyɛle ngɛba nna mɔɔ bɛbava mbaka bɛawulowula nu bɛazoa la ɔsosɔle ye mgbɛnezo nna ne, nwiɔ wɔ ye tɛbanu yɛɛ nwiɔ wɔ ye tɛbanu.

⁴Ɔvale akasea mbaka ɔzele mbaka mɔɔ bɛfa bɛsoa la na ɔvale ezukoa nvutuke ɔfɔlele nwolɛ

⁵na ɔvale ɔwulowulale ngɛba ne mɔ mɔɔ wɔ Ngyekyeleɛ Ɛlɛka ne tɛbanu nee ye tɛbanu la anu.

⁶Ɔvale ezukoa nvutuke tagyee ɔyɛle ɛlɛka ne ati. Ye tendenle le mita ko yɛɛ ye tɛtɛlɛ le mita foa ko nee ekyi.

⁷Ɔbolole ezukoa nvutuke tagyee ɔyɛle abɔdeɛ nwiɔ mɔɔ ko lɛ ndɛbalɛ nwiɔ la.

⁸Ɔvale bɛ ɔzieziele tile ne ati nee ɔ ti. Ɔvale bɛ ɔfoamonle zolɛ ɔmanle bɛ nee tile ne yɛle debie ko.

⁹Abɔdeɛ nwiɔ ne mɔɔ lɛ ndɛbalɛ la anye bɔ zo, na bɛ ndɛba ne mɔ mɔɔ bɛdɛlɛdɛlɛ nu la keda tile ne azo.

¹⁰Bɛzalii eza vale akasea ndaboa bobɔle ɛkponle. Ye tendenle le asɛɛ mita nwiɔ, ye tɛtɛlɛ le asɛɛ mita foa ko, yɛɛ ye anwumahɔlɛ le mita foa ko nee ekyi.

¹¹Ɔvale ezukoa nvutuke ɔfɔlele nwolɛ na ɔvale bie ɔdole ɔ nloa ɔyiale.

¹²Ɔdole ɔ nloa kɛba mɔɔ ye tɛtɛlɛ kɛyɛ ɛsalɛ ɛrɛlɛsɛka nsa na ɔvale ezukoa nvutuke ɔfɔlele nwo.

¹³Ɔyɛle ngɛba mɔɔ bɛfa mbaka bɛwulowula nu na bɛazoa la nna ɔsosɔle ɔ bati nna ne, ɛleka mɔɔ ɔ gyakɛ ne mɔ wɔ la.

¹⁴Ɔvale ngɛba ne mɔ mɔɔ bɛbava mbaka ne bɛawulowula nu bɛazoa la ɔsosɔle ɔ nloa kɛba ne.

¹⁵Ɔvale akasea ndaboa ɔzele mbaka ne mɔ mɔɔ bɛbava bɛazoa ɛkponle ne la na yeava ezukoa nvutuke yeafɔle nwolɛ.

¹⁶Ɔvale ezukoa nvutuke tagyee ɔyɛle ɛkponle ne ahyɛnze ne mɔ, agbɛlɛte, ahanrɛlɛ, dwora ne mɔ, nee ahyɛnze kuloonwu mɔɔ bɛfa nwanye azubɔdeɛ bɛgua nu bɛye ɛdɛne, nee mɔɔ bɛfa ɛyɛlɛ evuanlɛ bɛgua nu la.

¹⁷Ɔvale hamenle ɔbolole ezukoa nvutuke tagyee ɔyɛle kɛnlaneɛ baka ne abo ne nee ye baka mumua ne; ɔvale bie ɔyɛle ndotolo nee ye nya ne mɔ, na ɔvale bɛ muala ɔbɔle nu ɔyɛle bɛ debie ko.

¹⁸Kɛnlaneɛ baka ne lɛ ngane nsia, nsa wɔ ye foa ko yɛɛ nsa noko wɔ ye foa ko.

¹⁹Ngane nsa ne mɔɔ wɔ foa ko nee foa ko la, bɛyɛ ahɔpo mɔɔ lɛ nduazo na bɛyɛ bɛ kɛ alemɔndo ndotolo mɔɔ ɛkpuke na yeye nya la bɛziezie zolɛ.

²⁰Kɛnlaneɛ baka mumua ne, bɛyɛ ahɔpo nna mɔɔ lɛ nduazo na bɛyɛ bɛ kɛ alemɔndo ndotolo mɔɔ ɛkpuke la bɛziezie zolɛ.

²¹Nya ɛdɛkɛ ko wɔ ngane nwiɔ biala abo.

²²Nya ne mɔ, ngane ne mɔ, nee kɛnlaneɛ baka ne, bɛvale ezukoa nvutuke tagyee mɔɔ bɛva hamenle bɛbolo la bɛyɛle bɛ debie ko.

²³Ɔyɛle kɛnlaneɛ baka ne anwo ahɛnlaneɛ nsuu, yɛɛ ɔvale ezukoa nvutuke tagyee ɔyɛle nwolɛ dabekɛ nee ahyɛnze ndɛbandɛba.

²⁴Ɔvale ezukoa nvutuke tagyee kilo abulasa nee nnu a ɔyɛle kɛnlaneɛ baka ne nee nwolɛ ninyɛne ne mɔ kɔsɔɔti a.

²⁵Ɔvale akasea ndaboa ɔbobɔle azukponle mɔɔ bɛyela ɛyɛlɛ wɔ zo la. Ye tɛbanu ne mɔ amuala sɛ, ye tendenle le asɛɛ mita foa ko, ye tɛtɛlɛ le asɛɛ mita foa ko, yɛɛ ye anwumahɔlɛ le asɛɛ mita ko. Bɛyɛle bɛmanle ɔ nee ɔ bati nna ne azo kpokpɔkoo ne mɔ nee ye yɛle debie ko.

²⁶Ɔvale ezukoa nvutuke tagyee ɔfɔlele zolɛ, ye tɛbanu nna ne mɔ, nee ɔ bati kpokpɔkoo ne mɔ anwo, na ɔvale bie ɔdole ɔ nloa kɛba ɔyiale.

²⁷Ɔvale ezukoa nvutuke ɔyɛle ngɛba mɔɔ bɛbava mbaka mɔɔ bɛfa bɛsoa la bɛawulowula nu la ɔsosɔle ezukoa nvutuke ne mɔɔ ɔvale ɔdole ɔ nloa la abo wɔ ye tɛbanu nee ye tɛbanu.

²⁸Ɔvale akasea ndaboa a ɔzele mbaka ne mɔɔ bɛbava bɛazoa la na yeava nvutuke yeafɔle nwolɛ.

²⁹Ɔyɛle ɛkpokpalɛ nwole nwuanzanwuanza ne nee ɛyɛlɛ evuanlɛ ne kɛnlɛma kpalɛ kɛ mɔɔ menli mɔɔ yɛ ninyɛne evuanlɛ la kɛyɛ ala la.