Read Nzema Ade 5 Bible Online

Ade 5 - Nzema bible

Ade 5

¹Nzinlii Mosisi nee Aalɔn hɔle Yigyibiti belemgbunli ne ɛkɛ hɔzele ye kɛ, “Kɛ Ɛdɛnkɛma, Yizilayɛ Nyamenle ne se la ɛne, ‘Maa me menli ne ɛhɔ, amaa bɛali ɛvoyia wɔ fienemgbole ne anu bɛawula me anyunlunyia.’ ”

²Na belemgbunli ne bizale bɛ kɛ, “Ɛdɛnkɛma a le nwane, mɔɔ ɔwɔ kɛ metie ye na memaa Yizilayɛma kɔ a? Menze Ɛdɛnkɛma; yɛɛ akee bɔbɔ menrɛmaa Yizilayɛma ɛnrɛhɔ fee.”

³Mosisi nee Aalɔn buale kɛ, “Hibuluma Nyamenle ne nee yɛ ɛyɛ nyianu; yɛsɛlɛ wɔ, maa yɛ adenle maa yɛdia kenle nsa adenle yɛhɔ fienemgbole ne anu yɛhɔbɔ azu yɛmaa Ɛdɛnkɛma yɛ Nyamenle ne, anrɛɛ ɔkɛde ewule ɔkɛkponde yɛ nwo ɔkɛhu yɛ anzɛɛ ɔkɛhwe yɛ nwo dadeɛ.”

⁴Na Yigyibiti belemgbunli ne zele kɛ, “Mosisi, ɛ nee Aalɔn, duzu ati yɛɛ bɛkulo kɛ bɛye menli ne bɛfi gyima mɔɔ bɛgyi nwolɛ la anwo ɛ? Bɛhɔyɛ bɛ gyima.”

⁵Na belemgbunli ne hanle kɛ, “Bɛnlea, akee menli ne ɛzo somaa na bɛkulo kɛ bɛgyakyi gyimayɛlɛ!”

⁶Kenle ko ne ala Yigyibiti belemgbunli ne zele gyima zo neavolɛma nee gyima nu mgbanyinli ne mɔ kɛ,

⁷“Ɔvi ɛnɛ mɔɔ kɔ la, bɛmmamaa menli ne atoko gyakɛ bɛmaa bɛfa bɛgua belekese ne mɔ; bɛmaa bɛdabɛ mumua ne bɛhɔkpondɛ bie.

⁸Kenle ko biala belekese dodo mɔɔ bɛgua la, bɛva bie bɛgua zolɛ, ɔluakɛ bɛ gyima ne anzo la ati, bɛsu kɛ, ‘Maa yɛ adenle maa yɛhɔbɔ azu yɛmaa yɛ Nyamenle ne!’

⁹Bɛzoa bɛ adesoa ɛnlomboɛ kpalɛ kpalɛ bɛmaa ɔhola bɛ, amaa bɛandie adalɛ edwɛkɛ biala.”

¹⁰Yemɔti gyima zo neavolɛma ne nee Yizilayɛ mgbanyinli mɔɔ nea gyimayɛlɛ ne la hɔhanle hilele menli ne kɛ, “Kɛ belemgbunli ne se la ɛne, ‘Menrɛmaa bɛ atoko gyakɛ.

¹¹Ɛleka biala mɔɔ bɛdabɛ bɛkɛhɔ na bɛanyia bie la bɛhɔ bɛhɔkpondɛ bie, yɛɛ bɛ gyima ne ɛdeɛ, bɛnrɛde zolɛ nretee zɛhae.’ ”

¹²Yemɔti menli ne kpondenle Yigyibiti azɛlɛ zo luoluale nuhua kpondɛle atoko gyakɛ.

¹³Gyima zo neavolɛma ne hanle bɛ nuhua kɛ, “Ɔwɔ kɛ bɛwie gyima ne. Ɔwɔ kɛ bɛyɛ gyima ne kɛmɔ bɛmaa bɛ atoko gyakɛ a bɛyɛ la.”

¹⁴Bɛbole Yizilayɛ mgbanyinli mɔɔ belemgbunli ne gyima zo neavolɛma ne yele bɛ kɛ bɛnlea bɛ menli ne anwo zo la, na bɛbizale bɛ kɛ, “Duzu ati a bɛanwie bɛ belekese gyima ne yɛ ɛnɛ, kɛmɔ bɛyɛ ye dɛba ne la ɛ?”

¹⁵Na Yizilayɛ mgbanyinli mɔɔ bɛyele bɛ kɛ bɛnlea bɛ menli ne anwo zo la razunle vuale belemgbunli ne kɛ, “Duzu ati a ɛbu wɔ sonvolɛma amaamuo zɛhae ɛ?

¹⁶Bɛmmaa wɔ sonvolɛma atoko gyakɛ, noko bɛse yɛ kɛ, ‘Bɛgua belekese,’ na bɛbo yɛ ɛbolɛ mɔɔ ɛnfɛta la. Nvonleɛ ne vi wɔ menli ne mɔ.”

¹⁷Na ɔzele bɛ kɛ, “Bɛle mgbovonle, bɛle mgbovonle somaa, yemɔti dahuu bɛse, ‘Maa yɛ adenle maa yɛhɔbɔ azu yɛmaa Ɛdɛnkɛma!’

¹⁸Bɛdwazo ɛkɛ ne bɛhɔyɛ gyima; awie biala ɛnrɛmaa bɛ atoko gyakɛ tanye, yɛɛ ɔwɔ kɛ bɛgua belekese dodo mɔɔ ɔwɔ kɛ kenle ko biala bɛgua la.”

¹⁹Yizilayɛ mgbanyinli mɔɔ nea gyimayɛvoma ne anwo zo la nwunle kɛ munzule ɛdo bɛ wɔ mekɛ mɔɔ bɛhanle bɛhilele bɛ kɛ, “Ɔwɔ kɛ bɛgua belekese dodo mɔɔ ɔwɔ kɛ kenle ko biala bɛgua la.”

²⁰Mɔɔ bɛvi belemgbunli ne ɛkɛ bɛlɛba la, bɛyiale Mosisi nee Aalɔn mɔɔ ɛnee ɛlɛkendɛ bɛ la.

²¹Na bɛhanle bɛhilele Mosisi nee Aalɔn kɛ, “Ɛdɛnkɛma ɛnlea na ɔbua bɛ ndɛne, ɔboalekɛ bɛmaa yɛyɛ ɛtane wɔ belemgbunli nee ye mgbanyima anyunlu, na bɛva yɛ ɛhunlɛ dadeɛ bɛwula bɛ sa nu.”

²²Na Mosisi hakyile ɔ nwo zele Ɛdɛnkɛma kɛ, “O Ɛdɛnkɛma, duzu ati a wɔmaa munzule ɛdo menli ɛhye mɔ a? Duzu ati a ɛzoanle me bɔbɔ a?

²³Ɔluakɛ sumunli kɛ membale belemgbunli ne ɛkɛ kɛ melua wɔ duma nu mebadendɛ la, ɛtane ala a yeva yeyɛ menli ne a, yɛɛ ɛtɛdiele bɛ fee.”