Read Nzema Dwo 1 Bible Online

Dwo 1 - Nzema bible

Dwo 1

¹Ɛnee nrenya bie wɔ Ɛɛze maanle nu. Bɛfɛlɛ ye Dwobu. Nrenya ɛhye anwo ɛnlɛ dɛne biala yɛɛ ɔle sonla fɔɔnwo, ɔdi nɔhalɛ ɔmaa Nyamenle, yɛɛ ɔkyi ɛtane.

²Ɔwole mralɛ mrenya nsuu yɛɛ mraalɛ nsa.

³Ɔlɛ mboane apenle nsuu, afunlumu apenle nsa, nlankɛ apenle ko, asoaso ɛya nnu, yɛɛ sonvolɛma dɔɔnwo; nrenya ɛhye le sukoavolɛ kpole tɛla awie biala mɔɔ wɔ Aduduleɛ la.

⁴Ɔ mra ne mɔ to ɛkponle bɛ ti ngoko. Saa ko biala mekɛ ɛdeɛ ne dwu a, ɔto ɛkponle na ɔfɛlɛvɛlɛ ɔ mediema mrenya ne mɔ nee bɛ mediema mraalɛ ne mɔ na bɛ nee bɛ di, no, dielie bɛ nye.

⁵Saa bɛto ɛkponle ne toonwo na ɔyia bɛ ti a, Dwobu fɛlɛ bɛ na ɔnua bɛ. Ɔdwazo aleɛbahye na ɔbɔ bɛ ti ngoko ɔfa nane ɔyela ɔbɔ azu, ɔluakɛ Dwobu edwɛkɛ a le kɛ, “Wɔannea a ɛnee me mra ne mɔ ɛyɛ ɛtane wɔ bɛ ahonle nu na bɛdendɛ ɛtane bɛtia Nyamenle.” Dwobu yɛle ɛhye mekɛ biala.

⁶ Kenle ko Nyamenle anzɛɛ Anwuma amra[1] hɔle Ɛdɛnkɛma anyunlu kɛ bɛkava bɛ nwo bɛahile ye, na Seetan[2] ɔdaye ɔhɔle ɛkɛ ne bie.

⁷Ɛdɛnkɛma bizale Seetan kɛ, “Na ɛvi nienwu yɛɛ wɔra ɛke a?” Seetan buale Ɛdɛnkɛma kɛ, “Mewɔ akpɔsa nu wɔ aleɛabo. Ewiade anu ala yɛɛ medi ye akɔneaba a.”

⁸Na Ɛdɛnkɛma zele Seetan kɛ, “Wɔnwu me sonvolɛ Dwobu, awie biala mɔɔ le kɛ ɔdaye la ɛnle aleɛabo, ɛtane biala ɛnle ɔ nwo yɛɛ ɔdi nɔhalɛ. Ɔsulo Nyamenle yɛɛ ɔtwe ɔ nwo ɔfi ɛtane nwo.”

⁹ Seetan buale Ɛdɛnkɛma kɛ, “Na mgbane ala yɛɛ Dwobu sulo Nyamenle a?

¹⁰Wɔbɔ ɔdaye, ɔ mra nee debie biala mɔɔ ɔlɛ la anwo bane. Dahuu ɛsinza ye, ye abusua ne nee debie biala mɔɔ ɔlɛ la. Wɔyila ɔ sa anloa gyima zo yɛɛ dahuu ye anwonyia ne, kpole ala a ɔyɛ a.

¹¹Saa ɛkulo a die debie biala mɔɔ ɔlɛ la fi ɔ sa nu na ɛkɛde mgbole mɔɔ ɔkɛheha ɔkɛtietia wɔ la.”

¹²Na Ɛdɛnkɛma zele Seetan kɛ, “Nea, debie biala mɔɔ ɔlɛ la wɔ ɛ sa nu, noko mmafa ɛ sa ɛka Dwobu ɛleka biala fee.” Akee Seetan vi Ɛdɛnkɛma anyunlu ɛkɛ ne hɔle.

¹³Kenle ko mɔɔ Dwobu amra ne mɔ, mrenya nee mraalɛ yiale ralɛ nrenya kpanyinli ne sua nu na bɛlɛdi, bɛno nwanye la,

¹⁴ɛbɔfoɔ rale Dwobu ɛkɛ razele ye kɛ, “Mɔɔ nlankɛ ne mɔ ɛlɛfundu azɛlɛ ne na asoaso ne mɔ noko ɛlɛdidi bɛ nwo ɛkɛ ne la,

¹⁵arɛlevilɛ nu ala, Sabima ralile yɛ nvunu hyehyele nlankɛ ne mɔ na bɛhunle sonvolɛma ne mɔ kɔsɔɔti. Me ngomekye ala a meha mɔɔ menriandi mera mebabɔ wɔ amaneɛ a.”

¹⁶Mɔɔ ɔ nloa wɔ zolɛ ɔlɛtendɛ la, ɛbɔfoɔ fofolɛ vindele ɛkɛ razele ye kɛ, “Nyamenle ɛkpakye ɛsɛnlɛmanye ɛhu mboane ne nee sonvolɛma ne mɔ kɔsɔɔti na yeyela bɛ wee. Me ngomekye ala a mevi nu mɔɔ mera mebabɔ wɔ amaneɛ a.”

¹⁷Ɔ nloa ampe ɛnee ɛbɔfoɔ bieko anyunlu ɛne. Ɔse, “Kaledima ɛhyɛ bɛ nu ekpunli nsa ɛrali yɛ nvunu, ɛhye afunlumu ne mɔ amuala ɛhɔ, na bɛhu sonvolɛma ne mɔ kɔsɔɔti. Me ngomekye ala a meha mɔɔ mera mebabɔ wɔ amaneɛ a.”

¹⁸Mɔɔ ɔ nloa wɔ zolɛ ɔlɛtendɛ la, ɛbɔfoɔ bieko vindele ɛkɛ razele ye kɛ, “Ɛ mra mrenya nee mraalɛ ne mɔ wɔ bɛ diema nrenya kpanyinli ne sua nu, bɛlɛdi, bɛno nwanye.

¹⁹Na nea, ahumu kpole bie vi fienemgbole ne anu lɔ ɛdu ɛrabu sua ne ɛgua bɛ nwo zo, ɛhu bɛ muala. Me ngomekye ala a mevi nu mɔɔ mera mebabɔ wɔ amaneɛ a.”

²⁰Akee Dwobu dwazole, ɔsuosuanle tɛladeɛ mɔɔ ɔwula la anu, ɔkpale ɔ ti, ɔdule ɔdɔle aze na ɔyeyɛle Nyamenle.

²¹Ɔse, “Meanva bie meamba na mekɔ a meava bie meahɔ. Ɛdɛnkɛma a vale manle me a, yɛɛ Ɛdɛnkɛma a ɛlie ye debie a. Ayɛlɛyelɛ ɛha Ɛdɛnkɛma duma ne.”

²²Anwubɛnyunlu ɛhye mɔ kɔsɔɔti anu, Dwobu anyɛ ɛtane biala yɛɛ yeanvu Nyamenle.