Read Nzema Dwo 10 Bible Online

Dwo 10 - Nzema bible

Dwo 10

¹“Me kunlu a anrɛɛ mewu; akee mebaha me nyane kɔsɔɔti; mebaha me ahonle nu nyane muala.

²Mebaze Nyamenle kɛ, mmabua me ewule fɔlɛ, maa menwu deɛ mɔɔ yemɔti ɛ nee me ɛlɛsi la.

³Anzɛɛ ɛ kunlu dwo kɛ ɛkɛsisi me, kɛ ɛkɛkpo ɛ sa anloa gyima, na ɛ nye kɛlie amumuyɛma ɛbɛla nwo ɔ?

⁴Asoo ɛ nye le kɛ sonla ɛdeɛ ne, na ɛnea debie kɛ sonla la?

⁵Asoo wɔ mekɛ le kɛ sonla ɛdeɛ ne la? Anzɛɛ wɔ ɛvolɛ dodo le kɛ dasanli ɛdeɛ,

⁶mɔɔ ɛneɛnlea me nu wɔanwu me munzule mɔɔ mebɔ, na wɔaza me ɛtane ne mɔ wɔagua zo a?

⁷Ɛze kɛ menli fɔlɛ, yɛɛ awie biala ɛngola ɛnlie me ɛnvi ɛ sa nu.

⁸“Ɛdawɔ a ɛbɔle me ɛzieziele me a, yɛɛ kɛkala wɔpɛ ɛ nwo kɛ ɛsɛkye me a.

⁹Kakye kɛ ɛvale ndɛtɛlɛ a ɛbɔle me a; na eza ɛmaa meazia meahɔ ndɛtɛlɛ nu bieko ɔ?

¹⁰Na wɔanwola me kɛ meleke, wɔambɔ me kunguma kɛ kyiisi ɔ?

¹¹Ɛvale mbowule nee ndinli ɛbɔle me, na ɛvale nwonane nee nwoma ɛhedale zo.

¹²Wɔmaa me ngoane nee ɛhulolɛ kpundii, yɛɛ wɔli me sunsum ne adane.

¹³Noko wɔva ɛhye mɔ kɔsɔɔti wɔzie wɔ ahonle nu; meze kɛ ɛhye a le wɔ kpɔkɛ mɔɔ ɛgyi zo a.

¹⁴Saa meyɛ ɛtane a, ɛnee wɔva wɔzie, ɛnva me nvonleɛ ɛngyɛ me.

¹⁵Saa meyɛ amumuyɛ a, munzule doa me! Saa medi pɛlepɛle a, mengola me ti zo ma, ɔluakɛ menea amaneɛ mɔɔ melɛnwu ye la a, ɛnee nyiane ɛkpɔlɔ me betaa.

¹⁶Saa memaa me nwo zo a, ɛfoa me kɛ awenade, na ɛyɛ nwanwane ninyɛne ɛtia me.

¹⁷Dahuu ɛlɛ alasevolɛ ka tia me, me nwo ɛya mɔɔ wɔ ɛ kunlu la dahuu yɛ kpole, yɛɛ dahuu ɛfa ɛlɔnema fofolɛ ɛba me nwo zo.

¹⁸“Duzu ati a ɛmanle bɛwole me a? Me kunlu a anrɛɛ menwule kolaa na ɛnyelɛ anwu me.

¹⁹Anrɛɛ mevi ɔmɔ akunlu ala la bɛ nee me hɔle aziezo.

²⁰Me mekɛ mɔɔ ɛha la le ezinraa. Bɛgyakyi me, amaa me rɛle akyekye ekyii.

²¹Ɔnrɛhyɛ biala na meahɔ ɛleka mɔɔ bɛkɔ a bɛnzia la, maanle anu kisii, anu awozinli kabii ne,

²²maanle anu kisii, anu begyebegye ne, mɔɔ ye wienyi le kɛ awozinli.”