Read Nzema Dwo 11 Bible Online

Dwo 11 - Nzema bible

Dwo 11

¹Zofaa hanle kɛ,

²“Yemɔti ɔnle kɛ awie bua edwɛkɛ bebelebe ye anwo, anzɛɛ ɛdendɛlɛ dɔɔnwo dɔɔnwo bua sonla benle ɔ?

³Ɛ nloa beɛbeɛ, awie mmaka bie ɔ, yɛɛ wɔ amgbuzilɛ ne, ɛngulo kɛ bɛtwi ɛ nyunlu ɔ?

⁴Ɛse wɔ ngehanleɛ ne le fɔɔnwo, yɛɛ ɛ nwo te wɔ Nyamenle anyunlu.

⁵Anrɛɛ Nyamenle adendɛ, na yeabuke ɔ nloa wɔ ɛ nwo,

⁶anrɛɛ ɔkɛze wɔ kɛ nrɛlɛbɛ ndenle zonle; ninyɛne dɔɔnwo wɔ ɛkɛ mɔɔ dasanli ɛnde bɛ bo a. Nwu ye kɛ Nyamenle ɛndua wɔ kakɛ, kɛmɔ ɛfɛta la.

⁷“Ɛkɛhola ɛkɛnwu Nyamenle abo ɔ? Ɛkɛhola ɛkɛnwu Tumivolɛ ne awieleɛ ɔ?

⁸Ye tumi ne kpole wɔ anwuma tɛla anwomanyunlu, duzu a ɛkɛhola ɛkɛyɛ a? Yɛɛ ɔle kuloonwu ɔtɛla Ɛbolɔ kuma, na wɔmɔ, ɛkɛhola ɛkɛnwu ye ɔ?

⁹Ɔwale ɔtɛla azɛlɛ ye, yɛɛ ɔtɛlɛ ɔtɛla nyevile.

¹⁰Saa ɔba, ɔse kɛ ɔgua menli efiade, ɔ nee bɛ kɔ ndɛnebualɛ ɛleka a, nwane a kɛhola ɔ nwo zo sisi a?

¹¹Ɔluakɛ ɔze kpamgbanvolɛma ne mɔ; saa ɔnwu ɛtane a, ɔnrɛdwenle nwo ɔ?

¹²Saa bɛwo asoaso kokonyinli sonla a, ahɔnwɔne bɔbɔ bade ɔ bo.

¹³“Saa ɛfa wɔ ahonle ɛmaa Nyamenle a, ɛbamaa ɛ sa zo wɔamaa ye.

¹⁴Saa ɛle ɛtanevolɛ a, gyakyi ɛtaneyɛlɛ, mmadie amumuyɛ azie wɔ wɔ awuke nu.

¹⁵Ɛhye bamaa wɔamaa ɛ ti zo, ɛnrɛze nyiane; bɛbabɔ ɛ nwo bane na ɛnrɛzulo.

¹⁶Ɛ rɛle bavi wɔ anwubɛnyunlu ne; ɛbahakye ye ala kɛ azuyilɛ mɔɔ ɛhwe.

¹⁷Na wɔ ɛbɛla bada adɛla ewiazo sɛnzɛne; nuhua awozinli ne bayɛ kɛ nwonlomɔ sɛnzɛne.

¹⁸Wɔ adwenle bagyinla, ɔboalekɛ ɛlɛ anyelazo; bɛbabɔ ɛ nwo bane, amaa wɔalie wɔ ɛnwomenle anzonudwolɛ nu.

¹⁹Ɛbala koonwu, yɛɛ awie biala ɛnrɛha wɔ ɛzulolɛ; na menli dɔɔnwo babiza wɔ moalɛ.

²⁰Amumuyɛma ɛnrɛnwu ɛhwee; ɛnriandilɛ adenle biala baminli bɛ nye zo, bɛ anyelazo a le ewule.”