Read Nzema Dwo 12 Bible Online

Dwo 12 - Nzema bible

Dwo 12

¹Dwobu buale ye kɛ,

²“Ɔnyɛ nwanwane, menli ne a le bɛmɛ, yɛɛ bɛ nee nrɛlɛbɛ bawu.

³Noko melɛ ndelebɛbo kɛ bɛdabɛ ala la; mendɔ sinli wɔ bɛ nu. Nwane a ɛnze ninyɛne ɛhye mɔ a?

⁴Me nwo ɛyɛ me gɔnwo mɔ ɛzelekɛ; medame mɔɔ menvɛlɛle Nyamenle memanle ɔliele me zo, sonlakpalɛ mɔɔ me nwo ɛnlɛ ngehanleɛ, ɛnɛ medo ɛzelekɛ aleɛ.

⁵Sonla mɔɔ arɛle ɛdɔ aze la adwenle nu a anwubɛnyunlu ɛnle debie biala; ɔwɔ ɛkɛ ɔmaa bɛdabɛ mɔɔ ɔngyɛ na bɛatele bɛadɔ la.

⁶Anzonudwolɛ wɔ nwule awuke nu, yɛɛ bɛdabɛ mɔɔ bɛka Nyamenle ɛya la anwo kɔlɔnwo, bɛmɛ, bɛ nyamenle a le bɛ anwosesebɛ.

⁷“Na biza nane ne mɔ, na bɛkɛhilehile wɔ; biza anwomanyunlu nloma, na bɛkɛze wɔ;

⁸anzɛɛ biza azɛlɛ ye azo mbaka, na bɛkɛhilehile wɔ; biza nyevile nu fɛlɛ, na bɛkɛha bɛkɛhile wɔ.

⁹Na ɛhye mɔ, bɛ nuhua boni a ɛnze kɛ Ɛdɛnkɛma a ɛyɛ ɛhye a?

¹⁰Abɔdeɛ biala ngoane wɔ ɔ sa nu, yɛɛ dasanli biala ngoane wɔ ɔ sa nu.

¹¹Ɛnzonlɛ te edwɛkɛ, kɛmɔ ɛtafinlimalɛ sɔ aleɛ nea la.

¹²“Nrɛlɛbɛ hale mgbanyinli, yɛɛ ɛkyɛ a ɛnyia ndelebɛbo.

¹³Nyamenle lɛ nrɛlɛbɛ, ɔlɛ tumi; folɛdulɛ nee ndelebɛbo le ye ɛdeɛ.

¹⁴Saa ɔbubu debie a, awie ɛngola ye boɛ yɛ bieko; saa ɔto sonla efiade a, awie ɛngola ye tukue.

¹⁵Saa ɔsisi ezuledɔlɛ zo a, azule sesa; saa ɔtukue ezule a, azɛlɛ sia.

¹⁶Anwosesebɛ nee nrɛlɛbɛ le ye ɛdeɛ; mɔɔ bɛlɛbɛla nee mɔɔ bɛbɛlɛbɛla ye la le ye ɛdeɛ.

¹⁷Ɔsa folɛdulɛma ɔdie nrɛlɛbɛ, na ɔmaa ndɛnebuavolɛma yɛ ahɔnwɔne.

¹⁸Ɔsa arelemgbunli ɔdie bɛ abɔtile, na ɔmo bɛ abɛlako.

¹⁹Ɔkpolo sɛlɛvolɛma adɛladeɛ na ɔfoa bɛ, na ɔbɛlɛ mgbolema aze.

²⁰Ɔmaa menli mɔɔ bɛdie bɛ bɛdi la tɔ mumule, na ɔsa mgbanyima ɔdie bɛ nrɛlɛbɛ.

²¹Ɔbɔ arelemgbunli mralɛ mrenya anyiemgba, na ɔdie anwosesebɛma anwosesebɛ.

²²Ɔsa awozinli nu ninyɛne ɔgua zo, na ɔmaa awozinli kabikabi kakyi wienyi.

²³Ɔmaa maanle maanle zo, yɛɛ eza ɔsɛkye bɛ. Ɔmaa maanle maanle pi, yɛɛ eza ɔbɔ bɛ asande.

²⁴Ɔdie azɛlɛ ye azo arelemgbunli ndelebɛbo, na ɔmaa bɛduolua ye ɔ nye ɔ nye.

²⁵Bɛdi nvuovua wɔ awozinli nu, na ɔmaa bɛtotɔ kɛ nzanli.