Read Nzema Dwo 13 Bible Online

Dwo 13 - Nzema bible

Dwo 13

¹“Nea, me nye ɛnwu ɛhye mɔ amuala, me nzo ɛde na mede ɔ bo.

²Mɔɔ bɛmɛ bɛze la, medame noko meze; mendɔ sinli wɔ bɛ nu.

³Me nee Tumivolɛ ne badendɛ, mekulo kɛ mekilehile edwɛkɛ nu mekile Nyamenle.

⁴Na bɛmɛ, bɛfa adalɛ bɛkye bɛ nwo ɛhane, bɛ muala bɛle ninsivoma mɔɔ anwo ɛnlɛ nvasoɛ a.

⁵Saa bɛyɛ koonwu a, anrɛɛ ɛnee bɛze nrɛlɛbɛ.

⁶“Akee bɛdie me edwɛkɛ, bɛdie mɔɔ vi me nloa anu finde la.

⁷Bɛbɔ adalɛ bɛamaa Nyamenle, na bɛabɛlɛbɛla ye ɔ?

⁸Bɛdi bɛahɔ Nyamenle anzi ɔ? Bɛka Nyamenle tendile bɛamaa ye ɔ?

⁹Saa ɔneɛnlea bɛ nuhua a, bɛkɛvi nu ɔ? Asoo bɛkɛhola ye bɛlɛbɛla kɛ bɛbɛlɛbɛla sonla la?

¹⁰Kanza bɛwɔ ye afoa awozinli nu bɔbɔ a, ɔbahwi bɛ nyunlu.

¹¹Asoo ye tumi ne ɛnrɛha bɛ ɛzulolɛ, yɛɛ ɔ nwo ɛzulolɛ ne ɛnrɛdɔ bɛ nwo zo?

¹²Bɛ mrɛlɛbulɛ le mgbane kɛ nzonle, bɛ nwo banebɔlɛ le kɛ ndɛtɛlɛ.

¹³Bɛyɛ ngungoonwu, na metendɛ, bɛmaa mɔɔ ba me nwo zo la ɛrɛla.

¹⁴“Melɛ me ngoane ne me sa nu, mebava me nwonane ne meado nzeleba.

¹⁵Ɛhɛe, ɔbahu me, menlɛ anyelazo;[4] noko mebahɔha me edwɛkɛ meahile ye.

¹⁶Ɛhye bayɛ me ngoanelielɛ, ɔluakɛ sonla mɔɔ ɛnze Nyamenle la ɛnrɛra ɔ nyunlu.

¹⁷Bɛdie me edwɛkɛ ne kpalɛ, na bɛmaa mɔɔ meka la ɛhɔ bɛ nzo nu.

¹⁸Bɛnlea, meziezie me edwɛkɛ ne pɛpɛ, meze kɛ me nwo bavi nu.

¹⁹“Nwane bɔbɔ a kɛhola kɛze me kɛ meyɛ ɛtane a? Anrɛɛ menwɔyɛ koonwu na menwɔwu.

²⁰Maa membiza wɔ ninyɛne nwiɔ, na menrɛvea me nwo wɔ ɛ nyunlu.

²¹Ye ɛ sa wɔ me nwo zo, yɛɛ mmamaa ɛ nwo ɛzulolɛ ne nwunlonwunla me.

²²“Akee fɛlɛ, na menwɔlie zo; anzɛɛ maa mendendɛ, na bua me.

²³Me ninyɛndane nee me ɛtane ne mɔ le nyɛ? Maa menwu me mɛladonlɛ nee me ɛtane ne mɔ.

²⁴“Duzu ati a ɛfa ɛ nye ɛfea, na ɛbu me wɔ kpɔvolɛ ɛ?

²⁵Asoo ɛkɛnwunlonwunla nya mɔɔ anwoma ɛlɛbɔ ye ahɔ la, na ɛkɛnriandi ɛkɛdoa ma abonle?

²⁶Ɔluakɛ ɛkɛlɛ ɛtane ɛtane ɛtia me, na ɛmaa medi me mgbavolɛ nu ɛtane ne mɔ anwo fɔlɛ.

²⁷ Ɛbɔ me kpanwu, ɛnea me adenle biala anu; egyakɛ biala mɔɔ metu la, ɛ nye gyi me nwo.

²⁸Sonla sɛkye yɛ mgbane kɛ debie kpɔlɔlera, ɔle kɛ ɛdanlɛ mɔɔ ɛlɛtɛba ɛli la.