Read Nzema Dwo 14 Bible Online

Dwo 14 - Nzema bible

Dwo 14

¹“Sonla dasanli mɔɔ raalɛ ɛwo ye la mekɛ le ezinraa, yɛɛ nuhua le amaneɛ ngome.

²Ɔkpakye kɛ ndotolo, na ɔnwoso; ɔpɛ nu kɛ ɛlawolɛ, na ɔminliminli.

³Sonla zɛhae, ɔdaye ɛnea ye, ɛdi ye edwɛkɛ, ɛbua ye ndɛne?

⁴Nwane a kɛhola kɛye debie bɔkɔbɔkɔ kɛvi evinli nu a? Awie biala ɛnle ɛkɛ.

⁵Kɛmɔ bɛhile ye mekɛ mɔɔ ɔbali la, bɛwie, siane dodo mɔɔ ɔbali la, wɔhyehyɛ wɔdo ɛkɛ, na ɔnrɛhakyi ɛlɛ.

⁶“Ye ɛ nye ɔ nwo, na gyakyi ye, amaa yealie ɔ nye, yeali ye mekɛ kɛ ɛkpanli.

⁷Ɔluakɛ baka bɔbɔ lɛ anyelazo, kɛ bɛpɛ ye bɔbɔ a, ɔbafifi bieko, ɔ nye ɛnrɛgyakyi ɛwɔlɔlɛ ɛlɛ.

⁸Kanza ye ndinli ne mɔ kyɛ aze, ye dosinli ne wu azɛlɛ bo a,

⁹kɛ ɔnyia ezule la ɛnee yefifi yeyeye ngane kɛ baka ekyi la.

¹⁰Sonla wu, na bɛsie ye; sonla gua ɛnwomenle aze a ɛnee ɔwɔ nienwu?

¹¹“Kɛmɔ tandane we, na azudenle sesa la,

¹²zɔhane ala yɛɛ sonla wu na ɔndwazo ko a. Saa anwuma ɛtɛpɛle nu ɛtɛsenle a, bɛnrɛdwazo bieko, bɛvi nafelɛ nu bɛnrɛdunwue.

¹³“Anrɛɛ wɔava me wɔavea ɛbolɔ, wɔava me wɔavea toonwo wɔ ɛya ne adwo, anrɛɛ wɔahile me mekɛ, na ɔdwu a wɔahakye me.

¹⁴Saa sonla wu a, ɔkɛdɛnla ngoane nu bieko ɔ? Wɔ me ɛzonlenlɛ mekɛ nu mebahendɛ, toonwo me ɛkpɔnelɛ mekɛ adwu.

¹⁵Ɛbavɛlɛ, na mebalie wɔ zo; ɛ nwo balɔ ɛdawɔ ɛ sa anloa gyima.

¹⁶Na akee ɛbanlea me gyakɛ ɛdudulɛ nu, na ɛnrɛnlea me ɛtane ne mɔ;

¹⁷ɛbawula me mɛladonlɛ ne kodoku nu wɔakyekye ɔ nloa, na wɔaheda me ninyɛndane zo.

¹⁸“Na boka bɔbɔ dwulu gua aze, yɛɛ bodane tudu fi ɔ bo zo ne;

¹⁹azule kundohundo awolɛ, yɛɛ ɛzezeane pia anwea kɔ; yemɔti ɛmaa sonla anyelazo bɔ ye.

²⁰Ɛkolo ɔ nwo zo dahuu na ɔwu bɔkɔɔ; ɛkakyi ɔ nyunlu na ɛye ye ɛfi ɛ nye zo.

²¹Ɔ mra mrenya nyia bɛ nyunlu, na ɔnnwu ye; bɛ nyunlu gua aze, noko ɔnnwu ye.

²²Ɔdaye mumua ne ye nwonane nu nyane ne ala a ɔte a, na ɔsu ɔdaye ɔ ngome ɔ nwo.”