Read Nzema Dwo 15 Bible Online

Dwo 15 - Nzema bible

Dwo 15

¹Na Ɛlaefaze hanle kɛ, “Edwɛkɛ funli, Dwobu! Edwɛkɛ funli a wɔha la!

²Nrɛlɛbɛvolɛ biala ɛnrɛha edwɛkɛ mɔɔ ɛlɛka la na ɔnrɛva edwɛkɛ mɔɔ ndelebɛbo ɛnle nu la ɔnrɛhye ɔ nwo ɛhane.

³Ɔwɔ kɛ bɛsu kpolera mɔɔ nvasoɛ biala ɛnle zo la, anzɛɛ bɛsu edwɛkɛ mɔɔ ɛnle nɔhalɛ la anwo kpolera ɔ?

⁴Nea, ɛlɛmaa Nyamenle ɛzulolɛ avi ɛkɛ, na wɔazi Nyamenle anyunlu nzɛlɛlɛ aze.

⁵Wɔ ɛdendɛlɛ bɔbɔ kile wɔ adwenle ɛtane, na ɛfa ɛ nloa ɛkye ɛ nwo ɛhane.

⁶Ɛdawɔ ɛ nloa a bu wɔ fɔlɛ a, tɛ me ɔ; ɛdawɔ wɔ ɛdendɛlɛ di daselɛ tia wɔ.

⁷“Ɛdwenle kɛ wɔmɔ a ɛle sonla mɔɔ bɛlumuale bɛbɔle wɔ a? Anzɛɛ bɛbɔle wɔ kolaa na bɛabɔ awoka ɔ?

⁸Wɔdie Nyamenle adwenle ngyehyɛlɛ ne ɔ? Na ɛdwenle kɛ ɛ ngomekye a ɛze nrɛlɛbɛ a?

⁹Duzu yɛɛ wɔmɔ ɛze mɔɔ yɛmɛ yɛnze a? Duzu a wɔmɔ ɛte ɔ bo mɔɔ yɛmɛ yɛnde ɔ bo a?

¹⁰Egyɛnema nee mgbanyinli wɔ yɛ avinli, menli mɔɔ le mgbanyinli tɛla ɛ ze la.

¹¹“Ɛnee Nyamenle arɛlekyekyelɛ ne le ekyi maa wɔ, anzɛɛ ye bɛlɛvolɛ edwɛkɛ ne a le ekyi a?

¹²Duzu ati a wɔ ahonle gyegye wɔ, na ɛkpa yɛ anyehoanlɛ zɛhae ɛ?

¹³Duzu ati a ɛkakyi ɛ nzi ɛsi Nyamenle, na ɛtendɛ ɛdendɛlɛ ɛhye a?

¹⁴ “Sonla le duzu, mɔɔ ɔ nwo kola te a? Anzɛɛ sonla boni yɛɛ raalɛ ɛwo ye mɔɔ kola sɔ Nyamenle anye a?

¹⁵Nea, Nyamenle ɛnlie ye anwondelɛma bɔbɔ ɛnli, yɛɛ anwuma ɛnde ɔ nye zo;

¹⁶na akee sonla mɔɔ sie munzule na ye subane ɛkpɔlɔ, sonla mɔɔ no ɛtane kɛ nzule la.

¹⁷Tie maa menga mengile wɔ, mɔɔ menwu ye la yɛɛ meka a;

¹⁸nrɛlɛbɛvolɛma ɛha, bɛ ze mɔ anva anvea bɛ,

¹⁹kɛ bɛmɛ bɛ ngome yɛɛ bɛvale azɛlɛ ne bɛmanle bɛ a, yɛɛ ɛyɛvolɛ biala andɛnla bɛ nu.

²⁰“Amumuyɛnli te nyane dahuu, ɛvolɛ dodo mɔɔ ɔbali la, awie ɛnrɛze ye anwunvɔne.

²¹Ɛnelɛ ɛzulolɛ ɛmkpa ɔ nzo nu; saa ɔkpazi a, sɛkyevolɛ ne bara ɔ nwo zo.

²²Ɔnlie ɔnli kɛ ɔbavi awozinli nu, ye awieleɛ wie dadeɛ nloa.

²³Ɔkpɔsɛkpɔsa wɔ aleɛ duma nu, na ɔse kɛ, ‘Aleɛ wɔ ni?’ Ɔze kɛ awozinli kenle ne asɛɛ ɛdo ye.

²⁴Nyanenwunlɛ nee arɛlebɔlɛ nwunlonwunla ye; bɛba ɔ nwo zo kɛ belemgbunli mɔɔ ɛboɔboa ɔ nwo ɛlɛkɔ konle la.

²⁵“Kɛmɔ yedende ɔ sa Nyamenle anyunlu, na yedu Tumivolɛ ne anloa yedo,

²⁶yeva bɛ sa nu enyinlike ɛnlomboɛ yegyela, na yememaa ɔ nwo zo Nyamenle anyunlu la ati,

²⁷kɛmɔ yeyɛ belane na ye dwongu nu ɛmia,

²⁸na ɔdɛnlanle azuadu zo, azua mɔɔ menli ɛnde nu, mɔɔ bɛhyehyɛle bɛdole ɛkɛ, kɛ ɔwɔ kɛ bɛyɛ ewula edukue edukue la anu la ati,

²⁹ɔnrɛnyia ɔ nwo ɛlɛ, ye anwonyia ɛnrɛhyɛ, yɛɛ ɔ bo ɛnrɛzɔ ndinli ɛlɛ,

³⁰awozinli ɛnrɛkpa ɔ ti ɛlɛ; sendɔlɔra bayela ye ngane kɔsɔɔti, na ahumu akpoɔkpoa ye ndotolo ne mɔ bɔkɔɔ.

³¹Ɔmmamaa ɔ nye da, ɔbɛlɛbɛla ɔ nwo; ɔluakɛ anyelazo mgbane a bayɛ ye ahatualɛ a.

³²Bɛbadua ye kakɛ bɔkɔɔ na yeawu, yɛɛ ye nya ɛnrɛyɛ amunli bieko.

³³Ɔbayɛ kɛ vanye baka mɔɔ kpolo ye ma amunli gua, kɛ ɔlivi baka mɔɔ kpolo ye ndotolo la.

³⁴“Menli mɔɔ ɛnze Nyamenle la ɛnrɛnyia bɛ bo zo amra, yɛɛ senle bayela ndanlɛ azua mɔɔ bɛvale ndoloboa bɛsisile la.

³⁵Bɛsua nwondomgbɔ ɛhane bɛkye akɛsakɛsa, yɛɛ mɛlɛbɛla ɛyi bɛ ahonle ne mɔ tɛkɛɛ.”