Read Nzema Dwo 16 Bible Online

Dwo 16 - Nzema bible

Dwo 16

¹Na Dwobu buale ye kɛ,

²“Edwɛkɛ ɛhye mɔ, menyia bɛ nde; bɛle arɛlekyekyevolɛma anwo anwunvɔne.

³Edwɛkɛ mgbane mgbane ɛnrɛwie ɛlɛ ɔ? Duzu bɔbɔ a yɛ wɔ ɛya mɔɔ yemɔti ɛtendɛ zɔhane a?

⁴Saa wɔmɔ yɛɛ ɛgyi me gyinlabelɛ a, anrɛɛ medame mebahola tendɛ kɛ ɛdawɔ la; anrɛɛ mebawola edwɛkɛ meagua ɛ nwo zo, na meakpusukpusu me ti meahile wɔ.

⁵Anrɛɛ mebadendɛ meamaa wɔ anwosesebɛ, na me nloa edwɛkɛ amaa wɔ anwofofolɛ ne aha aze.

⁶“Metendɛ a me anwofofolɛ ne ɛnga aze, meyɛ koonwu noko a me anwofofolɛ ne azo ɛnde.

⁷Nɔhalɛ, Nyamenle ɛmaa mekponzo; yebɔ me bo zo bɔkɔɔ.

⁸Yebɔ me kɔtɔlɔba, na ɛhye di daselɛ tia me; menwa kanzakanza, medame mumua ne medi nwolɛ daselɛ.

⁹“Yehyi me, yeva ɛya yetete me nu; yenrese ɔ gye yehile me; me kpɔvolɛ koloholo ɔ nye kile me.

¹⁰Menli ɛdendɛ mgbane mgbane ɛhile me, bɛbobɔ me nzo nu koasea nu; bɛkye bɛ nwo file bɛko bɛtia me.

¹¹Nyamenle ye me maa anzenyamenlema, na ɔye me ɔwula amumuyɛma asa anu.

¹²Ɛnee mede anzonudwolɛ nu, na ɔtetele me nu; ɔtalele me kɔme ɔfinle me aze ɔmanle mentetele, na ɔvale ɔ nye ɔwulale me nyunlu.

¹³Ye menli mɔɔ to ɛda la bɔ yia me. Ɔkpukekpuke me ɛzizira, ɔnze anwunvɔne; ɔtulu me bɔnyema ɔgua aze.

¹⁴Ɛbodalɛ ala a ɔbodɛboda me a, na ɔba me nwo zo kɛ sogyanli.

¹⁵Mekpomgba ɛrele meheda, na mekpofo ndɛtɛlɛ nu.

¹⁶Ɛzunlɛ ngome ɛmaa me nye ɛyɛ ngengaanwo, na me nye anzi ɛyɛ dudukuu,

¹⁷noko menli mgbondedolɛ biala anwo fɔlɛ, yɛɛ me nzɛlɛlɛ le fɔɔnwo.

¹⁸“O azɛlɛ, mmakeda me mogya zo, yɛɛ mmamaa me ɛzunlɛ ne yɛ mgbane.

¹⁹ Nea, kɛkala bɔbɔ, me dasevolɛ ne wɔ anwuma, yɛɛ mɔɔ di me edwɛkɛ maa me la wɔ anwuma.

²⁰Me gɔnwo mɔ si me amgbu; metwi monle mekile Nyamenle,

²¹kɛ ɔkɛmaa sonla nee Nyamenle avinli kɛzɛ, kɛmɔ sonla nee ɔ gɔnwo bɛ avinli sɛ la.

²²Ɔluakɛ yeha mekɛ ekyi bie na meahɔ ɛleka mɔɔ mekɔ a menrɛzia la.