Read Nzema Dwo 17 Bible Online

Dwo 17 - Nzema bible

Dwo 17

¹Me ɛkɛla ɛnriandi me, me mekɛ ɛwie, me nye gyi ewule kuma nu.

²Nɔhalɛ, amgbuzilɛma ɛbɔ ɛyia me, yɛɛ me nye ala a gyi bɛ nyunlu a.

³Ɛdawɔ fa ɛ nwo di agyinlanu maa me; nwane a kɛva ɔ nwo kɛli agyinlanu kɛmaa me a?

⁴Kɛmɔ wɔdo bɛ adwenle nu na bɛnlɛ ndelebɛbo la, ɛnrɛmaa bɛnrɛli konim ɛlɛ.

⁵Awie biala mɔɔ pepɛ ɔ gɔnwo mɔ agyakɛ anzi die bɛ agyadeɛ ne bie la, ɔ mra anye bazi.

⁶Yemaa meyɛ agolobɛnwo sonla wɔ menli nyunlu, na bɛtoto me nyunlu nyɛlɛ.

⁷Alɔbɔlɛ ngome ɛzi me nye, me nvɛyeba ne mɔ kɔsɔɔti ɛwie tuto.

⁸Menli mɔɔ di nɔhalɛ la nwu ɛhye a ɔsi bɛ nwo, na bɛdabɛ mɔɔ bɛnze nwolɛ bie la ko tia anzenyamenlema.

⁹Noko tenlenenli die to nu kɛ ɔle fɔɔnwo, yɛɛ mɔɔ ɛnle ɛtanevolɛ la nyi anwosesebɛ nu.

¹⁰Na bɛmɛ, bɛ muala bɛba bieko bɔbɔ a, menrɛnwu nrɛlɛbɛvolɛ ko bɔbɔ wɔ bɛ nu.

¹¹“Me mekɛ ɛkpa nwo, me adwenle ngyehyɛlɛ ɛkpa nwo, me ɛhulolɛdeɛ ɛwie.

¹²Bɛfa aledwolɛ bɛkakyi alehyenlɛ; bɛse, ‘Wienyi bikye awozinli.’

¹³Saa mefa Ɛbolɔ kɛ me sua zo, na metoto me ɛkpa wɔ awozinli nu,

¹⁴saa mese funli kuma kɛ, ‘Ɛle me ze’, na mese sonlɛ kɛ, ‘Ɛle me nli,’ anzɛɛ ‘Me diema raalɛ a,’

¹⁵ɛnee me anyelazo wɔ ni? Nwane a kɛnwu me anyelazo a?

¹⁶Asoo ɔ nee me kɛhɔ ɛbolɔ? Asoo ɔ nee me kɛhɔ ndɛtɛlɛ ne anu?”