Read Nzema Dwo 18 Bible Online

Dwo 18 - Nzema bible

Dwo 18

¹Beledade hanle kɛ,

²“Dwobu, na kenlenzu yɛɛ ɛ nloa kɛpe a? Dwenle nwo, na maa yɛdayɛ yɛha bie.

³Duzu ati a ɛbu yɛ nane a? Duzu ati a ɛbu yɛ menli mgbane a?

⁴Wɔmɔ mɔɔ ɛya maa ɛkile ɛ nwo nyane la, ɛnee wɔmɔ ɛ ti, sonla vi azɛlɛ ye azo ɛdu, anzɛɛ bɛdu bodane bɛvi ɔ bo zo ne ɔ?

⁵ “Ɛhɛe, bɛnua amumuyɛnli ne kɛnlaneɛ, ye senle le monzomonzo.

⁶Wienyi le awozinli wɔ ye ndanlɛ sua nu, na bɛnua ye kɛnlaneɛ ne mɔɔ henda ye sua ne anu la.

⁷Ye ɛdialɛ anu ɛsesebɛ ne ɛdo, yɛɛ ɔdaye ye adwenle ngyehyɛlɛ maa ɔkpo aze.

⁸Ɔluakɛ ɔdaye ɔ gyakɛ fa ye kɔto ɛhane nu, na ɔkɔtɔ kuma nu.

⁹Ɛhane sɔ ɔ gyakɛ na ɔkye ye ɔsie ɛkɛ.

¹⁰Bɛsua ye azɛlɛ bo ɛhane, bɛsua ye adevinli ɛhane.

¹¹“Ɛzulolɛ bɔ ye mgbɔlɔka, na ɔfoa ye ndinlizo.

¹²Ɛhɔne ngome ɛkpɔlɔ ye, yɛɛ munzule ɛlɛkendɛ ye azedɔlɛ.

¹³Ewule ɛzɛkye ye nwonane, ewule ara kpanyinli bubu ye agbɔkɛ.

¹⁴Bɛte ye bɛfi ye ndanlɛ sua ne mɔɔ ɔvale ɔ rɛle ɔwulale nu la anwo, na bɛfa ye bɛkɔmaa belemgbunli ewule anwo ɛzulolɛ.

¹⁵Bɛfa sɔlefe bɛkpondekponde ye sua ne anu a, awie gyɛne biala kola tɛnla ye ndanlɛ sua ne anu.

¹⁶Ye ndinli kpɔlɔ, yɛɛ ye ngane ne mɔ kyengye.

¹⁷Ye duma minli azɛlɛ ye azo, yɛɛ bɛmbɔ ye duma wɔ mgbata biala azo.

¹⁸Bɛye ye bɛfi wienyi nu bɛfuandi ye bɛto awozinli nu, na bɛtu ye ewiade ye anu.

¹⁹Ɔnlɛ mralɛ anzɛɛ ɔ bo zo amra wɔ ye menli avinli, yɛɛ awie ɛnga ɛleka mɔɔ anrɛɛ ɔde la.

²⁰Ɔvi aduduleɛ mɔɔ kɔ adɔleɛ la, awie biala mɔɔ kɛde ye edwɛkɛ la, ɛzulolɛ ka ye na ɔ nwo wozo ye.

²¹Nɔhalɛ, kɛ anzenyamenlema wie ye la ɛne, mɔɔ ɛnze Nyamenle la tɛnlabelɛ nu kɛ wie ye la ɛne.”