Read Nzema Dwo 19 Bible Online

Dwo 19 - Nzema bible

Dwo 19

¹Na Dwobu buale ye kɛ,

²“Duzu ati a ɛlɛfa ɛdendɛlɛ ngome wɔahu me ɛvɛlɛ ɛ?

³Fane kɛyɛ bulu ɛ, aholoba ala a ɛbɔ me a; ɔnyɛ wɔ nyiane bɔbɔ kɛ ɛkɛvo me ɔ?

⁴Na saa ɔle nɔhalɛ bɔbɔ kɛ meyɛ ɛtane a, me ɛtane ne doa me.

⁵Saa ɛbu ɛ nwo ɛtɛla me, na ɛfa me anwubɛnyunlu kɛ me ɛtane nwo ndeanlɛ a,

⁶ɛnee nwu ye kɛ Nyamenle a ɛbua me fɔlɛ, na yegua me asawu a.

⁷Nea, metea nu, ‘Kɔdiawu o!’ noko awie ɛmbua me; metea nu ɛsesebɛ, na pɛlepɛlelilɛ ɛnle ɛkɛ.

⁸Yedua me adenle, yemɔti mennyia ɛleka mempe, yemaa awozinli ɛva me.

⁹Yelie me anyunlunyia, na yedu me belemgbunli kyɛlɛ ne.

¹⁰Ɔbɛlɛ me aze wɔ adenle biala anu, na ɔmaa mewu, na yedu me anyelazo kɛ baka.

¹¹Yeva me nwo ɛya, na ɔtia me ɔboka ye kpɔvolɛma anwo.

¹²Ye ɛlɔnema bɔ nu ba me nwo zo; bɛbɔ bɛyia me na bɛyɛ azokoɛleɛ wɔ me ndanlɛ sua ne anwo.

¹³“Yemaa me nee me mediema yɛ avinli ɛde, na meyɛ ɛyɛvolɛ wɔ manivolɛma anye zo.

¹⁴Me nwo amra nee agɔnwolɛma kpalɛ ɛye me rɛle ɛdo me sa nu.

¹⁵Me sua nu nyɛvolɛ arɛle ɛvi me; me sonvolɛ mraalɛ bu me ɛyɛvolɛ; meyɛ bɛ nye zo ɛyɛvolɛ.

¹⁶Mefɛlɛ me sonvolɛ, na ɔmbua me; ɔwɔ kɛ mekpa ye kyɛlɛ bɔbɔ kolaa.

¹⁷Me ye bɔbɔ ɛmkpondɛ me nyunlu ɛnnea, ɔmɔ akunlu mralɛ bɔbɔ kyi me.

¹⁸Ngakula bɔbɔ kyi me; memaa me nwo zo a bɛtendɛ bɛtia me.

¹⁹Agɔnwolɛma kpalɛ kpalɛ kyi me, yɛɛ menli mɔɔ ɛnee mekulo bɛ la ɛhakyi bɛ nzi ɛzi me.

²⁰Mewie nwa, me mbowule ɛza ɛgua zo, me gye a maa metɛsɔho sonla a.

²¹“Bɛnwu me anwunvɔne, bɛnwu me anwunvɔne, ayi mɔ, bɛnwu me anwunvɔne, ɔluakɛ Nyamenle ɛva ɔ sa ɛha me!

²²Duzu ati a bɛhakyi bɛ nwo Nyamenle bɛdoa me ndinlizo a? Duzu ati a bɛ kunlu ɛndwo me nwonane ne anwo a?

²³“O, me edwɛkɛ fɛta kɛlata! O, anrɛɛ bɛahɛlɛ ye buluku nu!

²⁴O, anrɛɛ bɛava bulalɛ pɛne nee sumi bɛahɛlɛ ye wɔ bodane zo mɔɔ ɔnkyikyi ɛlɛ a!

²⁵Ɔluakɛ meze kɛ me Dievolɛ ne de aze, na ɔka kenle ko a ɔbalie me;

²⁶nzinlii mɔɔ bɛkɛzɛkye me nwonane ye la, mevi nwonane ɛhye anu mebanwu Nyamenle,

²⁷Mebanwu kɛ ɔgyi me foa ko, me nye banwu ye, menrɛnwu sonla gyɛne biala. Akee me ɛbolɛ ɛlɛte

²⁸Saa ɛbiza kɛ, ‘Kɛ yɛbazi yɛavoa ye ɛ?’ na bɛse kɛ, ‘Edwɛkɛ ne abo wɔ ye ɛkɛ’ a,

²⁹ɛnee bɛzulo konle dadeɛ ne, ɔluakɛ konle dadeɛ ne nee ɛya ɛvalɛ ndeanlɛ a lua a, amaa wɔanwu kɛ ndɛnebualɛ wɔ ɛkɛ.”