Read Nzema Dwo 2 Bible Online

Dwo 2 - Nzema bible

Dwo 2

¹Kenle ko eza Nyamenle anzɛɛ Anwuma amra hɔle Ɛdɛnkɛma anyunlu kɛ bɛkava bɛ nwo bɛahile ye, na Seetan eza hɔle ɛkɛ ne bie.

²Ɛdɛnkɛma bizale Seetan kɛ, “Na wɔmɔ, ɛvi nienwu yɛɛ wɔra ɛke a?” Seetan buale Ɛdɛnkɛma kɛ, “Mewɔ akpɔsa nu wɔ aleɛabo. Ewiade anu ala yɛɛ medi ye akɔneaba a.”

³Ɛdɛnkɛma zele Seetan kɛ, “Wɔnwu me sonvolɛ Dwobu, awie biala mɔɔ le kɛ ɔdaye la ɛnle aleɛabo, ɛtane biala ɛnle ɔ nwo, ɔdi nɔhalɛ, ɔsulo Nyamenle na ɔtwe ɔ nwo ɔfi ɛtane nwo. Wɔyɛ anrɛɛ ɛmaa meazɛkye ye, wɔ mekɛ mɔɔ ɔtɛyɛle ɛhwee la, noko wɔnwu ye wienyi kɛ Dwobu gyi ɔ gyakɛ anu kpundii.”

⁴Na Seetan buale Ɛdɛnkɛma kɛ, “Ɔle zɔhane, na ye nwonane ne noko ɛ! Sonla kɛhulo kɛ ɔkɛdɛnla ngoane nu tɛla kɛ ɔkɛminli anwonyia biala mɔɔ ɔlɛ la.

⁵Wɔmɔ, ɛkulo a fa ɛ sa ka ye maa ɔde nyane ekyii, na ɛkɛde mgbole mɔɔ ɔkɛheha ɔkɛtietia wɔ la.”

⁶Na Ɛdɛnkɛma zele Seetan kɛ, “Ɔwɔ ɛ sa nu, na anrɛɛ mmafa ɛ sa ɛka ye ngoane ne.”

⁷Yemɔti Seetan vi Ɛdɛnkɛma anwo ɛkɛ ne hɔle na ɔhɔdele nganlɛ mgbole ɔkpondenle Dwobu anwo. Ɔvi ɔ ti zo mɔɔ dwu ɔ gyakɛ akunlu la yɛle nganlɛ ngome.

⁸Dwobu hɔdɛnlanle fovolɛ zo yɛɛ ɔfa foandɛkɛ ɔfonvoa ɔ nwo a.

⁹Na ɔ ye zele ye kɛ, “Ɛnɛ nee ɛnɛ ala ɛtɛgyi ɛ gyakɛ anu, ɛtɛtoa Nyamenle abo zo. Tendɛ ɛtane tia Nyamenle na wu ɛ.”

¹⁰Dwobu buale ye kɛ, “Ɛtendɛ kɛ mraalɛ ahɔnwɔne ne mɔ anu ko tendɛ la. Saa Nyamenle kyɛ yɛ ninyɛne kpalɛ a, yemɔ yɛdie. Na saa anwubɛnyunlu to yɛ a, ɛnee duzu ati a ɔwɔ kɛ yɛkpo ye amunli a?” Wɔ amaneɛnwunlɛ ɛhye mɔ amuala anu Dwobu anloa anvula edwɛkɛ ɛtane antia Nyamenle.

¹¹Mekɛ mɔɔ Dwobu agɔnwo mɔ nsa ne, Ɛlaefaze mɔɔ vi suakpole Tima, Beledade mɔɔ vi Hyua maanle nu, yɛɛ Zofaa mɔɔ vi Neeyama maanle nu la dele ye anwubɛnyunlu ne nganeɛ la, bɛhɛlɛhɛlale bɛ nwo na bɛhilele kenle bɛrale kɛ bɛbakpɔla ye, bɛayɛ ye gyakɔ na bɛakyekye ɔ rɛle.

¹²Mɔɔ bɛlua adenle zo moa ekyii na bɛnwunle Dwobu la, bɛannwu ye sonla holɛ. Na bɛradole ye la, bɛzunle bɛyele awolɛ. Bɛsuosuanle bɛ adɛladeɛ mɔɔ bɛwula la anu, bɛvale nzonle bɛbɔle bɛ nwo na bɛlile nyane.

¹³Bɛkpofokpofole azɛlɛ nwo ɛkɛ ne bɛ nee ye dɛnlanle ewiazo nee nɔɔzo toonwo kenle nsuu. Bɛ biala ambuke ɔ nloa anga edwɛkɛkpɔkɛ ko bɔbɔ, ɔboalekɛ bɛnwunle kɛ ɛnee ɔlɛnwu amaneɛ kpole.