Read Nzema Dwo 20 Bible Online

Dwo 20 - Nzema bible

Dwo 20

¹Zofaa hanle kɛ,

²“Dwobu, tie maa menze wɔ, yera me nu kɛ membua wɔ ndɛndɛ, ɔboalekɛ me nwo ɛlɛyelɛyela me.

³Mete wɔ aholoba ne mɔɔ ɛlɛbɔ la, yɛɛ melɛ nwolɛ ngakyibɛnzi.

⁴“Ɛdawɔ, ɛnze ye wienyi kɛ ɔvi tete, mɔɔ bɛbɔle sonla bɛdole azɛlɛ ye azo la,

⁵amumuyɛnli ɛkpazilɛ ɛndwu moa, yɛɛ sonla mɔɔ ɛnze Nyamenle la fɛlɛkolilɛ le sinli?

⁶Kanza ye tendenle dwu anwuma anwuma, ɔ ti kpula Nyamenle ko abo bɔbɔ a,

⁷ɔbakpɔlɔ kɛ ɔdaye ye ebinli; na menli mɔɔ ɛnwu ye ɛlɛ la babiza kɛ, ‘Ɔwɔ ni?’

⁸Ɔbapɛ nu yeaze kɛ ɛlalɛ, na bɛnrɛnwu ye ko; bɛbavoa ye kɛ nɔɔzo ɛnyelɛzodeɛnwunlɛ.

⁹Ɛnyelɛ mɔɔ nwunle ye la ɛnrɛnwu ye ko, menli mɔɔ ɔ nee bɛ dɛnlanle la ɛnrɛnwu ye ko.

¹⁰Ɔ mra babiza ehyianvolɛma moalɛ, na yeakpu ye anwonyia ne.

¹¹Ɔlɛ kpavolɛ anwosesebɛ wɔ ye nu, noko ɔnrɛhyɛ biala na yeahakyi ndɛtɛlɛ.

¹²“Munzule ɛbɛla yɛ ye fɛ, ɔfa ɔfea ɔ tafinlima abo,

¹³ɔngulo kɛ ɔgyakyi nu, ɔnoko ye ɔ tafinlima abo,

¹⁴noko ye aleɛ dwu ɔ kunlu a ɔle kɛ ndianwu bɔnyema.

¹⁵Ɔmeme anwonyia na ɔkpu bɛ bieko; Nyamenle yeye bɛ fi ɔ kunlu.

¹⁶Ɔbanlo ndianwu bɔnyema; bɔna baha ye ahu ye.

¹⁷Ɔnrɛnwu azule, azule mɔɔ se kɛ wolɛ nee meleke.

¹⁸Ɔbaye mɔɔ yenyia ye gyima nu la yeamaa, bie ɛnrɛha ɔ nloa; nvasoɛ mɔɔ ɔbanyia ye gualilɛ nu la, ɔnrɛli nuhua fɛlɛko.

¹⁹Ɔluakɛ yesisi ehyianvolɛma na yekpo bɛ, yelie sua mɔɔ tɛ ɔdaye a ɔzile la.

²⁰Kɛmɔ ye angomedi ɛmmaa ɔ kunlu ɛndwo ɔ nwo la, debie biala mɔɔ ɔ nye die nwo la, ɔdi ɔ muala.

²¹Ɔdi a, ɔngyakyi bie, yemɔti ɔnrɛkpazi.

²²Mɔɔ ye anyiabɛnwo ne kɛgyinla zo kpalɛ la, ɛnee munzule doa ye, anwubɛnyunlu bali ye akpanebɛ.

²³Kanza maa ɔli ɔ ko ɛyi tɛkɛɛ, Nyamenle bava ye ɛya kpole ne agua ɔ nwo zo, yeamaa yeali ye kɛ aleɛ.

²⁴Ɔbanriandi konle bulalɛ biala, noko kɔbele ɛda bawɔ ye avinde ɔ nzi.

²⁵Bɛtwe ye bɛfi sonlabaka ne anu, ɔ ti memeamemea ne fi ye bɔnyema ne anu finde; na ɛzulolɛ kpole ka ye.

²⁶Awozinli kabii keda ye anwonyia zo; senle mɔɔ tɛ sonla a wudale la bayela ye; ye sua nu debie biala badɔ nzonle.

²⁷Anwuma baza ye ninyɛndane agua zo, na azɛlɛ adwazo atia ye.

²⁸Bɛbazoa ye awuke nu ninyɛne kɔsɔɔti bɛahɔ,[5] bɛbawua debie biala wɔ Nyamenle ɛya kenle ne.

²⁹“Amumuyɛnli afoa nu ɛdeɛ mɔɔ ɔnyia ye Nyamenle ɛkɛ ne la ɛne, agyadeɛ mɔɔ Nyamenle ɛhyehyɛ ɛmaa ye la ɛne!”