Read Nzema Dwo 21 Bible Online

Dwo 21 - Nzema bible

Dwo 21

¹Na Dwobu buale ye kɛ,

²“Yɛ ɛnzonlɛ tie me edwɛkɛ ye kpalɛ, na maa ɔyɛ arɛlekyekyelɛ ɔmaa wɔ.

³Maa me adenle maa mendendɛ, saa mewie na ɛkulo a, golo me nwo.

⁴“Mame, me nee dasanli biala ɛnlɛ butule, yemɔti menzi abotane biala.

⁵Wɔmɔ nea me tɛnlabelɛ nu, ɔnyɛ wɔ nyiane mɔɔ maa ɛfa ɛ sa ɛsɔ ɛ nloa a?

⁶Saa medwenle nwo a ɛnee me rɛle ɛbɔ, na me nwo wozo me.

⁷“Duzu ati a ɛtanevolɛma tɛnla aze, yɛ mrelera na bɛnyia tumi mgbole ɛ?

⁸Bɛ mra bo tila, na bɛ bo zo amra nyi to bɛ.

⁹Ɛzulolɛ ɛnle bɛ awuke nu, yɛɛ Nyamenle ndeanlɛ ɛmba bɛ nwo zo.

¹⁰Bɛ nlankɛ nyinli yɛ dɔɔnwo; bɛ nlankɛ mbelɛ wo mralɛ, bɛ ko ɛmkpɔne.

¹¹Bɛ mra anwo tɛ bɛ kɛ mboane, yɛɛ bɛ mra di wulupe, si agole.

¹²Bɛto aweɛne nee getaa edwɛne, na bɛsi fulutu nloa agole.

¹³Bɛkpazi, bɛdi bɛ mekɛ, na bɛfa anzonudwolɛ bɛkɔ ɛbolɔ.

¹⁴“Bɛka bɛkile Nyamenle kɛ, ‘Ɛvi yɛ nwo ɛke kɔ! Yɛmkpondɛ wɔ ɛzonlenlɛ nwo ngilehilelɛ biala.

¹⁵Tumivolɛ ne a le nwane, mɔɔ ɔwɔ kɛ yɛsonle ye a? Yɛɛ saa yɛsonle ye a, duzu nvasoɛ a yɛnyia a?’

¹⁶Bɛdwenle kɛ bɛ ɛkpazilɛ vi bɛ mɔdenlebɔ. Metua me nzo kɛ menwɔdie amumuyɛma folɛdulɛ!

¹⁷“Fane nyɛ yɛɛ ɛtanevolɛma kɛnlaneɛ ɛnlu a? Fane nyɛ yɛɛ munzule ɛdo bie a? Fane nyɛ yɛɛ Nyamenle ɛva ɛya ɛdua bie kakɛ a?

¹⁸Fane nyɛ yɛɛ ɔbɔ bɛ ɔkɔ kɛ abonle lua anwoma nu, anzɛɛ nya mɔɔ ahumu ɛlɛfa ye ahɔ la a?

¹⁹“Wɔmɔ ɛse, ‘Nyamenle fa bɛ ɛtane ne mɔ tea bɛ mra.’ Maa ɔdua bɛdabɛ mumua ne kakɛ, amaa bɛanwu ye.

²⁰Maa bɛdabɛ bɛ nye ɛnwu bɛ ndeanlɛ, na bɛnwu kɛ Tumivolɛ ne ɛya si de la.

²¹Ɔluakɛ saa sonla wu a, duzu adwenle bieko yɛɛ ɔlɛ wɔ ye awuke nwo a?

²²Asoo awie kɛhola kɛhile Nyamenle nrɛlɛbɛ, yemɔ mɔɔ ɔbua mgbolema ndɛne la?

²³“Menli ne bie mɔ kpazi toonwo bɛwu, bɛkye, bɛyɛ mbelane tutoboo, na bɛwu fɛlɛkolilɛ nee anzonudwolɛ nu.

²⁵Bie mɔ noko ɛnde fɛlɛko ɛlɛ, bɛfa nyane ngome bɛkɔ ɛbolɔ.

²⁶Noko bɛ muala bɛkɔ azɛlɛ ye abo, na azonlɛ di bɛ muala.

²⁷“Nea, meze bɛ adwenle, nee me nwo adwenle ɛtane mɔɔ bɛlɛ la,

²⁸ɔluakɛ bɛse, ‘Sonlakpole zɔhane sua wɔ ni? Yɛɛ amumuyɛnli ne noko sua wɔ ni?’

²⁹Bɛtɛbizale adendulɛma mɔɔ fa ndenle ne mɔ azo la, anzɛɛ bɛnlie bɛ daselɛlilɛ ne mɔ bɛndo nu,

³⁰kɛ amaneɛnwunlɛ mekɛ nu, bɛgyakyi amumuyɛnli ne, na bɛye ye bɛfi ɛya kenle ne anu ɔ?

³¹Nwane a kola fa amumuyɛnli ɛtane si ɔ nyunlu a, yɛɛ nwane a kola ye kakɛ tua wɔ mɔɔ yeyɛ la anwo a?

³²Saa bɛ nee ye kɔ asie a, menli sinza ye nla ne.

³³Bɔnza ne anu anwea yɛ ye fɛ; menli kɔsɔɔti kɔsɔho ye, menli mɔɔ kɔsɔho ye la le pemgbenleamgbe.

³⁴“Na duzu edwɛkɛ kpaziwɔkɛ bɔbɔ yɛɛ ɛfa wɔakyekye me rɛle a? Ɛnlɛ mualɛ kpalɛ biala kɛ adalɛ ala.”