Read Nzema Dwo 22 Bible Online

Dwo 22 - Nzema bible

Dwo 22

¹Ɛlaefaze hanle kɛ,

² “Asoo sonla nwo le nvasoɛ maa Nyamenle? Sonla mɔɔ ze nrɛlɛbɛ la le nvasoɛ maa ɔdaye ɔ nwo?

³Saa ɛdi pɛlepɛle a, duzu bolɛ yɛɛ ɛsonle ɛmaa Tumivolɛ ne a, anzɛɛ ɛbɔ wɔ ɛbɛla ne fɔɔnwo a, duzu nvasoɛ a ɔnyia a?

⁴Anzɛɛ wɔ ɛzulolɛ mɔɔ ɛsulo ye la ati yɛɛ ɛyɛ ɛtane a ɔtea wɔ, ɔbua wɔ ndɛne a?

⁵Asoo wɔ amumuyɛ ne ɛnle kpole? Wɔ ɛtane ne mɔ ɛnlɛ awieleɛ.

⁶Ɔluakɛ wɔlie ɛ mediema awoba mgbane gyɛne ne ala, na wɔkpa bɛ nwo ndanlɛ.

⁷Ɛtɛmanle menli mɔɔ ɛvɛ la nzule bɛtɛnonle, yɛɛ ɛtɛmanle menli mɔɔ ɛhɔne ɛlɛku bɛ la aleɛ.

⁸Sonla mɔɔ lɛ tumi la vale azɛlɛ ne, na mɔɔ ɔkulo ye edwɛkɛ la dɛnlanle zo.

⁹Wɔmaa ahunlanvolɛ mraalɛ ɛlɛ bɛ sa mgbane, yɛɛ wɔsisi nrisa wɔwua bɛ.

¹⁰Yemɔti ngane ɛbɔ wɔ mgbɔlɔka ɛyia, na sulosulo gyegye wɔ.

¹¹Awozinli ɛva wɔ, ɛnnwu aze, yɛɛ azule ɛyi ɛva wɔ ɛleka biala.

¹²Asoo Nyamenle ɛnde anwuma hwehwe lɔ? Nea anwomanyunlu nwɔlɔra, kɛ bɛ ngɛnlɛma si de la!

¹³Yemɔti a ɛse ‘Duzu a Nyamenle ze a? Asoo ɔkɛhola ndɛne bua wɔ awozinli kabikabi ye anu?

¹⁴Amungu kabii keda ɔ nye, yemɔti ɔnnwu ɛhwee, na ɔzinze anwuma nee aze bɛ avinli,’ la.

¹⁵“Adenle dɛba ne mɔɔ amumuyɛma ɛva nu la, asoo yemɔ ala a ɛdawɔ ɛbava nu a?

¹⁶Bɛpianle bɛ bɛhɔle kolaa na bɛ mekɛ adwu; azuyilɛ pianle bɛ hɔle, ɔminlinle bɛ bo zo bɔkɔɔ.

¹⁷Bɛzele Nyamenle kɛ, ‘Ɛvi yɛ nwo ɛke kɔ! Duzu yɛɛ Tumivolɛ ne kɛhola kɛyɛ kɛmaa yɛ a?’

¹⁸Noko yemɔ yɛɛ ɔmanle bɛ ninyɛne kpalɛ a, na mame, metua me nzo wɔ ɛtanema folɛdulɛ nwo.

¹⁹Pɛlepɛlelilɛma nwu ɛhye na bɛdi fɛlɛko, menli mɔɔ ɛnze nwolɛ bie la sele bɛ maa bɛ ti si aze.

²⁰Bɛse kɛ, ‘Nɔhalɛ, bɛbɔ yɛ kpɔvolɛma abo zo, yɛɛ debie biala mɔɔ bɛgyakyile la, senle ɛmaa bɛdɔ nzonle.’

²¹“Ɛ nee Nyamenle ɛbɔ nu na nyia anzonudwolɛ, na ɛbakpazi bieko.

²²Tie ɔ nloa edwɛkɛ, na fa ye edwɛkɛ sie wɔ ahonle nu.

²³Saa ɛsia ɛkɔ Tumivolɛ ne ɛkɛ bieko, ɛbɛlɛ ɛ nwo aze ɛmaa ye, saa wɔ awuke nu amra gyakyi ɛtanelilɛ,

²⁴saa ɛbu ezukoa nvutuke kɛ munlutu, na ɛbu ezukoa nvutuke awolɛ ‘ɔfɛ’ kɛ azule bo awolɛ,

²⁵na ɛmaa Tumivolɛ ne yɛ wɔ ezukoa nvutuke, nee wɔ dwɛtɛ fufule mɔɔ sonle bolɛ la a,

²⁶ɛbanyia anyelielɛ wɔ Tumivolɛ ne anu, na wɔakpogya ɛ nye zo wɔanlea Nyamenle.

²⁷Ɛbavɛlɛ ye, na ɔbadie wɔ; na wɔadua wɔ ɛwɔkɛbɔlɛ muala.

²⁸Debie biala mɔɔ ɛkɛdwenle nwo la bayɛ zɔ, na wienyi bada wɔ adenle nu.

²⁹Ɔluakɛ Nyamenle bɛlɛ mgbanyizonlema aze, na ɔmaa bɛlɛvoma zo.

³⁰Ɔpepɛ ɔdie sonla mɔɔ ɛnze nwolɛ bie; saa ɛnli fɔlɛ ɛdeɛ a, ɔbapepɛ yealie wɔ.”