Read Nzema Dwo 24 Bible Online

Dwo 24 - Nzema bible

Dwo 24

¹“Duzu ati a Tumivolɛ ne ɛnzie ndɛnebualɛ mekɛ, na bɛdabɛ mɔɔ bɛze ye la ɛnnwu ye mekɛ ne ɛ?

²Menli kakyi azɛlɛ ɛweɛne; bɛwua mboane bɛyɛne bɛ.

³Bɛkyehye nrisa mralɛ asoaso bɛkɔ; bɛdie ahunlanvolɛ mraalɛ nlankɛ nyinli awoba.

⁴Bɛtua ehyianvolɛma ɛkpazilɛ adenle; na bɛkpuokpua bɛ bɛmaa bɛnriandi bɛfea.

⁵“Bɛle kɛ ɛsɛlɛ zo asoaso nyinli, bɛdwazo ndɛ bɛkɔ aleɛkpondɛlɛ wɔ fienemgbole nu bɛmaa bɛ mra.

⁶Bɛbu ɛya mɔɔ tɛ bɛ ɛdeɛ ɔ la anu aleɛ, na bɛtete amumuyɛma vanye egyinli nu ma.

⁷Nɔɔzo bɛdɛ bɛ nwo zɔ bɛda, bɛnlɛ debie bɛnzɔ bɛ ɛyɛlɛ.

⁸Awoka zo ezule bo bɛ, na bɛbetɛbeta awolɛ kɛ bɛkpondɛ feabelɛ.

⁹“Menli bie mɔ te nrisa mralɛ fi nyɛfonlɛ nloa, na bɛdie ehyianvolɛma amra nlɔma awoba.

¹⁰Noko bie mɔ dɛ bɛ nwo zɔ finde, bɛngeda bie; na bɛfa ɛhɔne bɛsoa bɛyɔba.

¹¹Bɛtwihwi ɔlivi ma bɛyɛ nwole, wɔ atisesebɛma egyinli nu; bɛtwihwi vanye ma bɛyɛ nwanye, noko nwolɛ nzuhɔne ku bɛ.

¹²Suakpole ne azo, wuleravolɛma kponle, menli mɔɔ ɛbodɛboda la su fɛlɛ moalɛ, noko Nyamenle ɛndie bɛ nzɛlɛlɛ.

¹³“Bie mɔ wɔ ɛkɛ mɔɔ ko tia wienyi ne a; bɛtɛnwunle ye ndenle ne mɔ yɛɛ bɛnlua nuhua.

¹⁴Alehyenlɛ nu, kɔdiawu ne dwazo kɔsia ku ehyianvolɛma; aledwolɛ nu, ɔle awule.

¹⁵Nrenya mɔɔ fa awuvolɛ raalɛ la kendɛ aledwolɛ, ɔkeda ɔ nyunlu na ɔka kɛ, ‘Awie ɛnrɛnwu me.’

¹⁶Awozinli nu bɛbubu awie mɔ azua, na alehyenlɛ nu bɛtoto bɛ nwo nlenkɛ nu; bɛnze wienyi ne deɛ holɛ.

¹⁷Awozinli kabikabi le bɛ alehyenlɛ, ɔluakɛ bɛ gɔnwo mɔ a le awozinli nu amundubɛ ne mɔ.”

¹⁸Zofaa hanle kɛ, “Wɔmɔ ɛse ‘Azuyilɛ pia amumuyɛma kɔ ndɛndɛ, na bɛ afoa nu azɛlɛ ɛdeɛ ne, bɛwa ye amonle; yɛɛ awie ɛnyɛ gyima wɔ ye vanye egyinli nu.

¹⁹Ewia pe a wuluwulu maa ezukɔtweaba kolo na ɔsesa, zɔhane ala yɛɛ ɛtanevolɛma minli ɛbolɔ a.

²⁰Mrɛladane arɛle fi bɛ; bɛdɔ azonlɛ; bɛ aluma bɔbɔ, bɛngakye; yemɔti amumuyɛnli bu tɔ kɛ baka la.’

²¹Bɛfo bɛgyinla mota mraalɛ akɔme zo, yɛɛ bɛnze ahunlanvolɛ mraalɛ anwunvɔne.

²²Noko Nyamenle fa ye tumi ne maa mgbolema mekɛ tendenle; bɛ anyelazo wie a, bɛmaa bɛ nwo zo bieko.

²³Ɔbɔ bɛ nwo bane, ɔmaa bɛgyinla boɛ; yɛɛ ɔ nye wɔ bɛ ɛbɛlabɔlɛ nu.

²⁴Ɔkpogya bɛ zo ekyii, noko ɔngyɛ ɛnee bɛ bo zo ɛminli; bɛnwoso na bɛwu kɛ ndile; bɛbu bɛ kɛ abɛlɛ.

²⁵Saa ɔnle zɔ a, nwane a kɛha kɛ mele adalɛ, kɛhile kɛ mɔɔ meha la ɛnle nɔhalɛ a?”