Read Nzema Dwo 26 Bible Online

Dwo 26 - Nzema bible

Dwo 26

¹Na Dwobu hanle kɛ

²“Kɛ wɔzi wɔboa sonla mɔɔ ɛnlɛ tumi, anzɛɛ wɔlie sonla mɔɔ ɛnlɛ anwosesebɛ la ɛ?

³Wɔdu sonla mɔɔ ɛnze nrɛlɛbɛ la folɛ kpalɛ, na wɔva wɔ nrɛlɛbɛ ne bie wɔmaa ye ala ɛne!

⁴Nwane a ɛboa wɔ ɛmaa wɔha edwɛkɛ ɛhye mɔ a, yɛɛ nwane a manle wɔ anwosesebɛ ɛhye mɔɔ wɔva wɔdendɛ la a?”

⁵Beledade hanle kɛ, “Azɛlɛ bo lɔ, mɔwuamra anwo wozo bɛ, azule nee bɛ nuhua ninyɛne kɔsɔɔti.

⁶Ɛbolɔ la zolɛ wienyi wɔ Nyamenle anyunlu, yɛɛ Abadɔn nwenle zolɛ wɔ ɔ nyunlu.

⁷Ɔtɛlɛ sɔlɔ anwomanyunlu ɔdwu ɛleka mɔɔ debie biala ɛnle la, na ɔmaa azɛlɛ noko sinze mɔɔ debie ɛnlɛ nu a.

⁸Ɔmaa nzule gyinla amungu nu, noko amungu ne ɛnkpuke.

⁹Ɔkeda siane ne anyunlu, na ɔfa amungu ɔkeda siane ne anye.

¹⁰Yepɛ sɛma yedo nzule ne mɔ anye, yeva yegya wienyi nee awozinli ɛweɛne.

¹¹Saa ɔtea mpila mɔɔ dedɛ anwomanyunlu la nu a, ɛzulolɛ ka bɛ maa bɛkpusu.

¹²Ɔvale ye tumi ɔmanle nyevile guale diinyi; ɔvale ye nrɛlɛbɛ ɔhunle nane sɛkyeravolɛ Releehabe.

¹³Ɔvale ye ɛnwomenle ɔmanle anwomanyunlu dele wienyi; ɔvale ye tumi ne ɔhunle nyevile nu nane anwo ɛzulolɛ ne.

¹⁴Nea, ɛhye mɔ bɔbɔ le ye tumi ne anu ekyi bie; ɔ ne ekyi bie a yɛte a, na nwane a kɛhola kɛgyinla ye tumi kpole ne anloa a?”