Read Nzema Dwo 27 Bible Online

Dwo 27 - Nzema bible

Dwo 27

¹Dwobu hanle kɛ,

²“Meka tease Tumivolɛ Nyamenle ne mɔɔ ɛmaa mewie ye zɛ, na yemaa me ɛkɛla ɛli nyane la kɛ,

³sumunli kenle ala mɔɔ mede ngoane nu, na Nyamenle maa medie ɛnwomenle la,

⁴me nloa ɛnrɛkpula munzule edwɛkɛ, na meava me tafinlima meabɔ adalɛ.

⁵Ɔkɛbɔ me tɔ kɛ menwɔha kɛ bɛle nɔhalɛ a; mebagyinla kpundii kɛ menze nwolɛ bie kɔkpula kɛ menwɔwu.

⁶“Melɛ me tenleneyɛlɛ ne anu kpundii, menrɛgyakyi nu ɛlɛ; me adwenle ɛmbu me fɔlɛ kenle bie maanle nu.

⁷“Bɛmaa me kpɔvolɛ ɛyɛ kɛ amumuyɛnli, na mɔɔ ko tia me la ɛyɛ kɛ sonla mɔɔ ɛnle tenlene la.

⁸Ɔluakɛ sonla mɔɔ ɛnze Nyamenle la anyelazo wɔ ni, saa Nyamenle ye ye zo a?

⁹Asoo ɔyia ngyegyelɛ na ɔfɛlɛ a Nyamenle badie ye ɛzunlɛ?

¹⁰Asoo ɔ nye balie Tumivolɛ ne anwo? Asoo ɔbazu yeavɛlɛ Nyamenle mekɛ biala?

¹¹Mebahilehile wɔ kɛ Nyamenle tumi ne si de la; debie biala mɔɔ fane Tumivolɛ ne anwo la, menrɛva menrɛvea.

¹²Bɛnlea, bɛ muala bɛnwu ye bɛ nye zo; na duzu ati a akee bɛ muala bɛyɛ mgbane a?”

¹³Na Zofaa hanle kɛ, “Kɛ Nyamenle si tea amumuyɛnli ne la ɛne, yɛɛ agyadeɛ mɔɔ nzisima nyia fi Tumivolɛ ne ɛkɛ la ɛne.

¹⁴Saa ɔ mra so dɔɔnwo a, bɛwie dadeɛ nloa; yɛɛ ɔ mra ɛnrɛli bɛ ko ɛnrɛyi.

¹⁵Menli mɔɔ kɛha ɔ nzi la, ewule tɔ bɛ avinli sɛkye bɛ; yɛɛ bɛ ye mɔ ɛnrɛzu ɛnrɛye bɛ awolɛ.

¹⁶Ɔbahuohua dwɛtɛ fufule nloa kɛ anwea, na yeahuohua ndakpa nloa kɛ ndɛtɛlɛ edukue,

¹⁷noko mɔɔ di nɔhalɛ la a baheda a, na menli mɔɔ ɛnze nwolɛ bie la ahyɛ ye dwɛtɛ fufule ne ava.

¹⁸Ye sua mɔɔ ɔsi la le kɛ kɛdɛba ndenda, ɔle kɛ sinzavolɛ kpɔda.

¹⁹Kenle ko ɔbala kɛ sukoavolɛ, noko ɔnrɛla zɔ bieko; ɔkatete ɔ nye zo la ɛnee ye anwonyia ne ɛwie.

²⁰Ɛzulolɛ monla ye kɛ azuyilɛ; nɔɔzo, ahumuakyima fa ye kɔ.

²¹Aduduleɛ anwoma kpogya ye zo kɔ; ɔtu ye ɔfi ye tɛnlabelɛ ne.

²²Ɔfuandi ye ɔto; ɔnze ye anwunvɔne, ɔnriandi ɔfi ye tumi ne abo.

²³Ɔnriandi la ɛnee ɔ nwo anwoma ne ɛlɛsu huu, na anwoma ne ane ne ka ye ɛzulolɛ.