Read Nzema Dwo 28 Bible Online

Dwo 28 - Nzema bible

Dwo 28

¹“Kuma wɔ ɛkɛ mɔɔ bɛtu dwɛtɛ fufule nu, yɛɛ ɛleka wɔ ɛkɛ mɔɔ bɛtu ezukoa nvutuke nu a.

²Bɛtu bulalɛ wɔ azɛlɛ bo, yɛɛ bɛtwe kɔbele bɛfi awolɛ nu.

³Menli ɛndie awozinli kabikabi ne, bɛfunvu azɛlɛ bo ahuma kuloonwu bɛtu awolɛ wɔ awozinli kabikabi ne anu.

⁴Bɛfunvu ahuma wɔ bɔnza mɔɔ menli ɛnle nu la anu, ɛleka mɔɔ adendulɛma ɛnze la, bɛkenda nyɛma nwo na bɛdi ehono bɛkɔ bɛba.

⁵Aleɛ vi azɛlɛ nu a ba a, na ɔ bo lɔ, ɔtu ɔfonyia kɛ senle la nu.

⁶Ezukoa awolɛ anye buluwu wɔ ye awolɛ ne mɔ anu, yɛɛ ezukoa nvutuke wɔ ye ndɛtɛlɛ ne mɔ anu.

⁷Adenle zɔhane, anloma mɔɔ di nane la ɛnze ye, yɛɛ kyɛnyema nye ɛtɛnwunle ɛkɛ ne ɛlɛ.

⁸Nane anwo ɛzulolɛ biala agyakɛ ɛtɛtiale ɛkɛ, yɛɛ awenade bɔbɔ ɛtɛpɛle nu ɛkɛ.

⁹“Sonla funvu awolɛ mɔɔ yɛ se la anu, na ɔfunvu awoka ne mɔ abo.

¹⁰Ɔpepɛ ndenle wɔ awolɛ ne mɔ anu, na ɔnwu debie biala mɔɔ sonle bolɛ la.

¹¹Ɔsi azudenle ne mɔ, amaa bɛanzenze, na ɔtwe debie mɔɔ vea la ɔfinde wienyi nu.

¹²Noko nienwu yɛɛ yɛkɛnwu nrɛlɛbɛ a, yɛɛ ndelebɛbo wɔ ni?

¹³“Dasanli ɛnze ye adenle, yɛɛ bɛnnwu ye wɔ anyewɔzoma anu.

¹⁴Buma se, ‘Ɔnle me lɔ’, yɛɛ nyevile se, ‘Ɔnle me lɔ’.

¹⁵Bɛnzu ezukoa nvutuke bɛndɔ, yɛɛ bɛnzu dwɛtɛ fufule bɛndɔ.

¹⁶Ezukoa nvutuke tagyee bɔbɔ bolɛ nee ye ɛnzɛ, ezukoa awolɛ ‘ɔnekese’ nee ‘safaya’ nee ye ɛnzɛ bolɛ.

¹⁷Ezukoa nvutuke nee neanleɛ nee ye ɛnzɛ, yɛɛ bɛfa bɛsenza anwodeɛ nee ezukoa nvutuke tagyee a ɔnyɛ boɛ.

¹⁸Ezukoa awolɛ kɔkɔlɛ anzɛɛ fufule anye nwohyee, bɛmɛ, bɛmbɔ bɛ aluma; nrɛlɛbɛ sonle bolɛ tɛla ezukoa bolɛ biala mɔɔ sonle bolɛ la.

¹⁹Yiteɔpea ezukoa bolɛ topaze nee ye ɛnzɛ, yɛɛ bɛfa bɛto ezukoa nvutuke tagyee nwo a bɛnzɛ.

²⁰“Na ɛnee akee nrɛlɛbɛ bo vi ni? Nienwu a ndelebɛbo wɔ a?

²¹Bɛva bɛvea anyewɔzoamra kɔsɔɔti, anwomanyunlu nloma bɔbɔ ɛnze.

²²Ɛbolɔ nee Ewule se, ‘Yɛde ye bɛse bɛse.’

²³“Nyamenle a ze ye adenle, nee ɛleka mɔɔ ɔwɔ la a.

²⁴Ɔluakɛ ɔnwu azɛlɛ ti nee ɔ bo, yɛɛ ɔnwu debie biala mɔɔ wɔ aleɛabo la.

²⁵Mɔɔ ɔvale tumi ɔmanle anwoma, na ɔzuzule nzule ne mɔ kpole;

²⁶mɔɔ ɔhyehyɛle ɛleka mɔɔ ezule tɔ dwu, na ɔhilele ɛsɛnlɛmanye adenle ne la,

²⁷akee ɔnwunle ye na ɔbɔle ye nolo; ɔnwunle bolɛ mɔɔ ɔsonle la, na ɔliele ye ɔdole nu.

²⁸ “Na ɔzele sonla kɛ, ‘Nrɛlɛbɛ a le kɛ ɛkɛzulo Awulae; yɛɛ ndelebɛbo a le kɛ ɛkɛhwe ɛ nwo ɛkɛvi ɛtane nwo!’ ”