Read Nzema Dwo 29 Bible Online

Dwo 29 - Nzema bible

Dwo 29

¹Dwobu bɔle ɔ bo dendɛle bieko.

²Ɔse, “O, anrɛɛ meazia meayɛ kɛ me dɛba ne, mɔɔ ɛnee Nyamenle sinza me la;

³mɔɔ ɛnee ye kɛnlaneɛ ne ta me nwo zo, na ɔmanle menwunle aze wɔ awozinli nu;

⁴kɛmɔ ɛnee me anwonyia ɛyɛ kpole, na Nyamenle agɔnwolɛyɛlɛ ne wɔ me awuke nu;

⁵mɔɔ ɛnee Tumivolɛ ne nee me de, na me mra ɛbɔ ɛyia me;

⁶mɔɔ ɛnee meleke ɛbu me nwo zo, na bodane manle nwole bule kɛ azudenle manle me la.

⁷Mɔɔ mengɔle suakpole ne anlenkɛ kpole ne anloa, mɔɔ menzieziele me ebia na mendɛnlanle aze,

⁸mgbavolɛ ne mɔ nwunle me na bɛhwenle bɛ nwo, na mgbanyinli ne mɔ dwazole gyinlanle.

⁹Mgbanyima gyakyile ɛdendɛlɛ, na bɛvale bɛ sa bɛsosɔle bɛ nloa;

¹⁰mgbanyima bɔbɔ yɛle ngungoonwu, na awie biala muanle ɔ nloa.

¹¹“Awie biala mɔɔ diele me la hanvole me, yɛɛ awie biala mɔɔ nwunle me la liele me dole nu;

¹²ɔboalekɛ menliele ehyianvolɛma mɔɔ zunle vɛlɛle me, na memboale nrisa mɔɔ ɛnlɛ awie ɛmboa bɛ la.

¹³Menli mɔɔ asɛɛ ɛdɔ nzonle la yileyilale me, na memanle ahunlanvolɛ mraalɛ dole anyelielɛ edwɛne.

¹⁴Membule pɛlepɛlelilɛ tɛladeɛ menwulale, na me nɔhalɛlilɛ yɛle kɛ tɛladeɛ nee abɔtile.

¹⁵Menyɛle anyenzinliravolɛma anye, na menyɛle abuburama agyakɛ.

¹⁶Menyɛle ehyianvolɛma bɛ ze, na memkpondɛle mɔɔ menze ye la anzi adenle.

¹⁷Mendudule mɔɔ ɛnli pɛlepɛle la agye, memanle ɔdole mɔɔ ɔlɛ ye ɔ gye nu la aze.

¹⁸“Akee mendwenlenle kɛ mebanyi meahyɛ, na meawu meala me sua nu koonwu.

¹⁹Me ndinli dendenle dwule nzule nu, na me nya ne mɔ nyianle nɔɔzo ɛbɔlɛ,

²⁰anyunlunyia yɛle me ɛdeɛ dahuu, yɛɛ dahuu me ɛda le amolɛ wɔ me sa nu.

²¹Menli hendɛle diele me, na bɛyɛle ngungoonwu bɛdiele me folɛdulɛ.

²²Metendɛ mewie a bɛmbuke bɛ nloa bieko, na me edwɛkɛ dɔle bɛ nwo zo.

²³Bɛhendɛle me kɛ bɛkendɛ ezule; na bɛbukebukele bɛ nloa kɛ asɛɛ bɛkendɛ nyenyesuo.

²⁴Kɛmɔ bɛnlie bɛ nwo bɛnli la ati, menzelele; na me nloa anwo ɛzelekɛ yɛle akɛnrazilɛ manle bɛ.

²⁵Mengilele bɛ adenle na mendɛnlanle kɛ belemgbunli, mendɛnlanle kɛ belemgbunli de ye ɛlɔnema avinli, menzɔle bɛ kɛ sonla mɔɔ kyekye nyanelilɛma arɛle.