Read Nzema Dwo 3 Bible Online

Dwo 3 - Nzema bible

Dwo 3

¹ Nzinlii Dwobu bukele ɔ nloa na ɔwale kenle ko ne mɔɔ bɛwole ye la amonle.

²Dwobu hanle kɛ,

³“O Nyamenle, maa abule ɛbu kenle ko ne mɔɔ bɛwole me la; abule ɛbu nɔe ne mɔɔ bɛnrenzɛle me ralɛ nrenya la!

⁴Nyamenle, maa awozinli ɛva kenle zɔhane. Mmakakye kenle zɔhane bieko ɛlɛ; mmamaa wienyi ta kenle zɔhane anu ɛlɛ.

⁵Maa awozinli kabii nee awozinli mindomindo ɛva ye. Maa amungu ɛheda zo; maa alehyenlɛ ne anu awozinli ɛha ɛzulolɛ.

⁶Nɔɔzo zɔhane, maa awozinli kabii ɛva ye! Mmamaa bɛtia ye bɛboka ɛvolɛ ne anu kenle ne mɔ anwo, mmamaa bɛtia ye bɛboka siane ne mɔ anwo.

⁷Maa nɔɔzo zɔhane ɛyɛ diinyi, mmamaa bɛte anyelielɛ ɛnelɛ biala.

⁸Maa amowama ɛbɔ kenle ne sasa, ɛwa ye amonle; bɛmɛ yɛɛ bɛze kɛ bɛsi bɛmaa nyevizonle maa ɔ nwo zo a.

⁹Mmamaa ye aleɛbahye nwɔlɔra ne mɔ ta; mmamaa nɔɔzo zɔhane mangyee si.

¹⁰Ɔluakɛ yeando ɔmɔ awodeɛ ne anu, na ɔyele me ɔmanle nyanenwunlɛ.

¹¹“Me kunlu a anrɛɛ menwule ɔmɔ akunlu, anzɛɛ bɛwole me ala la mengale nzule nu.

¹²Duzu ati a ɔmɔ dedɛle me ɔ gyakɛ azo a? Duzu ati a ɔmanle me nyɛfonlɛ a?

¹³Saa menwule a, anrɛɛ mela melie me menle koonwu; anrɛɛ mela melie me menle bie

¹⁴kɛ ewiade arelemgbunli nee nrɛlɛbɛvoma mɔɔ kyekyele awuke mgbole manle bɛ nwo la.

¹⁵Anrɛɛ mela kɛ arelemgbunli mralɛ mrenya mɔɔ vale ezukoa nvutuke nee dwɛtɛ fufule yile bɛ azua la.

¹⁶Anrɛɛ ɔmɔ ako kpɔnenle, na meanyɛ sonla, anzɛɛ kɛ adɔma mɔɔ wule ɔ nli akunlu.

¹⁷Funli kuma nu yɛɛ amumuyɛma gyakyi ninyɛndane, na menli mɔɔ ɛvɛ la nyia ɛnwomenlelielɛ a.

¹⁸Ɛkɛ ne yɛɛ menli mɔɔ gua efiade la anwo tɔ bɛ, na bɛnde kpoyokpoyo bieko a.

¹⁹Mgbolema nee ahoahweabane wɔ ɛkɛ, na kanranli nyia ɔ ti fi ɔ menle asa anu.

²⁰“Duzu ati a ɛmaa menli mɔɔ de anwunvɔne nu la nwu wienyi a? Duzu ati a ɛmaa menli mɔɔ te nyane la ngoane ɛ?

²¹ Bɛ nwo dɔ ewule, noko ewule ɛmba; bɛkpondɛ ewule bɛtɛla anwonyia biala.

²²Kenle mɔɔ bɛkɛwu na bɛkɛzie bɛ la, ɛnee bɛ nye ɛlie.

²³Duzu ati a sonla mɔɔ ɛnze ye kenlebie la, Nyamenle ɛbɔ ɔ nwo bane a?

²⁴Me aleɛ a le me ɛzunlɛ, yɛɛ me nzule a le me ɛkponlenlɛ.

²⁵Ɔluakɛ mɔɔ mesulo ye la ɛra me nwo zo, yɛɛ mɔɔ tu me ahonle la ɛdo me.

²⁶Menlɛ anzonudwolɛ, yɛɛ ɛdendɛlɛ ɛdɔ me nwo; menlɛ ɛnwomenlelielɛ, yɛɛ me anwubɛnyunlu ɛnlɛ awieleɛ.”