Read Nzema Dwo 30 Bible Online

Dwo 30 - Nzema bible

Dwo 30

¹“Noko nea, me sa nu nlɔma ɛnɛ golo me nwo, bɛ ze mɔ bɔbɔ anrɛɛ nee me ahwea ɛnrɛbɔ nu ɛnrɛzinza me mboane.

²Duzu nvasoɛ yɛɛ menwɔnyia ye bɛ nwo zo a? Bɛdabɛ mumua ne bɛ anwosesebɛ ɛwie.

³Ehyia nee ɛhɔne maa bɛdi ɛsɛlɛ zo ɛva ketekete ne.

⁴Bɛnrenlenrenle ɛsɛlɛ zo mbaka nwo bɛtete nya nya bɛdi, na bɛdi mbaka bo ndinli bɛmaa bɛ nwo yɛ wuluwulu.

⁵Bɛtu bɛ bɛfi menli avinli; bɛwudo bɛ kɛ asɛɛ bɛwudo awule.

⁶Bɛda ɛzezeane ahuma mgbole nu, yɛɛ azɛlɛ bo nee awolɛ mbɔne nu.

⁷Bɛsu kɛ nane wɔ kpɔkɛ ne mɔ abo; na bɛnyenya bɛ nwo bɛda mbowumbaka bo.

⁸Bɛle gyibivolɛma ekpunli mɔɔ anwo ɛnlɛ nvasoɛ, na bɛbo bɛ bɛdu bɛ azɛlɛ ne azo.

⁹“Kɛkala bɛfa me bɛto edwɛne, na meyɛ bɛ agolobɛnwo sonla.

¹⁰Bɛkyi me, bɛmbikye me; bɛnwu me a bɛto me nwo nyɛlɛ.

¹¹Kɛmɔ Nyamenle ɛbɛlɛ me aze la, yemaa bɛva bɛ ɛya bɛgua me nwo zo.

¹²Kpamgbanvolɛma ɛhye mɔ dwazo me fema zo, bɛtu me mgbaliko, bɛfoa me ndinlizo, na bɛboɔboa bɛ nwo kɛ bɛsɛkye me bɔkɔɔ.

¹³Bɛtua me adenle bɛtinli me nyane nu; noko awie biala ɛnze bɛ kɛ bɛgyakyi.

¹⁴Bɛbɔ bɛfa me ɛvealeka bane ne anu, na bɛtietia me nwo zo bɛkɔ.

¹⁵Ɛzulolɛ kpole ɛha me; me enililɛ ɛze kɛ anwoma, yɛɛ me anwonyia ne ɛminli kɛ amungu.

¹⁶“Kɛkala me ɛkɛla bɔbɔ vi me nu ɛnriandi; nyane ngome ɛva me aze.

¹⁷Nɔɔzo me mbowule nu bu me, yɛɛ me nwo ɛngyakyi me ɛfofolɛ.

¹⁸Nyamenle ɛva ɛya ɛzɔ me nu, ye ɛya ne kyekye me kɛ me anwuma tɛladeɛ kɔme.

¹⁹Nyamenle ɛvuandi me ɛdo azia nu, yemaa meyɛ kɛ ndɛtɛlɛ nee nzonle.

²⁰“Mesu mefɛlɛ wɔ, na ɛnlie me zo; mesɛlɛ, noko ɛndie me.

²¹Wɔyɛ me atisesebɛ; ɛfa wɔ tumi kpole ne ɛyɛ me kpɔdekpɔde.

²²Ɛkpogya me zo wɔ anwoma gye nu, ɛmaa medua zolɛ, na wɔamaa ahumu ne ali me fuandisɔ.

²³Ɛhɛe, meze kɛ ɛbamaa meawu, na meahɔ ɛleka mɔɔ teasema amuala wɔ la.

²⁴Noko asoo sonla mɔɔ de ewula edukue nu la ɛndende ɔ sa, na ɔnzɛlɛ moalɛ wɔ ye nyanenwunlɛ nu ɔ?

²⁵Asoo meanzu meammaa menli ne mɔɔ alehyenlɛ ne anu yɛ se maa bɛ la? Asoo me ɛkɛla anli nyane ammaa ehyianvolɛma?

²⁶Noko mɔɔ memkpondɛle kpalɛ la, ɛtane a rale a; yɛɛ mengendɛle wienyi, na awozinli a rale a.

²⁷Me ahonle ɛlɛdi nyane, yɛɛ ɔngyakyi; kɛ nyanelilɛ ne doɔdoa zo ala ɛne.

²⁸Dahuu melua awozinli nu, menze sɛnzɛne deɛ holɛ; medwazo menli nu, na mesu mebiza moalɛ.

²⁹Me mediema mrenya a le ɛzonlɛ, yɛɛ me gɔnwo mɔ a le soholo.

³⁰Me nwonane kpunli na ɔtete ɔgua, yɛɛ me mbowule nu dɔ kɛ ɔgyi senle zo.

³¹Me getaa edwɛne ɛhakyi awolɛyelɛ, yɛɛ me fulutu edwɛne ɛhakyi ɛzunlɛ.