Read Nzema Dwo 31 Bible Online

Dwo 31 - Nzema bible

Dwo 31

¹“Me nee me nye ɛyɛ ngyekyeleɛ; kɛ menrɛnlea bɛlɛra mɔɔ ɛnze nrenya la menrɛhulo ye.

²“Me kyɛfoa mɔɔ vi anwuma Nyamenle ɛkɛ ne la a le duzu, yɛɛ me agyadeɛ mɔɔ wɔ anwuma Tumivolɛ ne ɛkɛ la a le duzu?

³Asoo munzule ɛndo menli mɔɔ ɛnle tenlene la, yɛɛ nyane ɛndo amumuyɛma?

⁴Asoo ɔnnwu me ndenle ne mɔ, na ɔnnea me gyakɛ ɛdudulɛ ne mɔ ɔ?

⁵“Saa membɔ adalɛ wɔ me ɛlualɛ nu, na menli mɛlɛbɛla nzi a,

⁶ɛnee Nyamenle ɛzuzu me wɔ nɔhalɛ tone zo, na ɔbanwu kɛ menze nwolɛ bie.

⁷Saa mengyakyi nɔhalɛ adenle ne, memaa me nye ɛbɛlɛbɛla me ahonle, na menli ɛtane nwo fɔlɛ a,

⁸ɛnee maa menlua, na sonla gyɛne ɛli; mɔɔ melua la, maa bɛdudu bɛgua.

⁹“Saa raalɛ ɛhwe me ahonle, na medɛ ye me gɔnwo anlenkɛ nloa a,

¹⁰ɛnee maa me ye ɛdo nrenya fofolɛ aleɛ, na maa nrenya gyɛne ɛvo ye ɛzɔlɛ zo.

¹¹Ɔluakɛ ɛhye le munzule kpole, mɔɔ ɔwɔ kɛ ndɛnebuavolɛma nea maa bɛtua menli nwolɛ kakɛ a;

¹²ɔluakɛ ɔle kɛ ɛbolɔ senle, na ɔbayela mɔɔ melɛ la amuala.

¹³“Saa me sonvolɛ nrenya anzɛɛ raalɛ ɛrabɔ me somolɛ, na mekpo ye,

¹⁴na saa Nyamenle dwazo a, duzu a mebayɛ a? Saa ɔbizebiza nuhua a, kɛ menwɔzi menwɔye ɔ nloa ɛ?

¹⁵Na tɛ mɔɔ bɔle me dole ɔmɔ akunlu la a bɔle ɔdaye ɔ, yɛɛ yeambɔ yɛ wɔ ɛkolɛ nu ɔ?

¹⁶“Metɛkpole kɛ menrɛboa ehyianli, anzɛɛ menrɛmaa kunlanvolɛ raalɛ ɛnrɛzu ɔ nye ɛnrɛbɔ nu,

¹⁷anzɛɛ me ngomekye menrɛli me aleɛ, na menrɛmaa nrisa bie ɛnrɛli a.

¹⁸Ɔluakɛ ɔvi me ngakula nu, menyɛle nrisa bɛ ze, mevi ɔmɔ akunlu ala la, meneanle ahunlanvolɛ.

¹⁹“Saa menwu kɛ awie ɛnlɛ ɛdanlɛ la ati ɔlɛwu, anzɛɛ ehyianvolɛ bie ɛnlɛ bie ɛngua ɔ nwo a,

²⁰memaa ye kundu mɔɔ meva me mboane enrinli menwo la, na ɔyeye ye ahonle nu ɔyileyila me.

²¹“Saa mesisi arisa ɛlɛ, ɔluakɛ melɛ moalɛ wɔ mgbanyima ne mɔ ɛkɛ a,

²²ɛnee maa me awane vi me bati ɛkpane, na maa me sa baka ne ɛdu ɛdɔ.

²³Ɔluakɛ ɛnee mesulo Nyamenle ndeanlɛ ne, yɛɛ eza anrɛɛ menrɛhola ɔ nyunlu gyinla.

²⁴“Saa menva ezukoa menyɛ me nyamenle, anzɛɛ menva me rɛle menwula ezukoa nvutuke tagyee nu;

²⁵saa menli fɛlɛko kɛ me anwonyia ɛyɛ kpole, anzɛɛ kɛmɔ me sa ɛyi tɛkɛɛ la;

²⁶saa ewia ne fi la meneanle ye, anzɛɛ siane ne ɛdalɛ kɛnlɛma ne,

²⁷na bɛhwe me ahonle, bɛmaa me sa ɛha me nloa menzonle bɛ a,

²⁸ɛhye noko ɛyɛ munzule ɛmaa me, na ndɛnebuavolɛma ɛdua me nwolɛ kakɛ, ɔluakɛ ɛnee meanli nɔhalɛ meammaa Nyamenle mɔɔ wɔ anwuma la.

²⁹“Metɛdile me kpɔvolɛ amaneɛnwunlɛ nwo fɛlɛko, anzɛɛ metɛdile fɛlɛko kɛ munzule dole ye;

³⁰metɛfale me nloa metɛkanle ɛtane, metɛwale me kpɔvolɛ amonle kɛ ɔwu;

³¹asoo me awuke nu amra ɛtɛkanle kɛ, ‘Nwane a ɛtɛdile ye debie ɛlɛ a?’

³²Adendulɛma ɛtɛsokoɛle gua zo ɛlɛ, mebuke me nlenkɛ memaa nyɛvolɛ.

³³“Saa menva me ɛtane ne mɔ menvea kɛ ebia mɔ, menva me munzulebɔlɛ menvea me nwo,

³⁴kɛmɔ ɛnee mesulo menli pemgbenleamgbe ne, na menzulole kɛ mbusua ɛnrɛbu me la ati, menyɛle koonwu, meanvinde alie nwo a.

³⁵“O, anrɛɛ meanyia awie adie me! Me edwɛkɛ ne amuala ɛne! Bɛmaa Tumivolɛ Nyamenle ne ɛbua me. “O, anrɛɛ me kpɔvolɛ ne ahɛlɛ me munzule mɔɔ mebɔ la kɔsɔɔti amaa meanwu ye.

³⁶Nɔhalɛ, anrɛɛ menwɔzoa ye me kɔme zo; anrɛɛ menwɔzoa ye kɛ belemgbunli kyɛlɛ;

³⁷anrɛɛ menwɔbu me nwo mgbonda menwɔhile ye, na meahɔ ɔ nyunlu kɛ mele belemgbunli ra.

³⁸“Saa memaa azɛlɛ ne azo gyimayɛvoma ɛhwi monle ɛgua kɔfie ne mɔ azo,

³⁹kɛ meli zolɛ aleɛ ne na meandua bɛ kakɛ memaa bɛwu a,

⁴⁰ɛnee kɛmɔ hwiiti kɛfifi zolɛ la, mbowule ɛfifi zolɛ, yɛɛ kɛmɔ baale kɛfifi zolɛ la, ndile ɛfifi zolɛ.” Dwobu anloa ɛdɔ