Read Nzema Dwo 32 Bible Online

Dwo 32 - Nzema bible

Dwo 32

¹Dwobu nea ɔ nwo a ɔle tenlenenli, yemɔti menli nsa ne angola ambua ye edwɛkɛ ne anwo.

²Na Buzinli Baleekɛle mɔɔ vi Relam abusua nu la ara nrenya Ɛlaehu vale ɛya. Ɔvale Dwobu anwo ɛya, ɔboalekɛ Dwobu buale ɔ nwo benle na ɔvale ɛzonle ɔdole Nyamenle anwo zo.

³Eza ɔvale Dwobu agɔnwo mɔ nsa ne anwo ɛya, ɔboalekɛ bɛhanle kɛ Dwobu le ɛtanevolɛ bɔbɔ ɛdeɛ, noko bɛanyia nu kile kpalɛ biala.

⁴Kɛmɔ Ɛlaehu le kakula la ati, ɔhendɛle ɔmanle bɛwiele tendɛ kolaa na ɔdaye yeadendɛ yeahile Dwobu.

⁵Ɛlaehu hendɛle toonwo na ɔnwunle kɛ bɛnlɛ mualɛ kpaziwɔkɛ biala bɛmbua Dwobu la, ɔvale ɛya,

⁶na ɔbɔle ɔ bo kɛ ɔtendɛ. Ɔse, “Mele kakula, bɛmɛ bɛle mgbanyinli, yemɔti menyɛle foanvoanle, na menzulole kɛ menwɔva me adwenle menwɔdo gua wɔ bɛ nyunlu.

⁷Menzele me nwo kɛ bɛmaa mgbanyinli ɛdendɛ, na egyɛnema ɛhile bɛ nrɛlɛbɛ ne.

⁸Noko sunsum ne mɔɔ wɔ sonla nu, Tumivolɛ ne ɛnwomenle ne yɛɛ maa sonla nyia ndelebɛbo a.

⁹Tɛ mgbanyinli ngome yɛɛ ze nrɛlɛbɛ a, yɛɛ tɛ egyɛnema angome a te mɔɔ le fɔɔnwo la abo a.

¹⁰Yemɔti mese, bɛdie me; bɛmaa medame mengile me adwenle.

¹¹“Bɛnlea, mengendɛle toonwo memanle bɛwiele tendɛ, mendiele bɛ nrɛlɛbɛ edwɛkɛ ne mɔ amuala, wɔ mekɛ mɔɔ ɛnee bɛlɛdwenle mɔɔ bɛka la anwo la.

¹²Menzile abotane mendiele bɛ, na bɛnlea, bɛ nuhua biala angola ambua Dwobu angile kɛ ɔdi fɔlɛ, bɛ biala ambua Dwobu edwɛkɛ ne anwo kpaziwɔkɛ nu biala.

¹³Bɛnlea boɛ na bɛanga kɛ, ‘Yɛnwu nrɛlɛbɛ; anzɛɛ Nyamenle a bali ɔ nwo zo konim a, tɛ dasanli ɔ’.

¹⁴Ɔtɛkanle edwɛkɛ biala ɔtɛtiale me, yemɔti menrɛbua ye, kɛmɔ bɛmɛ bɛbuale ye la.

¹⁵“Dwobu, mɔɔ bɛka la ɛwie, bɛnlɛ mualɛ bieko; bɛnlɛ edwɛkɛkpɔkɛ ko bɔbɔ bɛnga.

¹⁶Kɛmɔ bɛndɛ bɛ nloa anu, na bɛgyigyi ɛkɛ ne, na bɛnlɛ mualɛ biala la ati, ɛnee ɔnle kɛ metendɛ ɔ?

¹⁷Medame noko mebabua nwolɛ, na meahile me adwenle.

¹⁸Ɔluakɛ edwɛkɛ ɛyi me ti tɛkɛɛ, sunsum ne mɔɔ wɔ me nu la se mendendɛ.

¹⁹Bɛnlea, me ahonle ɛyɛ kɛ nwanye mɔɔ bɛdua zo wɔ toba nu la, me ahonle le kɛ nwanye nwoma fofolɛ, ɔkpondɛ yeakpuke.

²⁰Ɔwɔ kɛ metendɛ, na me ahonle adɔ me azule nu; ɔwɔ kɛ mebuke me nloa mebua wɔ.

²¹Menrɛli mɔguazo biala, yɛɛ menrɛva ɛtafinlimalɛ menlemenle menrɛbɛlɛbɛla awie biala.

²²Ɔluakɛ menze adalɛ bɔ, meyɛ ye zɔ a me Bɔvolɛ ne kɛhu me.