Read Nzema Dwo 33 Bible Online

Dwo 33 - Nzema bible

Dwo 33

¹“Na kɛkala, Dwobu, akee tie me ɛdendɛlɛ, na tie mɔɔ meka la amuala.

²Nea, mebuke me nloa; akee mebadendɛ meahile wɔ.

³Me edwɛkɛ ne vi me ahonle nu fɔɔnwo, yɛɛ mɔɔ melɛka la le nɔhalɛ.

⁴Nyamenle sunsum ne ɛbɔ me, yɛɛ Tumivolɛ ne ɛnwomenle ne maa me ngoane.

⁵“Saa ɛkola a, bua me; siezie wɔ edwɛkɛ ne mɔ agbɔkɛ; na gyinla boɛ.

⁶Nea, melua Nyamenle adenle ne anu kɛ ɛdawɔ ala la, medame noko bɛvale ndɛtɛlɛ a bɛbɔle me a.

⁷Nea, mmamaa wɔ ahonle tu na ɛsulo me, menrɛmia wɔ kpole biala menrɛmaa ɛ nwo ɛnrɛhyele wɔ.

⁸“Nɔhalɛ, wɔdendɛ wɔmaa mede, yɛɛ mede wɔ edwɛkɛ ne.

⁹Ɛse, ‘Me nwo te, metɛyɛle ɛtane biala; me ɛbɛla le bɔkɔbɔkɔ, metɛyɛle ninyɛmunli biala.

¹⁰Nea, ɔkpondɛ edwɛkɛ yeatia me, ɔbu me kɛ mele ye kpɔvolɛ.

¹¹ Ɔbɔ me gyakɛ kpanwu, na ɔnea me gyakɛ biala mɔɔ metu la.’

¹²“Nea, ɛhye ɛnle nɔhalɛ. Mebabua wɔ. Nyamenle le kpole tɛla dasanli.

¹³Duzu ati a ɛbɔ ye somolɛ kɛ ɔnrɛbua wɔ edwɛkɛ ne mɔ ko bɔbɔ anwo a?

¹⁴Ɔluakɛ Nyamenle tendɛ ko ala, ɔka ye nwiɔ, noko dasanli ɛndie ye.

¹⁵ Wɔ ɛlalɛ nu, nɔɔzo ɛnyelɛzodeɛnwunlɛ nu, mɔɔ nafelɛ kɛdɔ menli nwo zo, na bɛdeda bɛ mgba ne mɔ azo la,

¹⁶akee ɔbuke menli nzo, ɔbɔ bɛ kɔkɔ, ɔmaa ɛzulolɛ ka bɛ,

¹⁷amaa yeahwe sonla yeavi ye nyɛleɛ nwo, na yeaye mgbanyizonle yeavi ye nu.

¹⁸Ɔtwe sonla ɛkɛla ɔfi ewule kuma nu, na ɔdie ye ɔfi dadeɛ nloa.[6]

¹⁹Bɛfa nyanenwunlɛ bɛtea sonla, na ɔte nyane wɔ ye mbowule nu,

²⁰amaa ɔ nloa anu ado, na yeakpo ye atiakunluwɔzo aleɛ.

²¹Ɔnwa ɔyɛ nrenzenrenze mɔɔ bɛnnwu ye sonla holɛ, na ye mbowule sa gua zo sanrɛlaanye.

²²Ye ɛkɛla bikye ewule, ye ngoane dwu ewule soanvolɛma asa anu.

²³“Saa ɔnyia Nyamenle soanvolɛma apenle apenle ne mɔ anu kamaavolɛ ko, mɔɔ maa yeanwu mɔɔ le kpalɛ maa ye,

²⁴mɔɔ yɛ ahunlunyele amaa ye, yeaze kɛ, ‘Die ye fi ewule nu, menyia ɛkpɔnedeɛ,

²⁵maa ye nwonane ɛzia ɛyɛ kɛ ye mgbavolɛ nu, na ɔnyia ye mgbavolɛ nu anwosesebɛ ne bieko’ a,

²⁶anrɛɛ sonla sɛlɛ Nyamenle a, ɔtie ye; na ɔfa fɛlɛkolilɛ ɔba Nyamenle anyunlu bieko. Ɔbɔ ye ngoanelielɛ ne nolo ɔkile menli,

²⁷na ɔto edwɛne ɔkile menli, ɔse kɛ, ‘Menyɛle ɛtane, na mengyile nɔhalɛ, na meannyia nwolɛ ndeanlɛ.

²⁸Yelie me yevi ewule nu, na mezia mera ngoane nu.’

²⁹“Nea, Nyamenle yɛ ninyɛne ɛhye mɔ amuala fane kɛyɛ nyɛ maa sonla,

³⁰amaa yealie ye yeavi ewule nu, na yeava ye yeara ngoane nu.

³¹“Dwobu, gyele ɛ nzo tie mɔɔ melɛka la; yɛ koonwu maa mendendɛ!

³²Saa ɛlɛ edwɛkɛ a, ka maa mendie; tendɛ, ɔluakɛ mekulo kɛ mebua wɔ benle.

³³Saa ɛnlɛ edwɛkɛ a, ɛnee tie me; yɛ koonwu maa mengile wɔ nrɛlɛbɛ.