Read Nzema Dwo 34 Bible Online

Dwo 34 - Nzema bible

Dwo 34

¹“Bɛdie me, bɛmɛ nrɛlɛbɛvolɛma, bɛmɛ mɔɔ bɛze deɛ, bɛmaa bɛ nzo ɛrɛla ɛke;

³ ɔluakɛ ɛnzonlɛ te edwɛkɛ, kɛmɔ ɛtafinlimalɛ te aleɛ fɛlɛko la.

⁴Bɛmaa yɛva nuhua mɔɔ le nɔhalɛ, na yɛhile kpalɛ mɔɔ wɔ nu la.

⁵Ɔluakɛ Dwobu se, ‘Menli fɔlɛ, Nyamenle ɛbua me mgbɔvodɛne.

⁶Mɔɔ melɛka nɔhalɛ bɔbɔ la, ɛnee bɛse mele adalɛ; menyɛ ninyɛndane, noko me hanlɛ ɛngɔ ɛlɛ.’

⁷“Duzu sonla bɔbɔ a le Dwobu, mɔɔ tendɛ ɛtane zɛhae,

⁸mɔɔ nee ɛtanevolɛma tu, na ɔ nee amumuyɛma tu fane a?

⁹Ɔluakɛ ɔse, ‘Nvasoɛ biala ɛnle zo kɛ dasanli anye kɛlie Nyamenle anwo.’

¹⁰“Yemɔti, bɛmɛ mɔɔ bɛlɛ ndelebɛbo la, bɛdie me, ɔle bɛkyi kɛ Nyamenle kɛyɛ amumuyɛ, anzɛɛ Tumivolɛ ne kɛyɛ ɛtane.

¹¹ Ɔluakɛ kɛ sonla kɛzi kɛyɛ ye gyima la, nwolɛ yɛɛ ɔbanlea yeadua ye kakɛ a, yɛɛ kɛ ɔkɛzi ɔkɛbɔ ye ɛbɛla ne la, yɛɛ ɔwie ye a.

¹²Nɔhalɛ, Nyamenle ɛnrɛyɛ amumuyɛ, yɛɛ Tumivolɛ ne ɛnrɛli mɔguazo.

¹³Nwane a vale azɛlɛ ye wulale ye tumi bo a, yɛɛ nwane a vale ewiade ye wulale ɔ sa nu a?

¹⁴Saa ɔdie ye sunsum ne nee ye ɛnwomenle ne a,

¹⁵menli kɔsɔɔti bawu, na sonla azia ahɔ ndɛtɛlɛ nu.

¹⁶“Saa bɛlɛ ndelebɛbo a, bɛdie ɛhye; bɛdie mɔɔ meka la.

¹⁷Asoo sonla mɔɔ kyi pɛlepɛlelilɛ la sie maanle? Asoo ɛkɛbua sonla mɔɔ di pɛlepɛle na ɔle katakyie la ewule fɔlɛ,

¹⁸yemɔ mɔɔ ɔkola ɔse belemgbunli kɛ, ‘Sonlamgbane,’ na ɔse mgbolema kɛ, ‘Amumuyɛma’ la.

¹⁹Ɔnnea mgbanyima nyunlu ɔnli mɔguazo, yɛɛ ɔmbu sukoavolɛma ɔndɛla ehyianvolɛma, ɔluakɛ bɛ kɔsɔɔti bɛle ɔ sa anloa gyima.

²⁰Ɔngyɛ ɛnee bɛwu; alevinli mu nwiɔ avinli bɛ ahonle tu na bɛwu, yɛɛ tɛ sonla a ku mgbolema a.

²¹Ɔluakɛ ɔnwu sonla ndenle nu, yɛɛ ɔnwu ɔ gyakɛ biala mɔɔ ɔtu la.

²²Awozinli ɛnle ɛleka biala mɔɔ ɛtanevolɛma fea nu a ɔyɛ boɛ a.

²³Ɔluakɛ ɔtɛkilele sonla biala mekɛ kɛ ɔhɔ Nyamenle anyunlu ɔmaa bɛbua ye ndɛne.

²⁴Ɔngyia nvedenvedenu na yeadu mgbolema, yeava fofolɛ yeazie bɛ gyakɛ anu.

²⁵Kɛmɔ ɔze mɔɔ bɛyɛ la ati, ɔtu bɛ nɔɔzo na ɔyɛ bɛ kpasakpasa.

²⁶Bɛ amumuyɛ ti, ɔtea bɛ bagua nu,

²⁷ɔboalekɛ bɛkpole kɛ bɛnrɛdoa ɔ bo zo, yɛɛ bɛanli ye mɛla ne mɔ biala azo.

²⁸Ɔlua zo ehyianvolɛma ɛzunlɛ dwule ɔ nzo nu, na ɔdele nyanenwunlɛma ɛzunlɛ.

²⁹“Saa ɔyɛ koonwu a, nwane a kɛbu ye fɔlɛ a, yɛɛ ɔfea ɔ nwo a, nwane a kɛnwu ye a, saa maanle o anzɛɛ sonla ko o?

³⁰Ɔnle kɛ sonla mɔɔ ɛnze Nyamenle la di belemgbunli anzɛɛ yɛ ɛhane maa maanlema.

³¹“Asoo awie ɛha ɛhile Nyamenle kɛ, ‘Menyia ɛtane nwo ndeanlɛ; menrɛyɛ ɛtane ko;

³²kilehile me mɔɔ mennwu ye la; saa meyɛ ɛtane a, menrɛyɛ ko?’

³³Kɛmɔ wɔkpo ɛtane la ati, ɔwɔ kɛ Nyamenle yɛ mɔɔ wɔmɔ ɛkulo la ɔ? Ɛdawɔ yɛɛ ɔwɔ kɛ ɛka a, tɛ mame ɔ; yemɔti mɔɔ ɛlɛ ye la, ka maa yɛdie.

³⁴“Menli mɔɔ lɛ ndelebɛbo la baze me, yɛɛ nrɛlɛbɛvolɛma mɔɔ tie me la baze kɛ,

³⁵‘Dwobu ɛndendɛ nrɛlɛbɛ nu, edwɛkɛ biala mɔɔ ɔkɛha la, ndelebɛbo ɛnle nu.’

³⁶Anrɛɛ bɛazɔ Dwobu bɛanlea bɛahɔ awieleɛ, ɔboalekɛ ɔye edwɛkɛ nloa kɛ amumuyɛma.

³⁷Ɔluakɛ ɔfa atuadelɛ ɔboka ye ɛtane ne mɔ anwo; yɛ avinli ɛke, ɔbɔ ɔ sa nu na ɔka mgbole ɔtia Nyamenle!