Read Nzema Dwo 36 Bible Online

Dwo 36 - Nzema bible

Dwo 36

¹“Dwobu, si abotane ekyii, maa menga mengile wɔ, megyi Nyamenle agyakɛ anu melɛka edwɛkɛ meahile wɔ.

³Me adwenle ne abo vi moa, me Bɔvolɛ ne di pɛlepɛle.

⁴Ɔluakɛ me edwɛkɛ ne ɛnle adalɛ; sonla mɔɔ ye adwenle ɛdi la gyi ɛ nyunlu ɛke.

⁵“Nea, Nyamenle le bedevinli, ɔmkpo bie; yɛɛ ye ndelebɛbo nu mia kpole kpalɛ.

⁶Ɔmmaa amumuyɛma ɛndɛnla aze ɛngyɛ, na ɔmaa amaneɛnwunlɛma nyia bɛ gyinlabelɛ.

⁷Ɔnye ɔ nye wɔ tenlenema anwo zo, ɔsiezie bɛ kɛ arelemgbunli na ɔkpogya bɛ zo dahuu.

⁸Saa bɛgua bɛ anga na anwubɛnyunlu kyekye bɛ a,

⁹ɛnee Nyamenle ɛmaa bɛnwu bɛ nyɛleɛ nee bɛ ninyɛmunli ne mɔ; kɛ bɛlɛyɛ mgbanyizonle.

¹⁰Ɔbuke bɛ nzo ɔmaa bɛte folɛ, ɔmaa bɛtwe bɛ nwo bɛfi bɛ ɛtane ne mɔ anwo.

¹¹Saa bɛtie ye na bɛsonle ye a, bɛdi bɛ mekɛ ne anwonyia nu, bɛdi bɛ ɛvolɛ ne mɔ wɔ anzonudwolɛ nu.

¹²Na saa bɛandie ye a, bɛbawu dadeɛ nloa,[7] na bɛawu ewule mɔɔ bɛnde ɔ bo a.

¹³“Menli mɔɔ ɛnze Nyamenle la fa ɛya sie bɛ ahonle nu, kanza bɛwɔ ngyianlɛ nu bɔbɔ a, bɛnzu bɛnvɛlɛ Nyamenle moalɛ.

¹⁴Bɛwu bɛ mgbavolɛ nu, yɛɛ bɛ awieleɛ wie anyiemgba nu.

¹⁵Nyamenle dua nyanenwunlɛma nyane zo die bɛ, na ɔdua bɛ amaneɛnwunlɛ zo ɔbuke bɛ nzo.

¹⁶“Eza Nyamenle yele wɔ vile nyanenwunlɛ nu hɔle ɛleka wienyi mɔɔ anwodɔlɛ wɔ la, na wɔ ɛkponle zo yɛle sosɔɔ.

¹⁷Na kɛkala, bɛva amumuyɛma ndeanlɛ bɛdea wɔ; ndɛnebualɛ nee pɛlepɛlelilɛ ɛbɔ wɔ kpanwu.

¹⁸Nea boɛ anrɛɛ ɛyavalɛ kɛmaa bɛkɛgolo ɛ nwo; yɛɛ mmamaa ɛkpɔnedeɛ ne kpole ti ɛfo adenle.

¹⁹Asoo wɔ ɛzunlɛ kɛye wɔ kɛvi nyanenwunlɛ nu, anzɛɛ wɔ anwosesebɛ kɛhola kɛboa wɔ?

²⁰Mmamaa ɛ nwo dɔ aledwolɛ ne, mekɛ mɔɔ maanle maanle bo zo bɔ la ɛne.

²¹Nea boɛ, mmakakyi ɛkɔyɛ ɛtane, ɔluakɛ wɔhulo ɛhye wɔdɛla amaneɛnwunlɛ.

²²“Nea, Nyamenle tumi ne le kpole, nwane a le kilehilevolɛ kɛ ɔdaye a?

²³Nwane a ɛhola ɛhile ye adenle, anzɛɛ nwane a kɛhola kɛze ye kɛ, ‘Wɔyɛ ɛtane’ a?

²⁴Bɛhakye kɛ bɛkɛhanvo ye gyima ne, mɔɔ menli ɛdo nwolɛ edwɛne la.

²⁵Menli kɔsɔɔti ɛnwu ye; sonla nwu ye moa moa.

²⁶Bɛnlea, Nyamenle le kpole, noko yɛnze ye; ye ɛvolɛ dodo, bɛnrɛnwu ye ɛlɛ.

²⁷“Ɔluakɛ ɔtwe ezule mɔɔ pepe la ɔkɔ anwuma, ɔtwe ezule ɔfi kpukpuke nu,

²⁸na ɔvi anwomanyunlu ɔtɔ ɔmaa sonla nyia bie dɔɔnwo.

²⁹Asoo awie kɛhola kɛde kɛ amungu si tɛlɛdɛlɛ, nee kɛ anwomanyunlu si kuluhulu la abo?

³⁰Bɛnlea, ɔkpakye ɛsɛnlɛmanye ɔbɔ ɔ nwo mgbɔlɔka, na ɔkeda nyevile buma bo azo.

³¹Ɔluakɛ ɛhye mɔ azo yɛɛ ɔdua ɔbua maanle maanle ndɛne na ɔmaa aleɛ bu a.

³²Ɔfa ɔ sa ɔsɔ ɛsɛnlɛmanye, na ɔmaa ɔpe ɛleka mɔɔ ɔkpondɛ la.

³³Ye ɛpenlɛ ne kile kɛ ɔsi ɔde la, kɛ ye nungule ɛya ne tia ninyɛndane.