Read Nzema Dwo 38 Bible Online

Dwo 38 - Nzema bible

Dwo 38

¹Akee Ɛdɛnkɛma dendɛle ahumu ne anu hilele Dwobu.

²Ɔse, “Nwane noko a ɔdaye ɔlɛfa edwɛkɛ mgbane mgbane yeazɛkye adwenle la?

³Bɛza kɛ nrenya, mebiza wɔ meamaa wɔaye ɔ nloa.

⁴Mɔɔ mewula azɛlɛ ye adiabo aze la ɛnee ɛwɔ ni? Saa ɛse wɔ adwenle ɛdi, ɛlɛ ndelebɛbo a, ka kile me.

⁵Nwane a hyehyɛle kɛ ye kpole ɔwɔ kɛ si yɛ la a? Ɔwɔ kɛ ɛnwu ye! Anzɛɛ nwane a dole ye nyɛma zuzule a?

⁶Duzu azo a ye mpila ne mɔ gyigyi, anzɛɛ nwane a dole ye mgbɛnezo bolɛ ne a?

⁷Kenle ko ne aleɛbahye nwɔlɔra bɔle nu dole edwɛne, na Nyamenle amra kɔsɔɔti vale fɛlɛkolilɛ deɛdeanle nu.

⁸ Anzɛɛ nwane a dole nyevile ne anlenkɛ nu, wɔ mekɛ mɔɔ ɔvi azɛlɛ ti anu ɔkpukele,

⁹mɔɔ menvale amungu menyɛle ye ɛdanlɛ, na menvale awozinli kabikabi menyɛle ye tabule,

¹⁰mengyale ye ɛweɛne, na menduoduale ye nlenkɛ, menguale mbulalɛ bɛ nzi,

¹¹na menzele kɛ, ‘Ɛke ala a ɔwɔ kɛ ɛba ɛbadwu a, ɛngɔ ɛ nyunlu ko, na ɛke yɛɛ wɔ azɛlɛkye mgbole babu adwu’ la, ɛnee ɛwɔ nienwu?

¹²Sumunli kɛ bɛwole wɔ la, kenle ko bɔbɔ wɔmaa aleɛ ɛhye yɛɛ wɔmaa aleɛbahye ɛnwu ɔ bo zo,

¹³amaa yeazɔ azɛlɛ ye anloa ne mɔ yeahegye ye, yeamaa amumuyɛma vi bɛ feabelɛ avinde ɔ?

¹⁴Ɔmaa azɛlɛ ye yɛ kɛ ɛva mɔɔ bɛzi zo, na ɔmaa ɔ nye da ɛkɛ kɛ ɛdanlɛ.

¹⁵Amumuyɛma ɛngola wienyi ne nea yɛɛ bɛ sa ne mɔ mɔɔ bɛmaa bɛ zo la dwɔlɔdwɔlɔ.

¹⁶“Asoo wɔnloma nyevile ne abo lɔ wɔdwu ɛleka mɔɔ nzule ne vi ba la, anzɛɛ wɔdia nyevile bo azɛlɛ ne azo ɛlɛ?

¹⁷Asoo bɛye ɛbolɔ nlenkɛ ne mɔ bɛhile wɔ ɛlɛ, anzɛɛ wɔnwu awozinli kabikabi nlenkɛ ne mɔ ɛlɛ?

¹⁸Asoo wɔnwu kɛ ewiade kpole si de la? Saa ɛze ɛhye mɔ amuala a, ka kile me.

¹⁹“Nienwu yɛɛ wienyi sua zo adenle ne la a, yɛɛ awozinli sua zo wɔ nienwu,

²⁰amaa wɔava zo wɔahɔ ye maanle nu na wɔanwu adenle ne mɔɔ kɔ ye sua zo la a?

²¹Ɛze, ɔluakɛ ɛnee bɛwo wɔ, yɛɛ wɔhyɛ kɛ kpanwenle!

²²“Asoo wɔwolo ezukɔtweaba ninyɛnezielɛ sua ne anu, anzɛɛ wɔnwu ezuawolɛ ninyɛnezielɛ sua ne,

²³mɔɔ meva mezie memaa ngyegyelɛ nee konle mekɛ la?

²⁴Ɛleka mɔɔ wienyi vi ba la adenle, anzɛɛ ɛleka mɔɔ aduduleɛ anwoma vi bɔ azɛlɛ ye azo la wɔ ni?

²⁵“Nwane a ɛye ɛzezeane ɛmaa ezule, na yekpakye adenle yemaa ɛsɛnlɛmanye bolɛ,

²⁶kɛ ɔmaa ezule adɔ ɛleka mɔɔ awie ɛnle nee ɛsɛlɛ mɔɔ awie ɛnde ɛkɛ la azo;

²⁷kɛ ɔmaa azɛlɛ mɔɔ le resee na yehwie la ayɛ azɛlɛ mɔɔ fifi ndile la a?

²⁸Asoo ezule lɛ ɔ ze, anzɛɛ nwane a ɛwo ɛbɔlɛ a?

²⁹Nwane akunlu a ayese vi rale a, yɛɛ nwane a ɛwo ayese ne mɔɔ vi anwuma ba la a?

³⁰Ɔmaa nzule ne mɔ yɛ se kɛ bolɛ, yɛɛ buma nye yɛ ketekete.

³¹ “Ɛkɛhola ɛkɛgua ‘Nwɔlɔra nsuu’ ne nwɔnzɔnwɔnzɔ anzɛɛ ɛkɛhola ɛkɛzanyi nyɛma mɔɔ kyekye ‘Apeansa’ la ɔ?

³²Ɛkɛhola ɛkɛhile nwɔlɔra ne mɔ ɛlobɔ, anzɛɛ ɛkɛhola ɛkɛhile ‘Ɛrelera nee ɔ mra’ adenle ɔ?

³³Ɛze anwuma maamɛla ne mɔ ɔ? Ɛkɛhola ɛkɛmaa bɛkɛli zolɛ wɔ aleɛabo ɔ?

³⁴“Ɛkɛhola ɛkɛmaa ɛ ne zo ɛkɛze amungu kɛ azuyilɛ ɛmonla wɔ ɔ?

³⁵Ɛkɛhola ɛkɛzoa ɛsɛlɛmanye ne mɔ ɛkɛmaa bɛkɛhɔ, na bɛkɛraze wɔ kɛ, ‘Yɛmɛ ɛne?’

³⁶Nwane a ɛhile amungu ne mɔ nrɛlɛbɛ, anzɛɛ ɛmaa ɛbɔlɛ ɛnyia ndelebɛbo a?

³⁷Nwane a ye nrɛlɛbɛ kɛhola amungu ne mɔ tia a? Anzɛɛ nwane a kɛhola anwuma nzule ahodoku ne mɔ kyeɛhyea butu bɛ

³⁸wɔ mekɛ mɔɔ munlutu kɛbo bama na ɔkɛbɔ ɛdɔkɛ la a?

³⁹“Ɛkɛhola ɛkɛhu nane ɛkɛmaa awenade na ɛkɛmaa awenade mralɛ akunlu kɛdwo bɛ nwo,

⁴⁰wɔ mekɛ mɔɔ bɛkɛsise ngoko wɔ bɛ tunli nloa, anzɛɛ bɛkɛhɔ nzia anyebolo nu la?

⁴¹Saa aleɛ ti ahɔhɔsɛlɛ mralɛ duolua nu su fɛlɛ Nyamenle a, nwane a maa bɛ aleɛ a?