Read Nzema Dwo 39 Bible Online

Dwo 39 - Nzema bible

Dwo 39

¹Ɛze mekɛ mɔɔ awoka zo mbɔnkye wo a? Wɔnwu kɛ weɛlɛ si wo la ɔ?

²Ɛze siane dodo mɔɔ bɛfa bɛfia bɛ mra a, yɛɛ ɛze bɛ awolɛ mekɛ ɔ?

³Ɛze mekɛ mɔɔ bɛse ngoko kɛ bɛwo, na bɛwo bɛ mra la ɔ?

⁴Bɛ mra nyi kpɔkɛ bo wienyi nu, na bɛ nwo mia; bɛkpakye bɛ nwo, yɛɛ bɛnzia bɛmba bieko.

⁵“Nwane a ɛmaa ɛbɔ nu asoaso ɛva ɔ nwo dwɔɔ a? Nwane a ɛzanyi asoaso mɔɔ anwo yɛ ndɛ la nyɛma,

⁶mɔɔ meva ɛsɛlɛ zo memaa ye kɛ ye sua nu, na meva ngyenle azɛlɛ memaa ye kɛ ɔdɛnla zo la a?

⁷Ɔkyi suakpole zo alɛra ne mɔ; ɔnde nanekavolɛ ne ane.

⁸Awoka ne mɔ azo a le ye adidileka a, na ɔkpondɛ ndile amolɛ ɔdi.

⁹“Asoo ɛbɔ nu ɛnlankɛ nyinli bazonle wɔ? Asoo nɔɔzo ɔbala wɔ tunli ne anu?

¹⁰Asoo ɛkɛhola ye kyekye, ɛkɛmaa ɔkɛvundu azɛlɛ, anzɛɛ ɔkɛva bulalɛ ɔ nee wɔ kɛyɛ gyima wɔ mbɔnza nu?

¹¹Ɔ nwo yɛ se la ati, ɛkɛva ɛ rɛle ɛkɛwula ye nu, na ɛkɛva wɔ gyima muala ɛkɛgua ɔ nwo zo ɔ?

¹²Ɛdie ye ɛdi kɛ ɔbazia yeara yearava wɔ ma ne yeara ma ɛwozolɛ ɛleka ne?

¹³“Soholo kola bɔ ɔ ndɛba anu kpalɛ kpalɛ; noko asoo bɛfa bɛto azuazuanloma nwo a ɔkɛyɛ boɛ ɔ?

¹⁴Ɔluakɛ ɔgyakyi ye aholonvia anwea nu, ɔmaa bɛ nwo yɛ wuluwulu.

¹⁵Ɔ rɛle fi kɛ egyakɛ kola gelegele bɛ, yɛɛ ɛbɔ nu nanemgbole kola tietia zo.

¹⁶Ɔ nee ɔ mra di ye ketekete, kɛ asɛɛ tɛ ɔ mra ɔ; kanza ye ɛvɛlɛ yɛ mgbane bɔbɔ a, ɔnvane ɔ nwo;

¹⁷ɔboalekɛ Nyamenle ɛmaa ɔ rɛle ɛvi nrɛlɛbɛ, yɛɛ yeammaa ye ndelebɛbo nretee zɛ.

¹⁸Saa ɔbɔ ɔ ndɛba anu kɛ ɔtu a, ɔsele ɛkpɔnwɔ ne nee ye kavolɛ ne.

¹⁹“Asoo ɛdawɔ a ɛmaa ɛkpɔnwɔ anwosesebɛ a? Ɛdawɔ a ɛmaa ye ɔ kɔme nu enrinli ne a?

²⁰Asoo ɛdawɔ a ɛmaa ɔwuluwulu kɛ abɛbɛ a? Ye ɛnwomenlelielɛ bedevinli ne yɛ ɛzulolɛ.

²¹Ɔfunvu bɔnza ne anu, na ɔdi ye anwosesebɛ nwo fɛlɛko; ɔfa ye anwosesebɛ muala ɔkɔ konle nloa.

²²Ɔnze ɛzulolɛ deɛ holɛ, yɛɛ ɔ rɛle ɛmbɔ, ɔnwu dadeɛ a ɔnnriandi.

²³Ɔ kɛnra azo a ɛda mbaka rede, yɛɛ atwɛ nee ɛtweneɛ pɛ memeamemea a.

²⁴Ɔfa atisesebɛ nee ɛya yɛɛ ɔnriandi a; saa ɔte aweɛne tendenle ne ane a, ɔgyinla a, ɔngyinla.

²⁵Saa ɔte aweɛne tendenle ne ane a, ɔtea nu, ‘Ɛhɛɛ!’ Ɔte konle ne nganeɛ wɔ moa moa, ɔte safohyenlema ɛhululɛ nee bɛ ɛdeanlɛ ne.

²⁶Asoo wɔ nrɛlɛbɛ ti yɛɛ kyɛnyema tu, na ɔtɛlɛdɛlɛ ɔ ndɛba wɔ nyiakɛ a?

²⁷Asoo ɛdawɔ a ɛmaa kɔleɛ tu, na ɔyɛ ye sane wɔ anwuma hwehwe lɔ a?

²⁸Ɔfa boka ne azo ɔyɛ ye sua nu, na ɔfa bolɛ tokule nu ɔyɛ ye feabelɛ.

²⁹Ɔde ɛkɛ ne a ɔtoto ɔ nye ɔkpondɛ mɔɔ ɔkɛli; ɔ nye die ye moa moa nehane.

³⁰ Ɔ mra no mogya; na ɛleka mɔɔ bɛku menli bɛgua la, ɛkɛ ne a ɔkɔ a.